ଅହମ୍ମଦାବାଦ,୩୧ା୩:ଆଇପିଏଲ୍ର ୧୬ତମ ସଂସ୍କରଣ ଶୁକ୍ରବାର ଗୁଜରାଟର ନରେନ୍ଦ୍ର ମୋଦି କ୍ରିକେଟ ଷ୍ଟାଡିୟମରେ ଆରମ୍ଭ ହେବ। ଏହା ପୂର୍ବରୁ ଗୁରୁବାର ୧୦ଟି ଯାକ ଫ୍ରାଞ୍ଚାଇଜିର ଅଧିନାୟକଙ୍କୁ ନେଇ ଏକ ଫଟୋଶୁଟ୍ କରାଯାଇଥିଲା। ତେବେ ଏହି କ୍ୟାପ୍ଟେନ୍ସ ମିଟ୍ରେ ଅନୁପସ୍ଥିତ ଥିଲେ ମୁମ୍ବାଇ ଇଣ୍ଡିଆନ୍ସ ଅଧିନାୟକ ରୋହିତ ଶର୍ମା। ରୋହିତଙ୍କ ଅନୁପସ୍ଥିତି ସମସ୍ତଙ୍କ ପାଇଁ ଚର୍ଚ୍ଚାର ବିଷୟ ପାଲଟିଥିଲା। ଅସୁସ୍ଥ ଥିବା କାରଣରୁ ରୋହିତ ମୁମ୍ବାଇରୁ ଅହମଦାବାଦ ଯାତ୍ରା କରି ପାରି ନ ଥିଲେ। ତେବେ ଏପ୍ରିଲ୍ ୨ ତାରିଖରେ ହେବାକୁ ଥିବା ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିପକ୍ଷ ମ୍ୟାଚ୍ ପୂର୍ବରୁ ସେ ଫିଟ୍ ହୋଇଯାଇଥିବେ ବୋଲି ପ୍ରକାଶ। ରୋହିତଙ୍କ ବ୍ୟତୀତ ସନରାଇଜର୍ସ ହାଇଦ୍ରାବାଦ ଅଧିନାୟକ ଏଡେନ୍ ମାରାକ୍ରମ ମଧ୍ୟ ଅନୁପସ୍ଥିତ ଥିଲେ। ତେବେ ମାରାକ୍ରମଙ୍କ ସ୍ଥାନରେ କାମଚଳା ଅଧିନାୟକ ଭାବେ ଭୁବନେଶ୍ୱର କୁମାର ଯୋଗ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଚେନ୍ନାଇ ସୁପର କିଙ୍ଗ୍ସର ମହେନ୍ଦ୍ର ସିଂ ଧୋନୀ, ଗୁଜରାଟ ଟାଇଟନ୍ସର ହାର୍ଦ୍ଦିକ୍ ପାଣ୍ଡ୍ୟା, ପଞ୍ଜାବ କିଙ୍ଗ୍ସର ଶିଖର ଧାଓ୍ବନ, କୋଲକାତା ନାଇଟ୍ ରାଇଡର୍ସର ନୀତୀଶ ରାଣା, ଲକ୍ଷ୍ନୌ ସୁପର ଜାଏଣ୍ଟ୍ସର ଲୋକେଶ ରାହୁଲ, ସନରାଇଜର୍ସ ହାଇଦ୍ରାବାଦର ଭୁବନେଶ୍ୱର କୁମାର, ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଫାଫ ଡୁ ପ୍ଲେସିସ୍, ରାଜସ୍ଥାନ ରୟାଲ୍ସର ସଞ୍ଜୁ ସାମସନ୍ ଓ ଦିଲ୍ଲୀ କ୍ୟାପିଟାଲ୍ସର ଡେଭିଡ୍ ଓ୍ବାର୍ନର ଯୋଗ ଦେଇଥିଲେ। ସମସ୍ତ ୯ ଫ୍ରାଞ୍ଚାଇଜିର ଅଧିନାୟକ ଟ୍ରଫି ସହିତ ଫଟୋ ଉଠାଇଥିଲେ।