ଖୋର୍ଦ୍ଧା ଅଫିସ,୧୦ା୪: ସୋମବାର ସକାଳେ ଖୋର୍ଦ୍ଧା ଟାଉନ ଥାନା ପାନବରଜ ଗାଁରେ ଏକ ଦୁଃଖଦ ଘଟଣା ଘଟିଛି। ଫୁଲ ତୋଳିବାକୁ ଯାଇ ଜଣେ ମହିଳାଙ୍କୁ ହାତୀ ଦଳି ଦେବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଛି। ମୃତ ମହିଳାଙ୍କ ନାମ କିରଣବାଳା ମାନ୍ଧାତା(୫୭)।
ସୂଚନାଯୋଗ୍ୟ, କିରଣବାଳା ଆଜି ସକାଳେ ଅନ୍ୟ ଜଣେ ମହିଳାଙ୍କ ସହିତ ଫୁଲ ତୋଳିବାକୁ ଯାଇଥିଲେ। ଉଭୟ ରାସ୍ତାରେ ଯାଉଥିବା ବେଳେ ହଠାତ୍ ପାନବରଜ ଖେଳ ପଡ଼ିଆ ନିକଟରେ ଏକ ହାତୀ ସେମାନଙ୍କ ସାମ୍ନାକୁ ମାଡ଼ିଆସିଥିଲା। କିରଣବାଳାଙ୍କୁ ହାତୀଟି ତାଙ୍କୁ କଚାଡ଼ି ତା’ରେ ଦଳି ଦେଇଥିଲା। ଅନ୍ୟ ମହିଳା ମଧ୍ୟ ଗୁରୁତର ହୋଇଛନ୍ତି। ତାଙ୍କ ନାଁ ରମା ବେହେରା(୫୫)। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ ଖୋର୍ଦ୍ଧା ଜିଲା ମୁଖ୍ୟ ଚିକିସାଳୟରେ ଭର୍ତ୍ତି କରିଛନ୍ତି। ଅନ୍ୟପକ୍ଷରେ ମୃତା ଓ ଆହତ ପରିବାରଙ୍କୁ କ୍ଷତିପୂରଣ, ହାତୀ ନିୟନ୍ତ୍ରଣ ଦାବିରେ ଗ୍ରାମବାସୀ ପାନବରଜ ରାସ୍ତାରେ ପଥର ପକାଇ ରାସ୍ତାରୋକୋ କରିଛନ୍ତି।
ଖବରପାଇ ଖୋର୍ଦ୍ଧା ଆଦର୍ଶ ଥାନା ପୋଲିସ ଏବଂ ଖୋର୍ଦ୍ଧା ବନାଞ୍ଚଳ ଅଧିକାରୀ ଜୟକୃଷ୍ଣ ପଣ୍ଡା ଟିମ୍ ସହ ପହଞ୍ଚି ତଦନ୍ତ କରିଛନ୍ତି। ବନ ଅଧିକାରୀ ପଣ୍ଡାଙ୍କ ସୂଚନା ମୁତାବକ ଗତକାଲି ରାତିରେ ଦନ୍ତା ଚନ୍ଦକା ପଟୁ ଖସି ଟାଙ୍ଗୀଆପଡ଼ା ଜଙ୍ଗଲ ଦେଇ ଯିବା ବେଳେ ଜଣଙ୍କୁ ଆକ୍ରମଣ କରିଛି। ସେଠାରୁ ପାନବରଜ ଦେଇ ଜରିପୁଟ ଜଙ୍ଗଲକୁ ଯାଇଛି। ପାନବରଜ ଖେଳପଡିଆ ରେ କିରଣବାଳାଙ୍କୁ ଦଳି ଦେଇଥିବା ବେଳେ ଅନ୍ୟ ଜଣଙ୍କୁ ଆହତ କରିଛି। ପୋଲିସ ମୃତଦେହ ବ୍ୟବଚ୍ଛେଦ ପାଇଁ ଖୋର୍ଦ୍ଧା ମେଡିକାଲକୁ ପଠାଇଛି।