ଦିଗପହଣ୍ଡି/ପାଟପୁର,୨୮ା୫(ଡି.ଏନ.ଏ.): ପାଟପୁର ଥାନା ଇଲାକାରେ ଦିନରେ ଝାଡୁ ବେପାର କରି ରାତିରେ ଚୋରି କରୁଥିବା ଏକ ଗ୍ୟାଙ୍ଗକୁ ପୋଲିସ ଚିହ୍ନଟ କରି ୬ ସଦସ୍ୟଙ୍କୁ ଶନିବାର ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ଶେରଗଡ଼ ଥାନା ଧବଳପୁର ଗ୍ରାମର ହରି ଡାକୁଆ, କୁରେଶୁ ଡାକୁଆ, ଟୋପାଗୁଲୁ, ଟୁନା , ପାଟପୁର ଥାନା ଜୟନଗର ଗ୍ରାମର ଏସ୍. ସାହେବ, ଏସ୍. ବିକ୍ରମ ଏବଂ ଶେରଗଡ଼ର ସୁନା ବ୍ୟବସାୟୀ ବି.ରମେଶ ପାତ୍ର। ପୋଲିସ ସେମାନଙ୍କ ନିକଟରୁ ୭୦ ଗ୍ରାମ ସୁନା ଅଳଙ୍କାର, ପ୍ରାୟ ୧ ଶହ ଗ୍ରାମ ରୁପା ଅଳଙ୍କାର ସମେତ ମୋବାଇଲ ଫୋନ ଓ ଚୋରି ଘଟଣାରେ ବ୍ୟବହୃତ ଏକ ଅଟୋକୁ ଜବତ କରିଛି।
ଖବରଅନୁଯାୟୀ, ଗତ କିଛି ଦିନ ଧରି ଅଭିଯୁକ୍ତମାନେ ଦିନରେ ଝାଡୁ ବେପାର ପାଇଁ ପାଟପୁର, ଦିଗପହଣ୍ଡି, ଶେରଗଡ଼, ବଡଗଡ, ସୋରଡ଼ା ଅଞ୍ଚଳର ବିଭିନ୍ନ ଗ୍ରାମ ବୁଲାବୁଲି କରିବା ସହ ଚାବି ପଡ଼ିଥିବା ଘରଗୁଡ଼ିକୁ ଚିହ୍ନଟ କରିଥାନ୍ତି। ସୁବିଧା ସୁଯୋଗ ଦେଖି ରାତିରେ ତାଲା ଭାଙ୍ଗି ଚୋରି କରିଥାନ୍ତି। ଗତ ୧୩ ତାରିଖ ରାତିରେ ପୂର୍ବ ଯୋଜନା ପ୍ରକାରେ ଅଭିଯୁକ୍ତମାନେ ହରି ଡାକୁଆଙ୍କ ଅଟୋ (ଓଡି ୦୭ ସି ୦୪୯୩) ଯୋଗେ ପାଟପୁର ଥାନା କଂସାମାରୀ ଗ୍ରାମରେ ପହଞ୍ଚି ଜି. ରବିନ୍ଦ୍ର ଦୋରାଙ୍କ ଘରେ ପଶି ବହୁ ସୁନା, ରୁପା ଅଳଙ୍କାର ଓ ନଗଦ ପ୍ରାୟ ୫ ହଜାର ଟଙ୍କା ଲୁଟି ନେଇଥିଲେ। ପରଦିନ ସକାଳୁ ରବିନ୍ଦ୍ର ପାଟପୁର ଥାନାରେ ଏତଲା ଦେଇଥିଲେ। ଏତଲାକୁ ଭିତ୍ତିକରି ପୋଲିସ ଥାନା ମାମଲା ନଂ. ୨୬୬/୨୩ ପ୍ରକାରେ ମକଦ୍ଦମା ରୁଜୁ କରି ତଦନ୍ତ ଚଳାଇବା ସହ ଆଇଆଇସି ସବ୍ୟସାଚୀ ମଲ୍ଲଙ୍କ ନେତୃତ୍ୱରେ ଏକ ସ୍ବତନ୍ତ୍ର ସ୍କ୍ବାଡ ଗଠନ କରି ବିଭିନ୍ନ ସ୍ଥାନରେ ଚଢାଉ କରିଥିଲା। ଶନିବାର ପୋଲିସ ପାଟପୁର, ଶେରଗଡ଼ ଓ ବଡଗଡ ଅଞ୍ଚଳରୁ ଅଭିଯୁକ୍ତମାନଙ୍କୁ ଗିରଫ କରି ଥାନାକୁ ଆଣି ଜେରା କରିବା ପରେ ପୋଲିସ ସମ୍ମୁଖରେ ସେମାନେ ଚୋରି କରିଥିବା ସ୍ବୀକାର କରିଥିଲେ। ସେମାନେ ଚୋରି କରିଥିବା ଅଳଙ୍କାର ଶେରଗଡ଼ର ବ୍ୟବସାୟୀ ରମେଶଙ୍କୁ ଦେଢ଼ ଲକ୍ଷ ଟଙ୍କାରେ ବିକ୍ରି କରି ଦେବାପରେ ସେହି ଟଙ୍କାକୁ ଭାଗବାଣ୍ଟ କରି ନେଇଥିବା ମାନିଥିଲେ। ଏହାପରେ ପାଟପୁର ଆଇଆଇସି ସବ୍ୟସାଚୀ ମଲ୍ଲ, ଶେରଗଡ଼ ଆଇଆଇସି ମନୋଜ କୁମାର ପ୍ରଧାନ, ବଡଗଡ ଆଇଆଇସି ସୁରଜ କୁମାର ଝଙ୍କାର ଅଭିଯୁକ୍ତମାନଙ୍କୁ ଜେରା କରିଥିଲେ। ପରେ ଅଭିଯୁକ୍ତମାନଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିଲା। ଜାମିନ ଆବେଦନ ନାମଞ୍ଜୁର ହେବାରୁ ସମସ୍ତ ଅଭିଯୁକ୍ତଙ୍କୁ ଦିଗପହଣ୍ଡି ସବ୍ ଜେଲ ହାଜତକୁ ପଠାଇ ଦିଆଯାଇଛି।