ନୋଏଡା, ୨୩।୭: ନୋଏଡାରୁ ଚୋରିର ଏକ ଅଜବ ଘଟଣା ସାମ୍ନାକୁ ଆସିଛି। ନୋଏଡାର ଫେଜ୍-୩ ଅନ୍ତର୍ଗତ ତହତଗଡ଼ି ଚୌଖଣ୍ଡି ଗ୍ରାମର ଜଣେ ଯୁବକ ରାତିରେ ଖାଇବା ପାଇଁ ସ୍ଥାନୀୟ ବଜାରକୁ ଆସିଥିବାବେଳେ ଲୁଟ୍ର ଶିକାର ହୋଇଥିଲେ। ଦୁଇଜଣ ଲୁଟେରା ଏହି ବ୍ୟକ୍ତିଙ୍କଠାରୁ ମୋବାଇଲ ଫୋନ୍ ଓ ପର୍ସ ଲୁଟି ବାଇକରେ ଫେରାର ହୋଇଯାଇଥିଲେ। ପର୍ସରେ ବ୍ୟକ୍ତିଙ୍କ ଡ୍ରାଇଭିଂ ଲାଇସେନ୍ସ, ଏଟିମ୍ କାର୍ଡ ଓ କିଛି ନଗଦ ଟଙ୍କା ରହିଥିଲା। ତେବେ ଲୁଟେରା ଦ୍ୱୟ କିଛି ବାଟ ଯିବା ପରେ ଏଟିଏମ୍ର ପିନ୍ ନମ୍ବର ବୁଝିବା ପାଇଁ ପୁଣିଥରେ ସେହି ଯୁବକଙ୍କ ନିକଟକୁ ଆସି ପଳାଇଥିଲେ। ଯୁବକ ଜଣଙ୍କ ସ୍ଥାନୀୟ ଲୋକଙ୍କ ସହାୟତାରେ ପୋଲିସକୁ ତୁରନ୍ତ ଏନେଇ ଖବର କରିଥିଲେ। ପୋଲିସ ପକ୍ଷରୁ ସଙ୍ଗେ ସଙ୍ଗେ ସ୍ଥାନୀୟ ଅଞ୍ଚଳକୁ ଚାରିଆଡ଼ୁ ନାକାବନ୍ଦୀ କରି ଚେକିଂ ଆରମ୍ଭ କରାଯାଇଥିଲା। ଏହି ସମୟରେ ଲୁଟେରା ଦ୍ୱୟ ପୋଲିସକୁ ଦେଖି ଗୁଳି କରି ଘଟଣା ସ୍ଥଳରୁ ଫେରାର ହେବାକୁ ଚେଷ୍ଟା କରିତ୍ଥଲେ। ତେବେ ପୋଲିସର ପାଲଟା ଗୁଳିରେ ଉଭୟ ଆହତ ହୋଇ ଧରାପଡ଼ିଥିଲେ ବୋଲି ସେଣ୍ଟ୍ରାଲ ନୋଏଡା ଡିସିପି ହରିଶ ଚନ୍ଦର କହିଛନ୍ତି। ଉଭୟ ଲୁଟେରାଙ୍କ ନିକଟରୁ ପର୍ସ, ମୋବାଇଲ ଓ ନଗତ ୩୨ ଶହ ଟଙ୍କା ସମେତ ୨ଟି ପିସ୍ତଲ ଜବତ କରାଯାଇଛି।
