ନୂଆଦିଲ୍ଲୀ,୨୪।୯: ରୋଜର ଫେଡରରଙ୍କ ଲାଗି ରାଫେଲ ନାଡାଲଙ୍କ ଆଖିରେ ଲୁହ। ଲାଭର କପ୍ରେ କ୍ୟାରିୟରର ଶେଷ ଟେନିସ୍ ମ୍ୟାଚ୍ ଖେଳୁଥିବା ବେଳେ ଏଭଳି କିଛି ଦୃଶ୍ୟ କ୍ରୀଡ଼ାପ୍ରେମୀଙ୍କୁ ଭାବବିହ୍ବଳ କରିଛି। ଟେନିସ୍ କୋର୍ଟରେ ପରସ୍ପରର ଚୀର ପ୍ରତିଦ୍ୱନ୍ଦ୍ୱୀ ସତ୍ତ୍ୱେ ଫେଡରରଙ୍କ ଲାଗି ନାଡାଲଙ୍କ ସମ୍ମାନ ପୂରା ବିଶ୍ୱ ଲାଗି ଉଦାହରଣ ପାଲଟିଛି।
କିମ୍ବଦନ୍ତୀ ଫେଡରର ଗତ ସପ୍ତାହରେ ନିଜର ଅବସର ନେଇ ଘୋଷଣା କରିଥିଲେ। ଏହାପରେ ଲାଭର କପ୍ରେ ସେ ନିଜର ଶେଷ ପ୍ରତିଯୋଗିତାମୂଳକ ମ୍ୟାଚ୍ ଖେଳିଥିଲେ। ଏହି ସମୟରେ ତାଙ୍କ ସହ ଟିମ୍ ଭାବେ ଥିଲେ ସ୍ପେନ ତାରକା ନାଡାଲ। ଏହାଛଡ଼ା ଉପସ୍ଥିତ ଥିଲେ ଫେଡରରଙ୍କ ସ୍ତ୍ରୀ ମିରକା, ସନ୍ତାନ ଏବଂ ମାତାପିତା। ୨୦ ଥରର ଗ୍ରାଣ୍ଡସ୍ଲାମ ଚାମ୍ପିୟନଙ୍କୁ ଶେଷ ଥର ଲାଗି ଖେଳୁଥିବା ଦେଖି ସମସ୍ତଙ୍କ ଆଖି ଓଦା ହୋଇଥିଲା। ବିଶେଷକରି ଫେଡରରଙ୍କ କାନ୍ଦ ଦେଖି ପ୍ରତିନ୍ଦ୍ୱନ୍ଦ୍ୱୀ ନାଡାଲ କାନ୍ଦି ପକାଇଥିଲେ। ଏହା ସମସ୍ତଙ୍କୁ ଭାବବିହ୍ବଳ କରୁଥିବା ବେଳେ ଏହାର ଭିଡିଓ ଭାଇରାଲ ହେଉଛି।