କଣାସ,୯।୭(ସ୍ବ.ପ୍ର.)- କଣାସ ବ୍ଲକ ଅନ୍ତର୍ଗତ ଦେଇପୁର ପଞ୍ଚାୟତର କାଙ୍କପୁର ଗ୍ରାମର ୧ନଂ ଅଙ୍ଗନଓ୍ବାଡି କେନ୍ଦ୍ରର କର୍ମୀ ବାସନ୍ତୀ ସାମଲଙ୍କ ସୋମବାର କ୍ୟାପିଟାଲ ହସ୍ପିଟାଲରେ ମୃତ୍ୟୁ ହୋଇଥିଲା। ଗୁରୁବାର ମୃତଦେହ ଗ୍ରାମକୁ ଆସିଥିବାବେଳେ ୩୦୦ରୁ ଊର୍ଦ୍ଧ୍ୱ ଅଙ୍ଗନଓ୍ବାଡି କର୍ମୀ ବାସନ୍ତୀଙ୍କୁ କୋଭିଡ୍ ଯୋଦ୍ଧା ଭାବେ ଘୋଷଣା କରିବା ଦାବିରେ ତାଙ୍କ ମୃତଦେହକୁ ସାମନ୍ତରାପୁରଠାରେ ରାସ୍ତା ଉପରେ ରଖି ରାସ୍ତାରୋକୋ କରିଥିଲେ। ଖବରପାଇ କଣାସ ତହସିଲଦାର ଉମାକାନ୍ତ ରାଉତ, ଗଡିଶାଗୋଦା ଥାନା ଆଇଆଇସି ଦେବାଶିଷ ମିଶ୍ର ପହଞ୍ଚତ୍ ବୁଝାଶୁଝା କରିଥିଲେ ମଧ୍ୟ ସେମାନେ ଶୁଣି ନ ଥିଲେ। ପରେ ବିଡିଓ ରବୀନ୍ଦ୍ର କୁମାର ପ୍ରଧାନ ଆସି ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା। ବାସନ୍ତୀ ଗ୍ରାମରେ କରୋନା ପରିଚାଳିତ କାର୍ଯ୍ୟରେ ନିୟୋଜିତ ଥିଲେ। ୬ଦିନ ତଳେ ତାଙ୍କ ଦେହ ଅସୁସ୍ଥ ହୋଇ ଗୁରୁତର ହେବାରୁ କ୍ୟାପିଟାଲ ହସ୍ପିଟାଲ ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା। ଏହାପୂର୍ବରୁ ତାଙ୍କର ସ୍ବାବ ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା। ବୁଧବାର ରିପୋର୍ଟ ନେଗେଟିଭ ଆସିବା ପରେ ଗୁରୁବାର ମୃତଦେହକୁ ଗ୍ରାମକୁ ପଠାଇ ଦିଆଯାଇଥିଲା। ଏହି କଥା ଅନ୍ୟ ଅଙ୍ଗନଓ୍ବାଡି କର୍ମୀମାନେ ଜାଣିବାପରେ ବାସନ୍ତୀଙ୍କୁ କୋଭିଡ ଯୋଦ୍ଧା ଘୋଷଣା ଦାବିରେ ପୂର୍ବାହ୍ନ ୧୦ଟାରୁ ରାସ୍ତାରୋକୋ କରିଥିଲେ। ତହସିଲଦାର ଓ ଆଇଆଇସି ବୁଝାଇବା ପରେ ମଧ୍ୟ ନ ମାନି ବସିରହିବାରୁ ଯାତାୟାତରେ ବାଧାପ୍ରାପ୍ତ ହୋଇଥିଲା। ଦୀର୍ଘ ୬ଘଣ୍ଟା ପରେ ବିଡିଓ ଘଟଣାସ୍ଥଳକୁ ଆସି ସମସ୍ତଙ୍କୁ ବୁଝାଇ ବାସନ୍ତୀଙ୍କ ମୃତ୍ୟୁ କରୋନାରେ ହୋଇ ନ ଥିବାରୁ ସରକାରୀ ଘୋଷଣା କରାଯାଇପାରିବ ନାହିଁ ବୋଲି କହିଥିଲେ। ଏହାସହ ରେଡକ୍ରସ୍ ପାଣ୍ଠିରୁ ୨୫ହଜାର ଟଙ୍କା ସହାୟତା ପ୍ରଦାନ କରିଥିଲେ। କିନ୍ତୁ ବାସନ୍ତୀ ଗରିବ ପରିବାରର ହୋଇଥିବାରୁ ସରକାରୀ ସହାୟତା ପାଇଁ ଅଙ୍ଗନଓ୍ବାଡି କର୍ମୀମାନେ ବିଡିଓଙ୍କୁ କହିଥିଲେ। ଦାବି ସମ୍ପର୍କରେ ବିଡିଓ ଜିଲାପାଳଙ୍କୁ ଜଣାଇବି ବୋଲି କହିବା ପରେ ଧାରଣା ପ୍ରତ୍ୟାହୃତ ହୋଇଥିଲା।