ବଡ଼ଗାଁ,୧୮ା୮(ଡି.ଏନ୍.ଏ.): ସୁନ୍ଦରଗଡ଼ ଜିଲା ବଡ଼ଗାଁ ଥାନା ଗଙ୍ଗାଜଳ ନିକଟ ସ୍କାନଷ୍ଟିଲ କାରଖାନା ସମ୍ମୁଖ ୧୦ନଂ. ରାଜ୍ୟ ରାଜପଥ ପାର୍ଶରେ ଥିବା ଏକ ଟାୟାର ମରାମତି ଦୋକାନୀଙ୍କୁ ବନ୍ଧୁକ ଓ ଛୁରି ଦେଖାଇ ଦୁର୍ବୃତ୍ତମାନେ ୨୦ହଜାର ଟଙ୍କା ଲୁଟ ନେଇଛନ୍ତି। ଏନେଇ ଦୋକାନୀ ଚନ୍ଦନ କୁମାର ଦାସ ଥାନାରେ ଏତଲା ଦେଇଛନ୍ତି। ଏତଲାକୁ ଭିତ୍ତି କରି ପୋଲିସ ଘଟଣାର ତଦନ୍ତ ଆରମ୍ଭ କରିଛି। ବିହାର ମାଥାଡିହି ଗ୍ରାମର ଚନ୍ଦନ କିଛିବର୍ଷ ହେଲା ଗଙ୍ଗାଜଳ ନିକଟରେ ଟାୟାର ମରାମତି ଦୋକାନ କରିବା ସହ ସେଠାରେ ରହୁଛନ୍ତି।
ବୁଧବାର ରାତିରେ ଚନ୍ଦନ ଓ ତାଙ୍କ ସାନ ଭାଇ ପାନାଲାଲ ରୋଷେଇ କରୁଥିବାବେଳେ ଏକ ଟାଟାସୁମୋ କାର ଦୋକାନ ସମ୍ମୁଖରେ ଅଟକିଥିଲା। ଦୋକାନ ମାଲିକ କବାଟ ଖୋଲିବା କ୍ଷଣି ୪ ଜଣ ଦୁର୍ବୃତ୍ତ ଦୋକାନ ଭିତରକୁ ପଶି ଆସିଥିଲେ। ତନ୍ମଧ୍ୟରୁ ଜଣେ ପିସ୍ତଲ ଓ ଅନ୍ୟ ଜଣେ ଛୁରି ଦେଖାଇ ଭୟଭୀତ କରିଥିଲେ। ପାଖରେ ଯାହା ଟଙ୍କା ଅଛି ଦେବାକୁ କହିଥିଲେ। ଏହି ସମୟରେ ଅନ୍ୟ ୨ ଜଣ ଦୋକାନ ବାହାରେ ଜଗି ରହିଥିଲେ। ଦୁର୍ବୃତ୍ତମାନେ ହିନ୍ଦୀରେ କଥା ହେଉଥିଲେ। ୪ ଜଣଙ୍କ ମଧ୍ୟରୁ ୩ଜଣ ମୁଖା ଲଗାଇଥିଲେ। ଶେଷରେ ଚନ୍ଦନଙ୍କ ପାଖରେ ଥିବା ୨୦ ହଜାର ଟଙ୍କା ଲୁଟି ନେଇ ଫେରାର ହୋଇଯାଇଥିଲେ।