ଯୋଡ଼ା, ୩୦ା୫(ଡି.ଏନ.ଏ.): ରାଜ୍ୟର ଏକ ପ୍ରମୁଖ ପର୍ଯ୍ୟଟନସ୍ଥଳୀ ଭାବେ ପରିଗଣିତ କେନ୍ଦୁଝର ଜିଲାର ଯୋଡ଼ା ବ୍ଲକରେ ଅବସ୍ଥିତ ହାଣ୍ଡିଭଙ୍ଗା ଜଳପ୍ରପାତକୁ ରାସ୍ତା ନ ଥିବାରୁ ପର୍ଯ୍ୟଟକମାନେ ଆସିଲେ ଦୁର୍ଦ୍ଦଶା ଭୋଗୁଛନ୍ତି। ଏହି ପର୍ଯ୍ୟଟନସ୍ଥଳୀକୁ ଝାଡ଼ଖଣ୍ଡ, ପଶ୍ଚିମବଙ୍ଗ ପ୍ରଭୃତି ପଡ଼ୋଶୀ ରାଜ୍ୟରୁ ଦୈନିକ ପର୍ଯ୍ୟଟକ ଆସିଥାନ୍ତି। ପ୍ରଧାନମନ୍ତ୍ରୀ ସଡ଼କ ଯୋଜନାରେ ୫ କି.ମି ରାସ୍ତା ନିର୍ମାଣର ଫଳକ ୨୦୨୧ ମସିହାରୁ ଲଗାଯାଇଥିଲେ ହେଁ ଉକ୍ତ ରାସ୍ତାଟିର ନିର୍ମାଣ କାର୍ଯ୍ୟ ଆରମ୍ଭ ହୋଇ ନାହିଁ।
ଅଞ୍ଚଳର ଜଣେ ଖବରଦାତା ରବୀନ୍ଦ୍ର ଖମାଣିଆ ଅଭିଯୋଗ କରି କହିଛନ୍ତି, ୨୦୨୧ମସିହା ସେପ୍ଟେମ୍ବର ୧୮ ତାରିଖରେ ଏହି ରାସ୍ତାର ନିର୍ମାଣ କାର୍ଯ୍ୟ ଆରମ୍ଭ ହୋଇ ୨୦୨୨ ମସିହା ଅଗଷ୍ଟ ୭ ତାରିଖରେ କାର୍ଯ୍ୟ ସମ୍ପୂର୍ଣ୍ଣ କରାଯିବାର ଧାର୍ଯ୍ୟ ଥିବାବେଳେ ବର୍ତମାନ ପର୍ଯ୍ୟନ୍ତ ଏହି ରାସ୍ତା ଆରମ୍ଭ ହୋଇ ନାହିଁ। କେବଳ ଫଳକରେ ଏହି ରାସ୍ତା ନିର୍ମାଣ କରାଯାଇଥିବାର ସୂଚନା ଦିଆଯାଇଛି। ଏହି କାର୍ଯ୍ୟକୁ ଏକ ଠିକା ସଂସ୍ଥାକୁ ଦିଆଯାଇଛି। ତେବେ ସମୟସୀମା ଅତିକ୍ରାନ୍ତ ହୋଇଯାଇଥିଲେ ହେଁ ଠିକା ସଂସ୍ଥା ପକ୍ଷରୁ କାହିଁକି କାର୍ଯ୍ୟ ଆରମ୍ଭ କରାଯାଇ ନାହିଁ ଏଥିପ୍ରତି ଜନସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଜିଲା ଖଣିଜ ପାଣ୍ଠିରେ ହଜାର ହଜାର କୋଟି ଟଙ୍କା ଥାଇ ମଧ୍ୟ ଯୋଡ଼ାବ୍ଲକର ତିନିଧାରିଆ, ମୂର୍ଗାମହାଦେବ, ହାଣ୍ଡିଭଙ୍ଗା, ଗୁରୁବେଡ଼ା ଭଳି ଅନେକ ପର୍ଯ୍ୟଟନସ୍ଥଳୀ ଅବହେଳିତ ହୋଇପଡ଼ିଛି। ଏସମ୍ପର୍କରେ ଆର୍ଡ଼ି ବିଭାଗର ଯନ୍ତ୍ରୀ କରୁଣାକର ନନ୍ଦ କହିଛନ୍ତି, ଏହି ରାସ୍ତାରେ ରିଜର୍ଭ ଜଙ୍ଗଲ, ମେଗା ଜଳଯୋଗାଣ ପାଇପ ଲାଇନ, ଓଡ଼ିଶା ଖଣି ନିଗମ ଗେଟ ପ୍ରଭୃତି ରହିଥିବାରୁ ରାସ୍ତା ସମ୍ପ୍ରସାରଣ ହୋଇପାରି ନାହିଁ। ଏଣୁ ଏହି ରାସ୍ତାର ପୁନଃ ଏଷ୍ଟିମେଟ କରାଯାଇ ଅନୁମୋଦନ ମିଳିଲେ କାର୍ଯ୍ୟ ଆରମ୍ଭ କରାଯିବ।