ଆରଡ଼ି,୨୧ା୮(ଡି.ଏନ୍.ଏ.)- ଲଘୁଚାପ ଜନିତ ବର୍ଷା ଯୋଗୁଁ ଭଦ୍ରକ ଜିଲା ଚାନ୍ଦବାଲି ବ୍ଲକର ବୋଡ଼କଠାରେ ୨୦ନଂ. ଜାତୀୟ ରାଜପଥର ବୈତରଣୀ ନଦୀର କୟଁାଗୋଲା ସେତୁ ପାର୍ଶ୍ୱ ରାସ୍ତାରେ ନିର୍ମାଣାଧୀନ ପଥର ପ୍ୟାକିଂ ଗୁରୁବାର ପ୍ରାୟ ୧୦୦ ଫୁଟ ଧସିଯାଇଛି । ପୂର୍ବରୁ ଏଠାରେ ବାରମ୍ବାର ମାଟି ଅତଡ଼ା ଖସି ରାସ୍ତା ପ୍ରତି ବିପଦ ସୃଷ୍ଟି କରୁଥିଲା । ଏହାକୁ ପଥର ପ୍ୟାକିଂ କରିବା ପାଇଁ ଏନ୍ଏଚ୍ ବିଭାଗ ପକ୍ଷରୁ ନିଷ୍ପତ୍ତି ନିଆଯାଇଥିଲା । ଜଣେ ଠିକାଦାର ଏହି ପଥର ପ୍ୟାକିଂ କାମ ହାତକୁ ନେଇ ନିର୍ମାଣ କାର୍ଯ୍ୟ ଜାରି ରଖିଥିଲେ। ଉପଯୁକ୍ତ ଭାବେ ପଥର ପ୍ୟାକିଂ କରାଯାଇ ରାସ୍ତାକୁ ମଜଭୁତ କରିବାକୁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି। ଏହି ରାସ୍ତା ଦେଇ ଦୈନନ୍ଦିନ ଶହଶହ ଗାଡ଼ି ଆରଡିରୁ ଯାଜପୁର, କଟକ ଓ ଭୁବନେଶ୍ୱରକୁ ଯାତାୟାତ କରନ୍ତି। ରାସ୍ତା ପାର୍ଶ୍ୱ ପଥର ପ୍ୟାକିଂ ଧସିଲେ ଯାନବାହନ ଚଳାଚଳରେ ବାଧା ଉପୁଜିବା ସହ ଯୋଗାଯୋଗ ବିଚ୍ଛିନ୍ନ ହେବାର ସମ୍ଭାବନାକୁ ଏଡ଼ାଇ ଦିଆଯାଇ ନ ପାରେ ।