ଭୁବନେଶ୍ୱର,୭।୧୧ (ବ୍ୟୁରୋ): ଭୁବନେଶ୍ୱର ମ୍ୟାଗ୍ନେଟିକ୍ ଛକସ୍ଥିତ ପିଏନ୍ବି ଏଟିଏମ୍ରୁ ୨୬ ଲକ୍ଷରୁ ଊର୍ଦ୍ଧ୍ୱ ଟଙ୍କା ଲୁଟ୍ ଘଟଣାରେ ଆନ୍ତଃରାଜ୍ୟ ଲୁଟେରା ଗ୍ୟାଙ୍ଗ୍ର ସମ୍ପୃକ୍ତି ଥିବା ଜଣାପଡିଛି। ଆନ୍ଧ୍ରପ୍ରଦେଶ ପୋଲିସ ହାତରେ ଏହି ଗ୍ୟାଙ୍ଗ୍ର ଦୁଇ ଅଭିଯୁକ୍ତ ଧରାପଡିବା ପରେ ଘଟଣାର ପର୍ଦ୍ଦାଫାଶ ହୋଇଛି। ଗିରଫ ଅଭିଯୁକ୍ତମାନେ ହେଲେ ପଞ୍ଜାବର ସମରଜୋତ୍ ସିଂ ଓ କେରଳର ଜାଫର ସାଦିକ। ଏମାନେ ବେଙ୍ଗାଲରୁକୁ ଆଡ୍ଡାସ୍ଥଳ କରିଥିବାବେଳେ ବିମାନରେ ବିଭିନ୍ନ ରାଜ୍ୟ ବୁଲି ଲୁଟ୍ କରନ୍ତି। ଗତ ନଭେମ୍ବରରେ ଭୁବନେଶ୍ୱରରେ ସେମାନେ ପିଏନ୍ବି ଏଟିଏମ୍କୁ କାଟି ଟଙ୍କା ଲୁଟିନେବା ପରେ ଇଣ୍ଡିଗୋ ଫ୍ଲାଇଟ୍ରେ ଦିଲ୍ଲୀ ଫେରାର ହୋଇଥିଲେ ବୋଲି ପୋଲିସ କମିଶନର ଡ. ସୁଧାଂଶୁ ଷଡ଼ଙ୍ଗୀ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
ପୂରା ଘଟଣା ସମ୍ପର୍କରେ ଡ. ଷଡ଼ଙ୍ଗୀ ସୂଚନା ଦେଇ କହିଛନ୍ତି, ଉଭୟ ଲୁଟେରା ଭୁବନେଶ୍ୱରକୁ ଆସି ହୋଟେଲ ଭଡ଼ା ନେଇ ରହିବା ସହ ଭଡ଼ା ବାଇକ୍ରେ ବୁଲି ବୁଲି ଏଟିଏମ୍ ଉପରେ ନଜର ରଖିଥିଲେ। ଶେଷରେ ମ୍ୟାଗ୍ନେଟିକ୍ ଛକ ପିଏନ୍ବି ଏଟିଏମ୍କୁ ଟାର୍ଗେଟ କରିଥିଲେ। ରହୁଥିବା ହୋଟେଲ କର୍ମଚାରୀଙ୍କ ସହାୟତାରେ ଏକ ଗ୍ୟାସ୍ ସିଲିଣ୍ଡର ଯୋଗାଡ଼ କରି ରାତିରେ ଉକ୍ତ ଏଟିଏମ୍କୁ ଗ୍ୟାସ୍ କଟର ସହାୟତାରେ କାଟି ୨୬ ଲକ୍ଷରୁ ଉର୍ଦ୍ଧ୍ୱ ଟଙ୍କା ଲୁଟି ନେଇଥିଲେ। ଘଟଣାସ୍ଥଳରେ ଗ୍ୟାସ୍ ସିଲିଣ୍ଡର ଓ ଅନ୍ୟାନ୍ୟ ସାମଗ୍ରୀ ଛାଡ଼ି ପଳାଇଥିଲେ। ଭୋର୍ ସାଢେ ୪ଟାରେ ଉକ୍ତ ହୋଟେଲ ଛାଡି ସେମାନେ ଭଡାରେ ଆଣିଥିବା ବାଇକ ଫେରାଇ ଏୟାରପୋର୍ଟ ଚାଲିଯାଇଥିଲେ। ସକାଳ ୭ଟା ୪୦ରେ ଇଣ୍ଡିଗୋ ଫ୍ଲାଇଟରେ ଦିଲ୍ଲୀ ପଳାଇଥିଲେ। ସେଠାରୁ ଚଣ୍ଡିଗଡ଼ ଯାଇ ବେଙ୍ଗାଲୁରକୁ ଚାଲିଆସିଥିଲେ। ଏହାପରେ ଆନ୍ଧ୍ରପ୍ରଦେଶକୁ ଆସି ଏଟିଏମ୍ ଲୁଟ୍ ଯୋଜନା କରିଥିଲେ। କମିଶନରେଟ ପୋଲିସ ଅଭିଯୁକ୍ତଙ୍କ ଫୋନ୍ ନମ୍ବରକୁ ଟ୍ରାକ୍ କରି ପିଛା କରୁଥିଲା। ଡିସିପି ଉମାଶଙ୍କର ଦାସଙ୍କ ନେତୃତ୍ୱରେ ସ୍ପେଶାଲ ସ୍କ୍ବାଡ୍ ସେମାନଙ୍କ ଉପରେ ନଜର ରଖିଥିଲା। ଭାଇଜାକରେ ଏଟିଏମ ଲୁଟ୍ବେଳେ କମିଶନରେଟ ପୋଲିସର ସୂଚନା ଆଧାରରେ ସେମାନେ ଆନ୍ଧ୍ର ପୋଲିସ ହାତରେ ଧରାପଡିଥିଲେ। ୨ ଅଭିଯୁକ୍ତଙ୍କ ନାମରେ ପୂର୍ବରୁ ଏଟିଏମ ଲୁଟ୍ ନେଇ ଅଭିଯୋଗ ରହିଥିବାବେଳେ ନାର୍କୋଟିକ୍ସ ମାମଲାରେ ମଧ୍ୟ ସଂପୃକ୍ତ ଥିବା ଜଣାପଡିଛି। ସ୍ପେଶାଲ ସ୍କ୍ବାଡ୍ ଟିମ୍ରେ କାର୍ଯ୍ୟ କରୁଥିବା ଅଫିସରଙ୍କୁ ପୋଲିସ କମିଶନର ଡ. ଷଡ଼ଙ୍ଗୀ ସାଧୁବାଦ ଜଣାଇବା ସହ ମେଡାଲ ପାଇଁ ସେମାନଙ୍କ ନାମ ଦିଲ୍ଲୀ ପଠାଯିବ ବୋଲି ସୂଚନା ଦେଇଛନ୍ତି। ଏଥିସହ ବ୍ୟାଙ୍କ ଅଧିକାରୀମାନେ ଏଟିଏମ ସୁରକ୍ଷାକୁ ଅଧିକ ଗୁରୁତ୍ୱ ଦେବାକୁ ସେ ପରାମର୍ଶ ଦେଇଛନ୍ତି।