ମୁନିଗୁଡ଼ା, ୨୮।୯(ଡି.ଏନ୍.ଏ.): ରାୟଗଡ଼ା ଜିଲାର ବ୍ୟସ୍ତବହୁଳ ବ୍ୟବସାୟ ନଗରୀ ମୁନିଗୁଡ଼ା ସହରରେ ଦୁର୍ଗାପୂଜା ପାଇଁ ମା’ଙ୍କ ମୃଣ୍ମୟୀ ମୂର୍ତ୍ତି ଓ ମଣ୍ଡପ ସଜାଚାଲିଛି। କରୋନା ଯୋଗୁ ବନ୍ଦ ହୋଇଥିବା ମାଆଙ୍କର ଏହି ସାମୂହିକ ପୂଜାବିଧି ବ୍ୟବସ୍ଥା ଚଳିତ ବର୍ଷ ନୂତନ ଉତ୍ସାହ ଆଉ ଆଧ୍ୟାତ୍ମିକ ଆବେଗର ସହିତ ଆରମ୍ଭ ହୋଇଛି। କିନ୍ତୁ ମୁନିଗୁଡାର ଆଭ୍ୟନ୍ତରୀଣ ପରିବେଶ ଅତ୍ୟନ୍ତ ଚିନ୍ତାଜନକ ହୋଇପଡିଛି। ମୁନିଗୁଡା ମୁଖ୍ୟ ବଜାର ମଧ୍ୟସ୍ଥ ଗମନାଗମନ ପରିସ୍ଥିତି ଉଦ୍ବେଗଜନକ ଥିବାବେଳେ କୁଢ଼କୁଢ଼ ଆବର୍ଜନା ବିଭିନ୍ନ ସ୍ଥାନରେ ପଡ଼ିରହିଛି। ଡ୍ରେନ୍ ସବୁ ଜାମ୍ ହୋଇ ରହିଛି। ପଞ୍ଚାୟତ ନିର୍ବାଚନର ୫ ମାସ ପୂର୍ବରୁ ସାହିବସ୍ତିରେ ବନ୍ଦ ହୋଇ ପଡିଥିବା ଆଲୋକୀକରଣ ବ୍ୟବସ୍ଥା ଏ ପର୍ଯ୍ୟନ୍ତ ସୁଧୁରିଲା ନାହିଁ।
ପୂର୍ବେ ମାଆ ଦୁର୍ଗାଙ୍କ ଆଗମନ ପୂର୍ବରୁ ମୁନିଗୁଡ଼ାର ସାହିବସ୍ତି ଓ ମୁଖ୍ୟ ରାସ୍ତାଘାଟ ପରିଷ୍କାର ହେଉଥିଲା। ମୁନିଗୁଡା ଦଶହରା ଦେଖିବାକୁ ସୁଦୂର କନ୍ଧମାଳ,ଫୁଲବାଣୀ,କଳାହାଣ୍ଡି ଜିଲା ସହିତ ରାୟଗଡ଼ାର ବିଭିନ୍ନ ବ୍ଲକରୁ ଶ୍ରଦ୍ଧାଳୁମାନେ ଆସିଥାନ୍ତି। ଏଣୁ ଚଳିତ ବର୍ଷ ଭିଡ଼କୁ ଦୃଷ୍ଟିରେ ରଖି ମୁନିଗୁଡା ଅଞ୍ଚଳର ସ୍ବଚ୍ଛତା, ଦର୍ଶନାର୍ଥୀଙ୍କ ସୁରକ୍ଷା, କିଛିଦିନ ପାଇଁ ବସ୍ ରହିବାକୁ ଅନ୍ୟତ୍ର ଅସ୍ଥାୟୀ ବ୍ୟବସ୍ଥା, ସାହିବସ୍ତିରେ ପୁନଃ ଆଲୋକୀକରଣ ବ୍ୟବସ୍ଥା, ମୁଖ୍ୟ ସଡ଼କରେ ଗମନାଗମନ ସୁଗମ ବ୍ୟବସ୍ଥା, ଇଲେକ୍ଟ୍ରି ଖୁଣ୍ଟିରେ ଅଚଳ ହୋଇଥିବା ବଲ୍ବ ବଦଳାଇବା, ରାସ୍ତାର ଉଭୟ ପାର୍ଶ୍ୱରେ ବ୍ଲିଚିଂ ପକାଇବା, ଗୋରୁଙ୍କୁ ରାସ୍ତାକୁ ଆସିବାକୁ ରୋକ ଲଗାଇବା, ଦୀର୍ଘଦିନ ପାର୍କିଂସ୍ଥଳ ଆବୋରିଥିବା ବଡ଼ ଗାଡ଼ଗୁଡ଼ିକୁ ହଟାଇବା, ବର୍ଷାହେଲେ ଜଳ ନିଷ୍କାସନ କରିବା ଓ ମୁନିଗୁଡ଼ା ମୁଖ୍ୟ ସଡ଼କରେ ବିଭିନ୍ନ ଯାନବାହନ ଯାତାୟାତ ସମୟରେ ପ୍ରବଳ ଧୂଳି ଉଠୁଥିବା କାରଣରୁ ପାଣି ସ୍ପ୍ରେ କରିବାକୁ ଦାବି ହୋଇଛି। ରାତ୍ରିକାଳୀନ ପାଟ୍ରୋଲିଂ ଏବଂ ଛକ ଗୁଡ଼ିକରେ ଟ୍ରାଫିକ ନିୟନ୍ତ୍ରଣ କରିବା ଜରୁରୀ ହୋଇପଡିଛି। ଏଣୁ ବିଭାଗୀୟ ଅଧିକାରୀ ଏହିସବୁ ସମସ୍ୟା ପ୍ରତି ଦୃଷ୍ଟିଦେଲେ ପୂଜା ସମୟରେ ଅନେକ ସମସ୍ୟାର ସମାଧାନ ହୋଇପାରନ୍ତା ବୋଲି ବୁଦ୍ଧିଜୀବୀ ଓ ମୁନିଗୁଡ଼ା ପ୍ରେସ୍ କ୍ଲବ, ବିକାଶ ପରିଷଦ,ବଜରଙ୍ଗ ଦଳ,ବଣିକ ସଂଘ ଓ ଅନେକ ସାମାଜିକ, ସାଂସ୍କୃତିକ ଅନୁଷ୍ଠାନ ସଦସ୍ୟ ଅନୁରୋଧ କରିଛନ୍ତି।
