ବ୍ରହ୍ମପୁର ଅଫିସ,୧୭ା୧୨: ପୁରୀ- ଗୁଣପୁର ଟ୍ରେନରେ ଏବେ ଲୁଟେରା ସକ୍ରିୟ ହୋଇଛନ୍ତି। ପୁଣି ପଇଡ଼ରେ ନିଶା ଦେଇ ୨ଯାତ୍ରୀଙ୍କୁ ଲୁଟିଛନ୍ତି। ୧୫ଦିନ ମଧ୍ୟରେ ସମାନ ଢଙ୍ଗରେ ଦୁଇଟି ଲୁଟ୍ ଘଟଣା ସାମନାକୁ ଆସିଥିବାରୁ ଲୋକେ ଉକ୍ତ ଟ୍ରେନରେ ଯାତ୍ରା କରିବାକୁ ସୁରକ୍ଷିତ ମଣୁନାହାନ୍ତି। ସେପଟେ ଲୁଟେରାମାନେ ଏହି ଟ୍ରେନକୁ ସୁରକ୍ଷିତ ଭାବି ସରକାରୀ ରେଲଓ୍ବେ ପୋଲିସ (ଜିଆର୍ପି) ଓ ରେଳ ସୁରକ୍ଷା ବଳ (ଆର୍ପିଏଫ)କୁ ଖୋଲା ଚାଲେଞ୍ଜ ଦେଇଛନ୍ତି।
ରାତିରେ ବ୍ରହ୍ମପୁର ରେଳଷ୍ଟେଶନର ୪ନଂ ପ୍ଲାଟଫର୍ମରୁ ରେଳବାଇ ପୋଲିସ ଅଚେତ ଅବସ୍ଥାରେ ୨ ଯାତ୍ରୀଙ୍କୁ ଉଦ୍ଧାର କରିଥିଲା। ସେମାନେ ହେଲେ ପୁରୀ, ତାଳବଣିଆ ଥାନା ଅନ୍ତର୍ଗତ ଜଗନ୍ନାଥ କଲୋନୀର ଦୀପକ କୁମାର ସାମନ୍ତରା(୫୦) ଓ ଆନ୍ଧ୍ରପ୍ରଦେଶ ଶ୍ରୀକାକୁଲମ ଜିଲା ନରସୀମାପେଟ୍ଟାର ଏସ. ଧର୍ମେଶ୍ୱର ରାଓ(୫୮)। କରାଟେ ମାଷ୍ଟର ଦୀପକ ଗୁରୁବାର ପୁରୀ- ଗୁଣପୁର ଟ୍ରେନ୍ରେ ବାଲୁଗାଁ ଯାଉଥିଲେ। ସାକ୍ଷୀଗୋପାଳ ନିକଟରେ ତାଙ୍କୁ କେହି ପଇଡ଼ ପିଇବାକୁ ଦେଇଥିଲେ। କିଛି ସମୟ ପରେ ସେ ଅଚେତ ହୋଇପଡ଼ିଥିଲେ। ଟ୍ରେନ ବାଲୁଗାଁ ଷ୍ଟେଶନ ଅତିକ୍ରମ କରି ବ୍ରହ୍ମପୁରରେ ପହଞ୍ଚିବାରେ ଦୀପକଙ୍କୁ ଅଚେତ ଅବସ୍ଥାରେ ଆର୍ପିଏଫ ଓହ୍ଲାଇଥିଲା। ସେହିପରି ଉକ୍ତ ଟ୍ରେନରେ ଫେରୁଥିବା ଧର୍ମେଶ୍ୱରଙ୍କୁ ମଧ୍ୟ ସାକ୍ଷୀଗୋପାଳ ଠାରେ କେହି ନିଶାଯୁକ୍ତ ପଇଡ଼ ପିଇବାକୁ ଦେଇଥିବାରୁ ସେ ଅଚେତ ହୋଇପଡିଥିଲେ। ତାଙ୍କୁ ଆରପିଏଫ ବ୍ରହ୍ମପୁର ରେଳଷ୍ଟେଶନରେ ଓଲ୍ଲାଇଥିଲା। ଜିଆରପି ଉଭୟଙ୍କୁ ବ୍ରହ୍ମପୁର ବଡ଼ ମେଡିକାଲରେ ଭର୍ତ୍ତି କରିଥିଲା। ଶୁକ୍ରବାର ସେମାନେ ସାମାନ୍ୟ ସୁସ୍ଥ ହୋଇଥିଲେ ମଧ୍ୟ ଚିକିତ୍ସାଧୀନ ରହିଛନ୍ତି। ଲୁଟେରା ଦୀପକଙ୍କ ବେକରୁ ସୁନା ଚେନ ଓ ତାଙ୍କ ଲାପଟପ ଏବଂ ଧର୍ମେଶ୍ୱରଙ୍କ ସୁନା ଚେନ, ମୋବାଇଲ ଫୋନ ଲୁଟି ନେଇଥିବା ପୋଲିସକୁ କହିଛନ୍ତି। ଟ୍ରେନରେ ଏଭଳି ଦୁଇଟି ଘଟଣା ପରେ ଜିଆରପିର ନିଦ ହଜିଯାଇଛି। ଲୁଟେରାଙ୍କୁ ଠାବ କରିବା ପାଇଁ ଦୁଇଟି ସ୍ବତନ୍ତ୍ର ଟିମ ଗଠନ କରାଯାଇଛି। ପ୍ରାଥମିକ ତଦନ୍ତରୁ ଟ୍ରେନରେ ଅଣଓଡ଼ିଆ ଲୁଟେରା ଗ୍ୟାଙ୍ଗ ଏହି କାଣ୍ଡ କରିଥିବା ସନ୍ଦେହ କରାଯାଉଛି। ପୋଲିସ ଟିମ୍ ଟ୍ରେନରୁ ଦୁଇଜଣ ଝାଡ଼଼ଖଣ୍ଡ ଯୁବକଙ୍କୁ କାବୁ କରି ସେମାନଙ୍କୁ ଜେରା କରୁଛି। ସେମାନଙ୍କ ବୟାନକୁ ଆଧାର କରି ଉକ୍ତ ଲୁଟେରା ଗ୍ୟାଙ୍ଗର ମୁଖିଆଙ୍କୁ ଧରିବା ପାଇଁ ବିଶାଖାପାଟଣାରେ ଅନ୍ୟ ଏକ ପୋଲିସ ଟିମ ଡେରା ପକାଇଛି। ଖୁବଶୀଘ୍ର ଉକ୍ତ ଲୁଟେରା ଗ୍ୟାଙ୍ଗକୁ ଧରାଯିବ ବୋଲି ରେଲ ବିଭାଗ ଡିଏସପି ଆଦିତ୍ୟ ସେଠୀ ସୂଚନା ଦେଇଛନ୍ତି।
ଗତ ୩୦ତାରିଖରେ ପୁରୀ-ଗୁଣପୁର ଟ୍ରେନରେ ବ୍ରହ୍ମପୁର ଆସୁଥିବା ବ୍ରହ୍ମପୁର-ଆଙ୍କୁଲି ଅଞ୍ଚଳର ଏକ ଦମ୍ପତିଙ୍କ ସମେତ ଅନ୍ୟ ଦୁଇଜଣଙ୍କୁ ସାକ୍ଷୀଗୋପାଳ ଠାରେ କେହି ପଇଡ଼ ପିଇବାକୁ ଦେଇଥିଲେ। ନିଶାଯୁକ୍ତ ପଇଡ଼ ପିଇ ସମସ୍ତେ ଚେତାଶୂନ୍ୟ ହୋଇଯିବାରୁ ସେମାନଙ୍କ ପାଖରୁ ଟଙ୍କା, ମୋବାଇଲ୍ ଫୋନ ସହ ଅନ୍ୟ ସାମଗ୍ରୀ ଲୁଟେରା ନେଇଯାଇଥିଲେ।