ଚମ୍ପୁଆ,୪।୨(ଡି.ଏନ.ଏ): କେନ୍ଦୁଝର ଜିଲା ଚମ୍ପୁଆ ଥାନା ଅନ୍ତର୍ଗତ ବାସୁଦେବପୁର ନିକଟରେ ବନ୍ଧୁକ ଦେଖାଇ କୁକୁଡ଼ା ବୋଝେଇ ଗାଡ଼ିକୁ ଦୁର୍ବୃତ୍ତ ନେଇଯାଇଛନ୍ତି। ଏଥିସହ ଟଙ୍କା ଓ ମୋବାଇଲ ମଧ୍ୟ ଲୁଟି ନେଇଛନ୍ତି। ଏନେଇ ଚମ୍ପୁଆ ଥାନାରେ ଗାଡ଼ି ମାଲିକ ଅଭିଯୋଗ କରିଛନ୍ତି। ଅଭିଯୋଗ ଆଧାରରେ ପୋଲିସ ତଦନ୍ତ କରୁଛି। ପୋଲିସ ସୂଚନା ଅନୁଯାୟୀ, ଟାଟା ମାକ୍ସିମ ଗାଡ଼ିରେ କୁକୁଡ଼ା ବୋଝେଇ ହୋଇ ତୁରୁମୁଙ୍ଗା ଥାନା ପାଣପୋସିରୁ ସେରେଣ୍ଡାକୁ ଯାଉଥିଲା। ଗତ ମଙ୍ଗଳବାର ରାତି ୧୧ଟା ୩୦ ସମୟରେ ଏକ ନାନୋ ଗାଡ଼ିରେ କିଛି ଦୁର୍ବୃତ୍ତ ବାସୁଦେବପୁର ନିକଟରେ ୧୫ କୁଇଣ୍ଟାଲ କୁକୁଡ଼ା ବୋଝେଇ ହୋଇଥିବା ଗାଡ଼ିକୁ ଅଟକାଇଥିଲେ। ଗାଡ଼ିର ମାଲିକ କୁଞ୍ଜଲ ମୁଣ୍ଡା, ଡ୍ରାଇଭର ଓ ସାଥିଙ୍କୁ ଦୁର୍ବୃତ୍ତ ବନ୍ଧୁକ ଦେଖାଇ କୁକୁଡ଼ା ଗାଡ଼ିକୁ ଚଳାଇ ପଳାଇଯାଇଥିଲେ। ସେରେଣ୍ଡା ଜଙ୍ଗଲରେ ୩ ଜଣଙ୍କ ମୋବାଇଲ, ୯୫୩୦ ଟଙ୍କା ଓ ଫୋନ ମାଧ୍ୟମରେ ଦୁଇଟି ପର୍ଯ୍ୟାୟରେ ୧୦ ଓ ୯ ହଜାର ଟଙ୍କା ନେଇଯାଇଥିଲେ। ପରେ ନୁଆମୁଣ୍ଡି ରାସ୍ତାରେ ୩ ଜଣଙ୍କ ଆଖିରେ ପଟିବାନ୍ଧି ଛାଡ଼ିଦେଇଥିଲେ। ଅଭିଯୋଗ ଆଧାରରେ ଚମ୍ପୁଆ ପୋଲିସ (ନଂ-୧୪/୨୩) ମାମଲା ରୁଜୁ କରିି ଘଟଣାର ତଦନ୍ତ ଚଳାଇଥିବା ଆଇଆଇସି ଗଗନ ବିହାରୀ ନାୟକ ସୂଚନା ଦେଇଛନ୍ତି।