ବଲାଙ୍ଗୀର ଅଫିସ,୬ା୮: ପାଟଣାଗଡ ମେନରୋଡଠାରେ ଥିବା ଅମୃତ କଳସ ଜୁଏଲେରି ଦୋକାନରୁ ଶୂୁକ୍ରବାର ଅପରାହ୍ଣରେ ଏକ ବଡଧରଣର ଡକାୟତି ହୋଇଛି। ୬ ଜଣ ଡକାୟତ ଦୋକାନ ଭିତରକୁ ପଶି ଦୋକାନ ମାଲିକ ଏବଂ କର୍ମଚାରୀଙ୍କୁ ବନ୍ଧୁକ ଦେଖାଇ ଦେଢ଼ କିଲୋରୁ ଊର୍ଦ୍ଧ୍ୱ ଓଜନର ସୁନା ଅଳଙ୍କାର, ୪୦ ହଜାର ଟଙ୍କାର ମୋବାଇଲ, ୬୦ ହଜାର ନଗଦ ଟଙ୍କା ଏବଂ ସିସିଟିଭି ହାର୍ଡ ଡିକ୍ସ ଧରି ଫେରାର ମାରିଥିବା ଅଭିଯୋଗ ହୋଇଛି। ଦୋକାନ ମାଲିକ ମୁକେଶ ଜୈନଙ୍କୁ ଡକାୟତମାନେ ଆକ୍ରମଣ କରିଥିବା ଜଣାଯାଇଛି ।
ଅଭିଯୋଗ ଅନୁଯାୟୀ, ଅପରାହ୍ଣ ପ୍ରାୟ ୪ଟା ସମୟରେ ଗହଣା ଦୋକାନ ମାଲିକ ମୁକେଶ ଖାଇ ସାରିବା ପରେ ଦୋକାନ ଖୋଲିବାକୁ ଆସିଥିଲେ। ଦୋକାନ ଖୋଲିବା ପରେ ସେ ଏବଂ ତାଙ୍କର ଦୁଇଜଣ କର୍ମଚାରୀ ଦୋକାନ ଭିତରେ ଥିଲେ। ଏତିକିବେଳେ ତିନିଟି ବାଇକ୍ରେ ୬ ଜଣ ଡକାୟତ ମୁଖାପିନ୍ଧି ତାଙ୍କ ଦୋକାନକୁ ପଶିଥିଲେ। ସେମାନେ ବନ୍ଧୁକ ଦେଖାଇ ଦୋକାନ ମାଲିକ, କର୍ମଚାରୀଙ୍କୁ ଭୟଭୀତ କରିଥିଲେ। ଏହାପରେ ଦୋକାନ ଭିତରେ ଥିବା ସୁନାଗହଣା ଲୁଟିବା ଆରମ୍ଭ କରିଥିଲେ। ଦୋକାନ ମାଲିକ ଜୈନ ବାଧା ଦେବାରୁ ସେମାନେ ତାଙ୍କ ମୁଣ୍ଡକୁ ଆକ୍ରମଣ କରିଥିଲେ। ଡକାୟତ ଦଳ ଦୋକାନରୁ ସୁନାଗହଣା, ମୋବାଇଲ, ନଗଦ ଟଙ୍କା ଲୁଟି ନେଇ ଯିବା ବେଳେ ସ୍ଥାନୀୟ ଲୋକେ ସେମାନଙ୍କୁ ଢେଲାପଥର ମାରିଥିଲେ ମଧ୍ୟ ସେମାନେ ସେଠାରୁ ଖସିଯିବାକୁ ସଫଳ ହୋଇଥିଲେ। ଗୋଟିଏ ବାଇକ୍ରେ ଡକାୟତ କଣ୍ଟାବାଞ୍ଜି ପଟକୁ ଏବଂ ଅନ୍ୟ ଏକ ବାଇକରେ ଲରମ୍ଭା ପଟକୁ ପଳାଇ ଥିବା ବେଳେ ତୃତୀୟ ବାଇକ୍ କୁଆଡେ ଗଲା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଘଟଣା ସମ୍ପର୍କରେ ପାଟଣାଗଡ ଥାନାରେ ଅଭିଯୋଗ ପରେ ପୋଲିସ ପକ୍ଷରୁ ତଦନ୍ତ ଆରମ୍ଭ କରାଯାଇଛି। ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଛନ୍ତି। ପାଟଣାଗଡ ଏସ୍ଡିପିଓ ଜ୍ୟୋର୍ତିମୟ ଭୁକ୍ତାଙ୍କ ନେତୃତ୍ୱରେ ପୋଲିସ ତଦନ୍ତକୁ ତ୍ୱରାନ୍ବିତ କରିଥିବା ଜଣାପଡିଛି।