ଆବୁଧାବି, ୧।୧୦: ଆଇପିଏଲ୍-୧୩ତମ ସିଜନର ୧୩ତମ ମ୍ୟାଚ୍ରେ ଗୁରୁବାର ରୋହିତ୍ ଶର୍ମାଙ୍କ ନେତୃତ୍ୱାଧୀନ ମୁମ୍ବାଇ ଇଣ୍ଡିଆନ୍ସର ମୁକାବିଲା କିଙ୍ଗ୍ସ ଇଲେଭେନ ପଞ୍ଜାବ ମଧ୍ୟରେ ମ୍ୟାଚ୍ ଅନୁଷ୍ଠିତ ହୋଇଛି। ପଞ୍ଜାବ ଅଧିନାୟକ ଲୋକେଶ ରାହୁଲ ମ୍ୟାଚ୍ରେ ଟସ୍ ଜିତି ପ୍ରଥମେ ମୁମ୍ବାଇକୁ ବ୍ୟାଟିଂ ପାଇଁ ଆମନ୍ତ୍ରଣ କରିଛନ୍ତି। ଏହି ମ୍ୟାଚ୍ ଅବସରରେ ରୋହିତ୍ ଏକ ମାଇଲ୍ଖୁଣ୍ଟ ହାସଲ କରିଛନ୍ତି। ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର ଅଧିନାୟକ ବିରାଟ କୋହଲି ଓ ସୁରେଶ ରାଇନାଙ୍କ ପରେ ଆଇପିଏଲ୍ରେ ୫ ହଜାର ରନ୍ ପୂରଣ କରିବାରେ ରୋହିତ୍ ୩ୟ ବ୍ୟାଟ୍ସମ୍ୟାନ ହୋଇଛନ୍ତି। ମହମ୍ମଦ ସାମିଙ୍କୁ ଚୌକା ମାରି ରୋହିତ୍ ଏହି ମାଇଲଖୁଣ୍ଟ ଛୁଇଁଥିଲେ। ରୋହିତ୍ ଏହି ମ୍ୟାଚ୍ ପୂର୍ବରୁ ୧୯୧ ଆଇପିଏଲ୍ ମ୍ୟାଚ୍ରୁ ୪,୯୯୮ ରନ୍ ସଂଗ୍ରହ କରିଥିଲେ। ଆଇପିଏଲ୍ରେ ୫ ହଜାର ରନ୍ ପୂରଣ କରିବା ଲାଗି ତାଙ୍କୁ ଆଉ ୨ ରନ୍ ଆବଶ୍ୟକ ହେଉଥିଲା।
ଉଲ୍ଲେଖଯୋଗ୍ୟ, କୋହଲିଙ୍କ ନାମରେ ଆଇପିଏଲ୍ରେ ସବୁଠାରୁ ଅଧିକ ରନ୍ ସଂଗ୍ରହ କରିବାର ରେକର୍ଡ ରହିଛି। ସେ ୧୮୦ ମ୍ୟାଚ୍ରୁ ୩୭.୧୯ ଆଭରେଜରେ ୫,୪୩୦ ରନ୍ କରିଛନ୍ତି। ଏହି ତାଲିକାର ୨ୟ ସ୍ଥାନରେ ରାଇନା ରହିଛନ୍ତି। ରାଇନା ୧୯୩ ମ୍ୟାଚ୍ରୁ ୫,୩୬୮ ରନ ନିଜ ନାମରେ ଲିପିବଦ୍ଧ କରିଛନ୍ତି।