ଭୁବନ, ୩୦।୧୧(ଡି.ଏନ୍.ଏ.): ଏସିଆ ମହାଦେଶର ସର୍ବବୃହତ୍ ଗ୍ରାମ ତଥା ଢେଙ୍କାନାଳ ଜିଲାର ଅନ୍ୟତମ ବାଣିଜି୍ୟକ ପେଣ୍ଠସ୍ଥଳୀ ଭୁବନର ସାମଗ୍ରିକ ବିକାଶ ହେବ। ଜନସଂଖ୍ୟା ବୃଦ୍ଧି ଯୋଗୁ ସଙ୍କୁଚିତ ହୋଇପଡୁଥିବା ସହରାଞ୍ଚଳର ଉନ୍ନୟନ କାର୍ଯ୍ୟକୁ ତ୍ୱରାନ୍ବିତ କରିବାକୁ ଏନ୍ଏସି ପ୍ରଶାସନ ପକ୍ଷରୁ ରୋଡ୍ମ୍ୟାପ୍ ପ୍ରସ୍ତୁତ କରାଯାଇଛି। ମଙ୍ଗଳବାର ନଗରପାଳ ଶୁଭେନ୍ଦୁ କୁମାର ସାହୁଙ୍କ ତତ୍ତ୍ୱାବଧାନରେ କାମାକ୍ଷାନଗର ଉପଜିଲାପାଳ ଜ୍ୟୋତିଶଙ୍କର ସାହୁ, ତହସିଲଦାର ରୋଜାଲିନ୍ ବେହେରା, ନିର୍ବାହୀ ଅଧିକାରୀ ଶ୍ୟାମସୁନ୍ଦର ସାହୁ, ଜନସ୍ବାସ୍ଥ୍ୟ ବିଭାଗ ସହକାରୀ ଯନ୍ତ୍ରୀ ଏଚ୍.କେ. ସାହୁ, କନିଷ୍ଠ ଯନ୍ତ୍ରୀ ସୋନାଲି ନାୟକ, ରାଜସ୍ବ ନିରୀକ୍ଷକ ଅରବିନ୍ଦ ସାହୁ, କାଉନ୍ସିଲର ପପୁ କୁମାର ସାହୁ, ସାମାଜିକ କର୍ମୀ ନରେନ୍ଦ୍ର ସାହୁ, ଅଜୟ ସେଠୀ ପ୍ରମୁଖ ବିଭିନ୍ନ ଅଞ୍ଚଳ ପରିଦର୍ଶନ କରି ଉନ୍ନୟନ ପ୍ରକଳ୍ପ ଲାଗି ଜମି ଚିହ୍ନଟ କରିଛନ୍ତି।
ଭୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ଭୁବନ, ଗଁଦିଆ ବ୍ଲକ ସମେତ ପଡ଼ୋଶୀ ଯାଜପୁର ଜିଲାବାସୀ ନିର୍ଭରଶୀଳ। ଏଠାରେ ଦିନକୁ ଦିନ ରୋଗୀ ସଂଖ୍ୟା ବଢୁଥିବାବେଳେ ତଦନୁଯାୟୀ ଶଯ୍ୟା ଉପଲବ୍ଧ ନାହିଁ। ଆନୁଷଙ୍ଗିକ ଭିତ୍ତିଭୂମି ନ ଥିବାରୁ ସେମାନଙ୍କୁ ଉନ୍ନତମାନର ଚିକିତ୍ସା ସୁବିଧା ମିଳିପାରୁନାହିଁ। ତେଣୁ ଏନ୍ଏସିରେ ଏକ ନୂତନ ସ୍ବାସ୍ଥ୍ୟକେନ୍ଦ୍ର ନିର୍ମାଣ କରିବା ଜରୁରୀ ହୋଇପଡ଼ିଛି। ଏଥିଲାଗି କୋର୍ଟ ପଛ ପଟ ତଇଲାରେ ୧୦ ଏକର ଜମି ଚିହ୍ନଟ କରାଯାଇଛି। ସେହିପରି ସହରବାସୀଙ୍କୁ ବିଶୁଦ୍ଧ ପାନୀୟ ଜଳ ଯୋଗାଣ ଲାଗି ମଣିପୁରଠାରେ ଜଳ ବିଶୋଧନ କେନ୍ଦ୍ର ପ୍ରତିଷ୍ଠା କରାଯିବାକୁ ନିଷ୍ପତ୍ତି ହୋଇଛି। ସେହିପରି ବ୍ରାହ୍ମଣୀ ନଦୀ ଅବବାହିକାରେ ଇକୋ ଟୁରିଜମ୍କୁ ପ୍ରୋତ୍ସାହିତ କରିବା ଲାଗି ବାଉଁଶକଣ ଆମ୍ବମାଳିଆ ଧୋଡ଼ାଠାରେ ଏକ ପ୍ରକଳ୍ପ ଇକୋ ଟୁରିଜମ୍ ସ୍ପଷ୍ଟ ନିର୍ମାଣ କରାଯିବ। ସହରବାସୀଙ୍କ ଦୈନନ୍ଦିନ ବ୍ୟବହାରରେ ଆସୁଥିବା ଚିନ୍ନରା ପୋଖରୀକୁ ଆଦର୍ଶ ଜଳାଶୟରେ ପରିଣତ କରାଯିବ। ଏଥିଲାଗି ୮୨ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି ଅଟକଳ କରାଯାଇଛି। ଅଧିକାରୀମାନେ ପୋଖରୀ ପରିଦର୍ଶନ କରି ଏହାର ଯେଭଳି ବିକାଶ ହୋଇପାରିବ ସେ ନେଇ ଆଲୋଚନା କରିଛନ୍ତି।
ଏହାକୁ ବାଦ୍ଦେଲେ ବୁଦ୍ଧେଶ୍ୱର ଶୈବପୀଠ ନିକଟ ନିର୍ମାଣାଧୀନ ଷ୍ଟାଡିୟମ ପାଖରେ ଏକ ପାର୍କ ନିର୍ମାଣ ପାଇଁ ଜମି ଚିହ୍ନଟ କରାଯାଇଛି। ସହରର ବିଭିନ୍ନ ସ୍ଥାନରେ ସରକାରୀ ଜମି ଜବରଦଖଲରେ ରହିଛି। ସେସବୁ ସ୍ଥାନରୁ ଜବରଦଖଲ ଉଚ୍ଛେଦ କରି ଏନ୍ଏସିକୁ ହସ୍ତାନ୍ତର କରାଗଲେ ବିଭିନ୍ନ ପ୍ରକଳ୍ପ ନିର୍ମାଣ କରିବା ଲାଗି ସୁବିଧା ହେବ। ୪ନଂ. ଓ୍ବାର୍ଡରେ ଥିବା ରାଶି ପଡ଼ିଆକୁ ଏନ୍ଏସି କର୍ତ୍ତୃପକ୍ଷଙ୍କୁ ହସ୍ତାନ୍ତର କରିବାକୁ ପ୍ରସ୍ତାବ ଦିଆଯାଇଛି। ଭୁବନବାସୀଙ୍କ ବହୁ ପ୍ରତୀକ୍ଷିତ ପ୍ରକଳ୍ପଗୁଡ଼ିକର କାର୍ଯ୍ୟ ଯଥାସମ୍ଭବ ତ୍ୱରାନ୍ବିତ କରି ନିର୍ଦ୍ଧାରିତ ସମୟରେ ଶେଷ କରିବା ଲାଗି ଉପଜିଲାପାଳ ନିର୍ବାହୀ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି।