ବମ୍ବେ: ପରଦାରେ ବଲିଉଡ୍ର ବହୁ ପ୍ରତିକ୍ଷୀତ ଫିଲ୍ମ ‘ରକି ଔର ରାନୀ କି ପ୍ରେମକାହାନୀ’। ଶୁକ୍ରବାର ଫିଲ୍ମଟି ରିଲିଜ ହୋଇଛି। ଏଥିରେ ଅଭିନେତା ରଣବୀର ସିଂହ ଏବଂ ଆଲିଆ ଭଟ୍ଟଙ୍କୁ ମୁଖ୍ୟ ଭୂମିକାରେ ଦେଖିବାକୁ ମିଳୁଛି। ଦୀର୍ଘଦିନ ପରେ ନିର୍ଦ୍ଦେଶକ ଭାବେ କରନ୍ ଜୋହର ଦର୍ଶକଙ୍କ ସାମ୍ନାକୁ ଆସିଥିବା ବେଳେ ଫିଲ୍ମଟି ଭଲ ବ୍ୟବସାୟ କରିବ ବୋଲି ଆଶା କରାଯାଉଛି। କାରଣ ପ୍ରଥମ ଶୋ’ ଦେଖିବା ପରେ ଲୋକେ ଫିଲ୍ମର ପ୍ରଶଂସା କରୁଛନ୍ତି।
ଫିଲ୍ମରେ ଭରପୂର ମନୋରଞ୍ଜନ ସହ ପାରିବାରିକ କାହାଣୀ ରହିଛି। ଏହା ଦିଲ୍ଲୀର ପଞ୍ଜାବୀ ମିଠା ଦୋକାନୀ ରକି ରନ୍ଧାବା ଏବଂ ବଙ୍ଗାଳୀ ପରିବାରର ନ୍ୟୁଜ୍ ଆଙ୍କର ଝିଅ ରାନୀ ଚାଟର୍ଜୀଙ୍କ ଲଭ୍ଷ୍ଟୋରୀ। କରନ୍ ଏଥିରେ ବହୁତ ସାମାଜିକ ଘଟଣାବଳୀକୁ ଦେଖାଇଛନ୍ତି, ଯାହାକି ବେଶ ପସନ୍ଦ ଆସୁଛି। ଆଜିର ଯୁବପୀଢ଼ିଙ୍କ ଚାହିଦାକୁ ଦୃଷ୍ଟିରେ ରଖି ଫିଲ୍ମ ଓ୍ବେବ୍ ସିରିଜ ଅଥବା ଟେଲିଭିଜନ ଧାରାବାହିକ ଢ଼ଙ୍ଗରେ ନିର୍ମିତ ହୋଇଛି।
