ନୂଆଦିଲ୍ଲୀ,୨୫।୧୧(ପି.ଟି.): ଭାରତୀୟ ତାରକା ଓପନର ରୋହିତ ଶର୍ମା ଓ ଅଭିଜ୍ଞ ଦ୍ରୁତ ବୋଲର ଈଶାନ୍ତ ଶର୍ମା ଆଗାମୀ ଅଷ୍ଟ୍ରେଲିଆ ବିପକ୍ଷ ଟେଷ୍ଟ ସିରିଜର ପ୍ରଥମ ଦୁଇଟି ମ୍ୟାଚ୍ରୁ ବାଦ୍ ପଡିଛନ୍ତି। କେବଳ ସେତିକି ନୁହେଁ ସିରିଜର ବାକି ଦୁଇଟି ଟେଷ୍ଟରେ ଏହି ଦୁହେଁ ଖେଳିବା ନେଇ ଆଶଙ୍କା ସୃଷ୍ଟି ହୋଇଛି ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସୂତ୍ରରୁ ଜଣାଯାଇଛି। ମ୍ୟାଚ୍ ଖେଳିବା ପାଇଁ ଏହି ଦୁଇ ଖେଳାଳି ସମ୍ପୂର୍ଣ୍ଣ ରୂପେ ଫିଟ୍ ହେବା ପାଇଁ ଆହୁରି ପାଖାପାଖି ଗୋଟିଏ ମାସ ସମୟ ଲାଗିବ ବୋଲି ବିସିସିଆଇକୁ ସୂଚନା ଦିଆଯିବା ପରେ ଏହା ସ୍ପଷ୍ଟ ହୋଇଛି।
ଆଘାତଜନିତ ସମସ୍ୟା କାରଣରୁ ଏହି ଦୁଇ ଖେଳାଳି ବେଙ୍ଗାଲୁରୁସ୍ଥିତ ଜାତୀୟ କ୍ରିକେଟ ଏକାଡେମୀ (ଏନ୍ସିଏ)ରେ ଫିଟ୍ନେସ ପାଇଁ ରିହାବିଲିଟେଶନ ପ୍ରକ୍ରିୟାରେ ସାମିଲ ରହିଛନ୍ତି ଓ ଫିଟ୍ ହେବା ପାଇଁ ପ୍ରୟାସ ଜାରି ରଖିଛନ୍ତି। ଏହି ଦୁଇ ଖେଳାଳି ଅଷ୍ଟ୍ରେଲିଆ ଗସ୍ତରେ ଖେଳାଯିବାକୁ ଥିବା ସୀମିତ ଓଭର ସିରିଜରୁ ବାଦ୍ ପଡିସାରିଛନ୍ତି। ପ୍ରଥମେ ଦିନିକିଆ ସିରିଜ ଖେଳାଯିବ ଓ ଏହା ଶୁକ୍ରବାରଠାରୁ ଆରମ୍ଭ ହେବ। ତେବେ ଡିସେମ୍ବର ୧୭ ତାରିଖରୁ ଆରମ୍ଭ ହେବାକୁ ଥିବା ଟେଷ୍ଟ ସିରିଜରେ ଏମାନେ ଖେଳିବା ପାଇଁ ଦଳରେ ସ୍ଥାନ ବଜାୟ ରଖିଛନ୍ତି। ତେବେ କ୍ୱାରାଣ୍ଟାଇନ୍ ନିୟମ କାରଣରୁ ରୋହିତ ଓ ଈଶାନ୍ତ ଖେଳିବା ନେଇ ଅନିଶ୍ଚିତତା ସୃଷ୍ଟି ହୋଇଛି।
ମ୍ୟାଚ୍ ଫିଟ୍ ହେବା ପାଇଁ ରୋହିତ ଓ ଈଶାନ୍ତ ଅତିକମ୍ରେ ଆଉ ୩ରୁ ୪ ସପ୍ତାହ ସମୟ ନେବେ ବୋଲି ଏନ୍ସିଏ ବିସିସିଆଇକୁ ରିପୋର୍ଟ ଦେବା ସହ ଅବଗତ କରାଇଛି। ରୋହିତ ହାମ୍ଷ୍ଟ୍ରିଙ୍ଗ୍ ଇଞ୍ଜୁରିରୁ ମୁକ୍ତ ହୋଇ ଏବେ ବେଶ୍ ଭଲ ଅନୁଭବ କରୁଛନ୍ତି। ତେବେ ଷ୍ଟ୍ରେନ୍ଥ ଓ କଣ୍ଡିଶନିଂ ଉପରେ କାର୍ଯ୍ୟକରୁଛନ୍ତି ବୋଲି ରୋହିତ ଗତ ସପ୍ତାହରେ ପିଟିଆଇକୁ ସାକ୍ଷାତକାର ଦେବା ଅବସରରେ କହିଥିଲେ। ଅନ୍ୟପଟେ ଈଶାନ୍ତ ସାଇଡ୍ ଷ୍ଟ୍ରେନ୍ ଇଞ୍ଜୁରିରୁ ମୁକ୍ତ ହେବା ପାଇଁ ପ୍ରୟାସ ଜାରି ରଖିଛନ୍ତି। ଶକ୍ତ କ୍ୱାରାଣ୍ଟାଇନ ନିୟମ କାରଣରୁ ଟେଷ୍ଟ ସିରିଜ ଖେଳିବାକୁ ହେଲେ ଖେଳାଳିମାନଙ୍କୁ ଆଗାମୀ ୩ରୁ ୪ ଦିନ ମଧ୍ୟରେ ଅଷ୍ଟ୍ରେଲିଆରେ ପହଞ୍ଚିବାକୁ ହେବ। ନ ହେଲେ ଟେଷ୍ଟ ସିରିଜ ଖେଳିବା କଷ୍ଟକର ହେବ ବୋଲି ଭାରତୀୟ କୋଚ୍ ରବି ଶାସ୍ତ୍ରୀ କହିଛନ୍ତି। ଉଲ୍ଲେଖଥାଉ କି, ଆଡିଲେଡ୍ରେ ପ୍ରଥମ ଟେଷ୍ଟ ଖେଳିବା ପରେ କୋହଲି ପ୍ରଥମ ସନ୍ତାନର ପିତା ହେବାକୁ ପିତୃତ୍ୱ ଛୁଟିରେ ସ୍ବଦେଶ ଫେରିବେ। ଗତ ୨୦୧୮-୧୯ ସିରିଜରେ ଭାରତ ଘରୋଇ ଅଷ୍ଟ୍ରେଲିଆକୁ ୨-୧ରେ ଟେଷ୍ଟ ସିରିଜରେ ପରାସ୍ତ କରି ଇତିହାସ ସୃଷ୍ଟି କରିଥିଲା।