ହାଟଡିହୀ,୨୯।୧୧(ଶୁଭକାନ୍ତ ନାୟକ) କେନ୍ଦୁଝର ଜିଲା ନନ୍ଦିପଦା ଥାନା ଅଞ୍ଚଳରେ ଜଣେ ସୁନା ଦୋକାନୀ ଙ୍କ ଘରୁ ମଙ୍ଗଳବାର ବିଳମ୍ବିତ ରାତିରେ ଲୁଟପାଟ ହୋଇଛି। ଥାନା ଅଧୀନ ଟୁକୁଣା ଗ୍ରାମର ପବିତ୍ର ଦାସଙ୍କ ଘରୁ ଲୁଟପାଟ ହୋଇଥିବା ଜଣାପଡିଛି। ପବିତ୍ରଙ୍କ ଛେନାପଦି ବଜାରରେ ଏକ ସୁନା ଦୋକାନ ଅଛି ।
ସୂଚନା ଅନୁସାରେ ୬ଜଣ ଡକାୟତ ପରିବାର ଲୋକଙ୍କ ମୁଣ୍ଡରେ ବନ୍ଧୁକ ଦେଖାଇ ୧୫ ଲକ୍ଷରୁ ଉଦ୍ଧର୍ବ ଟଙ୍କାର ସୁନା ରୁପାର ଗହଣା ଲୁଟି ନେଇଛନ୍ତି । ମଙ୍ଗଳବାର ବିଳମ୍ବିତ ରାତିରେ ଡକାୟତମାନେ ମୁହଁରେ କପଡା ବାନ୍ଧି ଝରକା ଦେଇ ଘର ଭିତରକୁ ପଶିଥିଲେ । ପବିତ୍ର, ତାଙ୍କ ସ୍ତ୍ରୀ ଏବଂ ପୁଅଙ୍କ ବେକରେ ବନ୍ଧୁକ ଓ ଭୁଜାଲି ଲଗାଇ ପ୍ରାୟ ୨୦୦ ଗ୍ରାମର ସୁନା ଓ ୭କିଲୋରୁ ଉଦ୍ଧର୍ବ ରୁପା ଅଳଙ୍କାର ଆଦି ଲୁଟି ନେଇଥିଲେ । ଏଥିସହ ପବିତ୍ରଙ୍କୁ ମାଡ଼ ମଧ୍ୟ ମାରିଥିଲେ । ଘରେ ଥିବା ଗୋଟିଏ ମଧ୍ୟ ଏଲ. ଇ.ଡି ନେଇ ଯାଇଛନ୍ତି । ଖବର ପାଇ ନନ୍ଦିପଦା ପୁଲିସ ବୁଧବାର ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ସୂଚନା ଯୋଗ୍ୟ ଗତ ଏକ ବର୍ଷ ପୂର୍ବେ ପବିତ୍ର ଦୋକାନ ବନ୍ଦ କରି ଘରକୁ ଫେରୁଥିବା ବେଳେ ନିସଙ୍ଖପୁର ନିକଟରେ କିଛି ଦୁର୍ବୃତ୍ତ ତାଙ୍କୁ ମରଣାନ୍ତକ ଆକ୍ରମଣ କରି ପ୍ରାୟ ୧୫ ଲକ୍ଷରୁ ଉର୍ଦ୍ଧ ଟଙ୍କାର ଗହଣା ଲୁଟି ନେଇଥିଲେ । ଗାଁ ଭିତରେ ପଶି ଦୁର୍ବୃତ୍ତଙ୍କର ଏପରି ଲୁଟପାଟ ଘଟଣାକୁ ନେଇ ଗ୍ରାମରେ ଭୟ ଖେଳି ଯାଇଥିବା ବେଳେ ନାନା କଳ୍ପନା ଜଳ୍ପନା ପ୍ରକାଶ ପାଇଛି। ନନ୍ଦିପଦା ଥାନା ଅଞ୍ଚଳରେ ଚୋରି, ଲୁଟପାଟ ବଢି ଚାଲିଥିବା ବେଳେ ପୋଲିସର ରାତ୍ରିକାଳୀନ ପାଟ୍ରୋଲିଂକୁ କଡାକଡି କରିବାକୁ ଦାବି ହୋଇଛି। ଘଟଣାର ଅନୁସନ୍ଧାନ କରାଯାଉଥିବା ନେଇ ଆଇଆଇସି ରମେଶ ଚନ୍ଦ୍ର ପାତ୍ର ଏବଂ ପୋଲିସ ଅଧିକାରୀ ନରୋତ୍ତମ ଦଳେଇ କହିଛନ୍ତି।