ଢାକା, ୨୧।୬ : ରୋହିଙ୍ଗ୍ୟା ମୁସଲମାନମାନଙ୍କୁ ଆଶ୍ରୟ ଦେଉଥିବା ବାଂଲାଦେଶ ବର୍ତ୍ତମାନ ସେମାନଙ୍କ ଉପରେ ଅସନ୍ତୋଷ ପ୍ରକାଶ କରୁଛି। ରୋହିଙ୍ଗ୍ୟା ମୁସଲମାନମାନେ ବାଂଲାଦେଶରେ ସମସ୍ୟା ସୃଷ୍ଟି କରୁଛନ୍ତି। ପ୍ରଧାନମନ୍ତ୍ରୀ ଶେଖ ହସିନା ଏ ସମ୍ପର୍କରେ ସୂଚନା ପ୍ରଦାନ କରିଛନ୍ତି। ପ୍ରଧାନମନ୍ତ୍ରୀ ଶେଖ ହସିନା କହିଛନ୍ତି ଯେ ରୋହିଙ୍ଗ୍ୟାମାନେ ବାଂଲାଦେଶରେ ସାମାଜିକ ସମସ୍ୟା ସୃଷ୍ଟି କରୁଛନ୍ତି।
ସେ କହିଛନ୍ତି ଯେ ସେମାନଙ୍କ ମଧ୍ୟରୁ ଅନେକ ନିଶାଦ୍ରବ୍ୟ କାରବାର ତଥା ମହିଳା ଏବଂ ଯୁବତୀଙ୍କ ଚୋରା ଚାଲାଣରେ ଜଡିତ ଅଛନ୍ତି। ପ୍ରଧାନମନ୍ତ୍ରୀ ଶେଖ ହସିନା ବାଂଲାଦେଶକୁ ନୂତନ ଭାବେ ନିଯୁକ୍ତ କାନାଡ଼ାର ହାଇ କମିଶନର ଲିଲି ନିକୋଲ୍ସଙ୍କ ସହ ଏକ ସାକ୍ଷାତକାରରେ ଏହା କହିଛନ୍ତି। ପ୍ରଧାନମନ୍ତ୍ରୀଙ୍କ ଗଣମାଧ୍ୟମ ସଚିବ ଏହସାନୁଲ କରିମ ଉଭୟଙ୍କ ସାକ୍ଷାତ ସମ୍ପର୍କରେ ସୂଚନା ଦେଇଛନ୍ତି। ପ୍ରଧାନମନ୍ତ୍ରୀ ହାଇ କମିଶନରଙ୍କୁ କହିଛନ୍ତି ଯେ ୧୧ ଲକ୍ଷରୁ ଅଧିକ ରୋହିଙ୍ଗ୍ୟା ଦୀର୍ଘ ଦିନ ଧରି ସମସ୍ୟା ସୃଷ୍ଟି କରୁଛନ୍ତି।
ଏହି ସମୟରେ ସେ ପ୍ରଶ୍ନ କରିଛନ୍ତି ଯେ ବାଂଲାଦେଶ କିପରି ଏତେ ବଡ ବୋଝ ବହନ କରିପାରିବ। ରୋହିଙ୍ଗ୍ୟାଙ୍କୁ ଉନ୍ନତ ସୁବିଧା ତଥା ଆଶ୍ରୟ ଦେବା ପାଇଁ ବାଂଲାଦେଶ ଚାର୍ ଦ୍ୱୀପରେ ଏକ ଅସ୍ଥାୟୀ ଆଶ୍ରୟସ୍ଥଳ ନିର୍ମାଣ କରିଛି ବୋଲି ପ୍ରଧାନମନ୍ତ୍ରୀ ଶେଖ ହାସାନି ସୂଚନା ଦେଇଛନ୍ତି।
ଶେଖ ହସିନାଙ୍କୁ ଜବାବ ଦେଇ ହାଇ କମିଶନର କହିଛନ୍ତି ଯେ ଏହି ପ୍ରସଙ୍ଗରେ କାନାଡା ସର୍ବଦା ବାଂଲାଦେଶକୁ ସମର୍ଥନ କରିବ। ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ତାଙ୍କ ଦେଶ ଦାନ ମାଧ୍ୟମରେ ଟଙ୍କା ସଂଗ୍ରହ ପାଇଁ ରୋହିଙ୍ଗ୍ୟାଙ୍କ ପାଇଁ ଏକ ଅତିରିକ୍ତ ପାଣ୍ଠି ସୃଷ୍ଟି କରୁଛି । କାନାଡା ଏବଂ ବାଂଲାଦେଶ ମଧ୍ୟରେ କୂଟନୈତିକ ସମ୍ପର୍କର ୫୦ ତମ ବାର୍ଷିକୀ ଅବସରରେ ସେ ବାଂଲାଦେଶରେ ପହଞ୍ଚିଥିଲେ। ଏଠାରେ ସେ ସ୍ବାଧୀନତାର ୫୦ ତମ ବାର୍ଷିକୀ ପାଳନ କରିବା ପାଇଁ ବାଂଲାଦେଶକୁ ତାଙ୍କର ଶୁଭେଚ୍ଛା ଜଣାଇଛନ୍ତି।