ଡେରାବିଶ, ୧୧ା୪(ବେବର୍ତ୍ତା ଅଜୟ ଦାସ)ଗ୍ରୀଷ୍ମର ପ୍ରକୋପ ଧୀରେ ଧୀରେ ବଢ଼ିବାରେ ଲାଗିଛି। ଏଥିପାଇଁ ସରକାରଙ୍କ ପକ୍ଷରୁ ବସୁଧା ଯୋଜନାରେ ପ୍ରତି ଘରକୁ ପାଇପ୍ ଯୋଗେ ପାନୀୟ ଜଳ ଯୋଗାଣ କରାଯାଉଛି। ହେଲେ ବେସରକାରୀ ମୋବାଇଲ ସଂସ୍ଥାର ଦାୟିତ୍ୱହୀନତା ଓ ବେପରୁଆ ମନୋଭାବ ଯୋଗୁ ୫ଟି ୱାର୍ଡର ୨ ହଜାରରୁ ଊର୍ଦ୍ଧ୍ୱ ଜନସାଧାରଣ ପାନୀୟ ଜଳ ପାଇବାରୁ ବଞ୍ଚତ୍ତ ହୋଇଛନ୍ତି। ଏଭଳି ଘଟଣା ଘଟିଛି ଡେରାବିଶ ବ୍ଲକ ଅନ୍ତର୍ଗତ ମୁକୁନ୍ଦପୁର ପଞ୍ଚାୟତରେ।
ମୁକୁନ୍ଦପୁର ପଞ୍ଚାୟତ କାର୍ଯ୍ୟାଳୟ ନିକଟରେ ଏକ ବୋରିଂ ଓ ଓଭରହେଡ୍ ଟାଙ୍କି କରାଯାଇ ମୁକୁନ୍ଦପୁର ଗଁାର ୩ଟି, ପାଣିଓଳା ଗଁାର ଗୋଟିଏ ଓ ନିକଟସ୍ଥ ଯଅଁରା ବାରିମୂଳ ପଞ୍ଚାୟତର ଅର୍ତ୍ତାମୂଳ ଗଁାର ଗୋଟିଏ ୱାର୍ଡର ଅଧିବାସୀଙ୍କୁ ପାନୀୟ ଜଳ ଯୋଗାଇ ଦିଆଯାଉଥିଲା। ହେଲେ ସୋମବାର ରାତିରେ ଚାନ୍ଦୋଳଠାରୁ ଅର୍ତ୍ତାମୂଳ ପର୍ଯ୍ୟନ୍ତ୍ର ଯାଇଥିବା ରାସ୍ତାର ପାଣିଓଳା ଅଭିରାମ ମଠ ନିକଟରେ ଏକ ବେସରକାରୀ ମୋବାଇଲ ସଂସ୍ଥାର କର୍ମଚାରୀ ସେମାନଙ୍କ କେବୁଲ ମାଟିତଳେ ବିଛାଇବା ପାଇଁ ରାସ୍ତାକୁ ଜେସିବି ଦ୍ୱାରା ତାଡ଼ିଥିଲେ। ଫଳରେ ପୂର୍ବରୁ ମାଟିତଳେ ଯାଇଥିବା ମୁଖ୍ୟ ପାଣି ପାଇପ୍ଟି ନଷ୍ଟ ହୋଇଯାଇଥିଲା। କର୍ମଚାରୀମାନେ ରାତାରାତି କେବୁଲ୍ ବିଛାଇ ଖାଲକୁ ପୋତି ଦେଇଥିବା ବେଳେ ମଙ୍ଗଳବାର ସକାଳୁ ପମ୍ପ୍ ଡ୍ରାଇଭର ମୋଟର ଚଳାଇବା ବେଳେ ଏହିଠାରେ ଫଟା ପାଇପ୍ ବାଟ ଦେଇ ରାସ୍ତା ଉପରକୁ ପାଣି ବାହାରିଥିଲା। ଫଳରେ ଡ୍ରାଇଭର ଜଣଙ୍କ ବାଧ୍ୟହୋଇ ପାଣି ଯୋଗାଣ ବନ୍ଦ କରିଦେଇଥିଲେ। ତେବେ ଜଳକଷ୍ଟ ସମୟରେ ପାଣି ଯୋଗାଣ ବନ୍ଦ ହୋଇଯିବାରୁ ଏହା ଉପରେ ନିର୍ଭର କରୁଥିବା ୫ଟି ୱାର୍ଡର ୨ହଜାରରୁ ଊର୍ଦ୍ଧ୍ୱ ଜନସାଧାରଣ ନାହିଁ ନ ଥିବା ହଇରାଣ ହୋଇଥିଲେ। ତେବେ ଏଠାରେ ପ୍ରଶ୍ନ ଉଠୁଛି, ବେସରକାରୀ ମୋବାଇଲ ସଂସ୍ଥା ରାସ୍ତାକଡ଼ରେ କେବୁଲ ବିଛାଇବା ପୂର୍ବରୁ ଗ୍ରାମ୍ୟ ଉନ୍ନୟନ ବିଭାଗ, ପାନୀୟ ଜଳଯୋଗାଣ ବିଭାଗ ସର୍ବୋପରି ଜଳସେଚନ ବିଭାଗର ଅନୁମତି ନ ନେଇ କିପରି କାର୍ଯ୍ୟ କଲା। କାରଣ ଜେସିବି ଦ୍ୱାରା ତଡ଼ାଯାଇଥିବା ସ୍ଥାନଟି ଏକ ମୁଖ୍ୟରାସ୍ତା ହୋଇଥିବା ବେଳେ ଏହି ବାଟ ଦେଇ ସ୍ଥାନୀୟ ଅଞ୍ଚଳ ବ୍ୟତୀତ ଲୁଣାନଦୀ ଅପରପାର୍ଶ୍ୱକୁ ହଜାର ହଜାର ଲୋକ ଯାତାୟାତ କରିଥାନ୍ତି। ଏଥିସହ ପ୍ରତିଦିନ ଏହି ରାସ୍ତା ଦେଇ ଲକ୍ଷ୍ମୀ ବସ୍ ଓ ଅତ୍ୟାବଶ୍ୟକ ଜିନିଷ ପରିବହନ କରୁଥିବା ଶତାଧିକ ଯାନବାହନ ଚଳାଚଳ କରିଥାଏ। ରାସ୍ତାଟି ୨ ଫୁଟ ଓସାର ଓ ୩୦ ଫୁଟରୁ ଊର୍ଦ୍ଧ୍ୱ ଲମ୍ବର ତଡ଼ା ହୋଇଥିବା ବେଳେ ଏହା ଦବିଯାଇ ଯାନବାହନ ଚଳାଚଳରେ ବାଧା ସୃଷ୍ଟି କରୁଛି। ଏଥିସହ ବେସରକାରୀ କେବୁଲ ସଂସ୍ଥା ଜଳସେଚନ ବିଭାଗର ବିନା ଅନୁମତିରେ କେନ୍ଦ୍ରାପଡ଼ା ମୁଖ୍ୟ କେନାଲ ୧୨ ନଂ. ଶାଖା ନାଳର ଶଯ୍ୟାକୁ ମଧ୍ୟ ଏହି ସ୍ଥାନରେ ୧୦ ଫୁଟରୁ ଅଧିକ ଗଭୀର କରି ତାଡ଼ିଦେଇଛି, ଯାହାଫଳରେ ଆସନ୍ତା ଖରିଫ୍ ଋତୁର ପାଣି ଆସିଲେ ଦୁର୍ବଳ ହୋଇପଡ଼ିଥିବା କେନାଲବନ୍ଧ ଭାଙ୍ଗିଯିବାର ମଧ୍ୟ ଆଶଙ୍କା ଦେଖାଦେଇଛି। ଏ ସମ୍ପର୍କରେ ଗ୍ରାମ୍ୟ ପାନୀୟ ଜଳଯୋଗାଣ ବିଭାଗ ଯନ୍ତ୍ରୀ ବିଭୁଦତ୍ତ ଦାସଙ୍କୁ ପଚାରିବାରେ ଏହି ବେସରକାରୀ ମୋବାଇଲ ସଂସ୍ଥା ତାଙ୍କ ଅଜ୍ଞାତରେ ସୋମବାର ବିଳମ୍ବିତ ରାତିରେ ରାସ୍ତା ଖୋଳି ପାଣି ପାଇପ୍ ଫଟାଇ ଦେଇଛି। ବୁଧବାର ଯୁଦ୍ଧକାଳୀନ ଭିତ୍ତିରେ ପାଇପ୍ ମରାମତି କରାଯାଇ ଗ୍ରାମକୁ ପାନୀୟଜଳ ଯୋଗାଇ ଦିଆଯାଇଛି। ଏଥିସହ ଏହି ମୋବାଇଲ ସଂସ୍ଥା ଜଳସେଚନ ବିଭାଗ ଓ ଗ୍ରାମ୍ୟ ଉନ୍ନୟନ ବିଭାଗ ଅଗୋଚରରେ ନାଳ ଶଯ୍ୟା ଓ ରାସ୍ତାକୁ ତାଡ଼ିଛି। ଉପରୋକ୍ତ ସମସ୍ତ ବିଭାଗ ପକ୍ଷରୁ ଏହି ବେସରକାରୀ ମୋବାଇଲ ସଂସ୍ଥା ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନେବାକୁ ଅଞ୍ଚଳବାସୀ ଦାବି କରିଛନ୍ତି।