ଜୟପୁର,୧୭।୧୧: ଟି୨୦ ବିଶ୍ୱକପ ବିପର୍ଯ୍ୟୟକୁ ଭୁଲି ଭାରତୀୟ କ୍ରିକେଟ ଦଳ ଏବେ ନବ ନିଯୁକ୍ତ ଅଧିନାୟକ ରୋହିତ ଶର୍ମା ଓ ମୁଖ୍ୟ କୋଚ୍ ରାହୁଲ ଡ୍ରାଭିଡ୍ଙ୍କ ତତ୍ତ୍ୱାବଧାନରେ ନୂଆ ଆରମ୍ଭ କରିବାକୁ ଯାଉଛି। ଏଥିସହିତ ଆରମ୍ଭ ହେବାକୁ ଯାଉଛି ଭାରତୀୟ କ୍ରିକେଟର ନୂଆ ଯୁଗ। ବୁଧବାର ସ୍ଥାନୀୟ ସବାଇ ମାନସିଂ ଷ୍ଟାଡିୟମରେ ଟି୨୦ ବିଶ୍ୱକପ୍ ରନର୍ସଅପ୍ ନ୍ୟୁଜିଲାଣ୍ଡକୁ ଭେଟିବାକୁ ଯାଉଛି ଭାରତ।
ମାତ୍ର ୧୧ ମାସ ପରେ ଆହୁରି ଏକ ଟି୨୦ ବିଶ୍ୱକପ ହେବାକୁ ଥିବାରୁ ପ୍ରତ୍ୟେକ ମ୍ୟାଚ୍ ଟିମ୍ ଇଣ୍ଡିଆ ପାଇଁ ଗୁରୁତ୍ୱପୂର୍ଣ୍ଣ ହେବ। ଏଣୁ ପୂର୍ବର ତ୍ରୁଟି ସୁଧାରି ଏକ ସମର୍ଥ ଓ ସନ୍ତୁଳିତ ଦଳ ଗଠନ ଉପରେ ଅଧିକ ଧ୍ୟାନ ଦେଉଥିବା ମ୍ୟାଚ୍ ପୂର୍ବରୁ ନୂଆ କୋଚ୍ ଡ୍ରାଭିଡ୍ କହିଛନ୍ତି।
ଟି୨୦ ବିଶ୍ୱକପ୍ରେ ପୂରା ବିଫଳ ହୋଇଥିବା ହାର୍ଦ୍ଦିକ ପାଣ୍ଡ୍ୟାଙ୍କୁ ବାଦ୍ ଦିଆଯାଇ ତାଙ୍କ ବଦଳରେ ନୂଆ ଅଲରାଣ୍ଡର ଖୋଜୁଛି ଟିମ ମ୍ୟାନେଜମେଣ୍ଟ। ବହୁ ସୁଯୋଗ ମିଳିବା ପରେ ମଧ୍ୟ ହାର୍ଦ୍ଦିକଙ୍କ ପ୍ରଦର୍ଶନରେ ସୁଧାର ଆସିନାହିଁ। ଏହି କାରଣରୁ ଆଇପିଏଲରେ ଦମ୍ଦାର ପ୍ରଦର୍ଶନ କରିଥିବା ଅଲରାଉଣ୍ଡର ଭେଙ୍କଟଶ ଆୟାରଙ୍କୁ ଦଳରେ ନିଆଯାଇଛି। ଜଣେ ଫାଷ୍ଟ ବୋଲିଂ ଅଲରାଉଣ୍ଡର ଭାବେ ଆୟାର ନିଜର ଦକ୍ଷତା ପ୍ରତିପାଦନ କରିବାର ସୁଯୋଗ ପାଇବେ। ଯଦି ସଫଳ ହେବେ ସେ ଅଲରାଉଣ୍ଡ ସ୍ଥାନରେ ନିଜର ସ୍ଥିତି ଜାହିର କରିବେ। ଏଣୁ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଟି୨୦ ମ୍ୟାଚ୍ରେ ତାଙ୍କ ଖେଳିବାର ସମ୍ଭାବନା ଅଛି।
