ନାଉଗାଁ ,୨୩ା୯ (ସୁଧା ବେହୁରା): ସରକାରଙ୍କ ବସୁଧା ଯୋଜନାରେ ନାଉଗାଁ ବ୍ଲକରେ ପ୍ରକଳ୍ପ ନିର୍ମାଣଠାରୁ ଆରମ୍ଭ କରି ପାଇପ ବିଛା କାର୍ଯ୍ୟ ଜାରି ରହିଛି। ପ୍ରତ୍ୟେକ ଗୃହକୁ ପାନୀୟ ଜଳ ଯୋଗାଇବା ପାଇଁ ପାଇପ ଲାଇନ ସଂଯୋଗ କରାଯାଉଛି। ଏହି ପାଇପ ଲାଇନ କାମ ସ୍ଥାନୀୟ ଲୋକ ଓ ଯାତ୍ରୀମାନଙ୍କ ପାଇଁ କାଳ ସାଜିଛି। ପାଇପ ଲାଇନ ବିଛା ଯୋଗୁ ପିଲାମାନଙ୍କର ବିଦ୍ୟାଳୟକୁ ଯିବା ବନ୍ଦ ହେଉଥିବା ବେଳେ ପ୍ରତ୍ୟେହ କେହି ନା କେହି ଦୁର୍ଘଟଣାର ଶିକାର ହେଉଥିବା ଦେଖିବାକୁ ମିଳିଛି। ଠିକାଦାର ମନଇଚ୍ଛା ରାସ୍ତା ଖୋଳି ମାଟି ପକାଉଥିବା ଦେଖିବାକୁ ମିଳିଛି।
ସୂଚନାଯୋଗ୍ୟ, ବ୍ଲକ ଅଧୀନ ତିରୁଣା ପଞ୍ଚାୟତରେ ନାଉଗାଁ-ଡାବରକୁ ସଂଯୋଗ କରୁଥିବା ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନା ରାସ୍ତା ପାର୍ଶ୍ୱର ଦହିପାଳଠାରୁ ଅରିଓଦା ପର୍ଯ୍ୟନ୍ତ ମାଟି ତଳେ ପାଇପ ଲାଇନ ଯିବା ପାଇଁ ରାସ୍ତା ଖୋଳା ଚାଲିଛି। ଠିକାଦାର ଜେସିବି ମେଶିନ ମାଧ୍ୟମରେ ମାଟି ଖୋଳି ପାଇପ ବିଛାଇ ପୁନର୍ବାର ମାଟିକୁ ପୋତୁଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ରାସ୍ତାରୁ ମାଟି ଭଲ ଭାବେ ସଫା କରୁ ନ ଥିବାରୁ ଝିପି ଝିପି ବର୍ଷାରେ ମାଟି ଭିଜି କାଦୁଅ ହେଉଛି। ଫଳରେ ଉକ୍ତ ରାସ୍ତାରେ ଗାଡ଼ି ଯିବା ଯୋଗୁ ରାସ୍ତା ସାରା କାଦୁଅରେ ଭର୍ତ୍ତି ହୋଇଯାଉଛି। ଏହି ରାସ୍ତାରେ ୨ ଚକିଆ ଯାନ, ସାଇକଲେ ଆଦି ଯିବା କଷ୍ଟ ସାଧ୍ୟ ହୋଇପଡୁଛି। ଆଦର୍ଶ ବିଦ୍ୟାଳୟକୁ ଏହି ରାସ୍ତା ଦେଇ ଯିବାକୁ ପଡୁଥିବାରୁ ଅନେକ ଛୋଟ ପିଲା ସାଇକେଲରୁ ପଡୁଛନ୍ତି। ବାଇକ୍ ଆରୋହୀ ମଧ୍ୟ ଦୁର୍ଘଟଣାର ଶିକାର ହେଉଛନ୍ତି। ବର୍ଷା ଦିନେ ରାସ୍ତା ଖୋଳି କାମ କରାଯାଉଥିବା ବେଳେ ତଦାରଖ ଦାୟିତ୍ୱରେ ଥିବା ଗ୍ରାମ୍ୟ ଜଳ ପରିମଳ ବିଭାଗର ଅଧିକାରୀ କିପରି କୌଣସି ପଦକ୍ଷେପ ଗ୍ରହଣ କରୁନାହାନ୍ତି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଅପରପକ୍ଷେ କାମ କରୁଥିବା ଠିକାଦାର ବିଭାଗ ପକ୍ଷରୁ ମାସେ ମଧ୍ୟରେ କାର୍ଯ୍ୟ କରିବାକୁ ନିର୍ଦ୍ଦେଶ ଦିଆଯାଇଥିଲା। ପାଇପ ଟେଷ୍ଟିଂ ହୋଇ ଆସିବା ପରେ ଆମେ କାର୍ଯ୍ୟ ଆରମ୍ଭ କରିଛୁ ବୋଲି ସଫେଇ ଦେଇଛନ୍ତି। ଏ ସମ୍ପର୍କରେ ଗ୍ରାମ୍ୟ ପାନୀୟ ଜଳ ପରିମଳ ବିଭାଗର ଯନ୍ତ୍ରୀ ରଶ୍ମି ରଞ୍ଜନ ଦାସଙ୍କୁ ପଚାରିବାରେ ବର୍ଷାଦିନେ କାମ ବନ୍ଦ କରିବାକୁ ଠିକାଦାରଙ୍କୁ ନିର୍ଦ୍ଦେଶ ଦିଆଯାଇଛି। କରାଯାଉଥିବା କାମକୁ ବନ୍ଦ ରଖାଯାଇଛି। ଯଥାଶୀଘ୍ର ରାସ୍ତା ସଫା କରିବା ପାଇଁ ନିର୍ଦ୍ଦେଶ ଦିଆଯାଇଛି ବୋଲି ସେ କହିଛନ୍ତି।