ମୁମ୍ବାଇ, ୮ା୫ : ଭାରତୀୟ କ୍ରିକେଟ ଦଳର ଅଧିନାୟକ ରୋହିତ ଶର୍ମାଙ୍କୁ ଟି୨୦ ବିଶ୍ୱକପ୍ ପୂର୍ବରୁ ବିଶ୍ରାମ ଆବଶ୍ୟକ ବୋଲି ମତ ଦେଇଛନ୍ତି ପୂର୍ବତନ ଅଷ୍ଟ୍ରେଲୀୟ ଅଧିନାୟକ ମାଇକେଲ କ୍ଲାର୍କ। ରୋହିତଙ୍କ ଫର୍ମକୁ ନେଇ କୌଣସି ଦ୍ୱିବିଧା ନାହିଁ, ମାତ୍ର ବିଶ୍ୱକପ୍ ପୂର୍ବରୁ ସେ ସତେଜ ରହିବା ଆବଶ୍ୟକ ବୋଲି କ୍ଲାର୍କ କହିଛନ୍ତି। ୩୭ ବର୍ଷୀୟ ରୋହିତ ଇଂଲଣ୍ଡ ସହ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ପରେ ଆଇପିଏଲରେ ଖେଳୁଛନ୍ତି। ଦୀର୍ଘ ସମୟ ଧରି କ୍ରିକେଟ ଖେଳୁଥିବାରୁ ରୋହିତଙ୍କ ଶରୀର ସାମାନ୍ୟ ଥକା ଅନୁଭବ କରିଥାଇପାରେ। ତେଣୁ ସେ କିଛି ଦିନ ବିରତି ନେଇ ସତେଜ ଭାବରେ ବିଶ୍ୱକପ୍କୁ ଓହ୍ଲାଇବା ଉଚିତ ହେବ ବୋଲି କ୍ଲାର୍କ କହିଛନ୍ତି। ଚଳିତ ସିଜନରେ ରୋହିତ ଏକ ଶତକ ହାସଲ କରିଥିଲେ ମଧ୍ୟ କିଛି ମ୍ୟାଚ୍ରେ ତାଙ୍କ ବ୍ୟାଟରୁ ରନ୍ ଆସିନାହିଁ। କୋଲକାତା ବିପକ୍ଷରେ ରୋହିତ ଇମ୍ପାକ୍ଟ ସବ୍ଷ୍ଟିଚ୍ୟୁଟ୍ ଭାବରେ ଖେଳିବା ପରେ ଆହତ ସମସ୍ୟାକୁ ନେଇ ପ୍ରଶ୍ନ ଉଠିଥିଲା। ତେବେ ହାଇଦ୍ରାବାଦ ବିପକ୍ଷରେ ସେ ପୂରା ମ୍ୟାଚ୍ ଖେଳିଥିଲେ। ରୋହିତଙ୍କ ପରି ଖେଳାଳିଙ୍କ ପାଇଁ ଫର୍ମ ଚିନ୍ତାର ବିଷୟ ନୁହେଁ। ରୋହିତ ଏଭଳି ଜଣେ କ୍ଲାସ୍ ଖେଳାଳି ଯିଏକି ଜୋରରେ ମାରିବା ପରିବର୍ତ୍ତେ ବଲ୍କୁ ଟାଇମ୍ କରିବାକୁ ପସନ୍ଦ କରିଥାନ୍ତି। ତେଣୁ ଚିନ୍ତାମୁକ୍ତ ହୋଇ ଟାଇମିଂ ଉପରେ ରୋହିତ ଧ୍ୟାନ ଦେବା ଜରୁରୀ ବୋଲି କହିଛନ୍ତି କ୍ଲାର୍କ। ସେହିପରି ହାଇଦ୍ରାବାଦ ବିପକ୍ଷ ମ୍ୟାଚରେ ଭାରତୀୟ ଦଳର ଉପ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ୩୧ ରନରେ ୩ ଉଇକେଟ ନେଇଥିଲେ। ପାଣ୍ଡ୍ୟା ଫର୍ମକୁ ଫେରିବା ଭାରତ ପାଇଁ ଶୁଭ ସଙ୍କେତ ବୋଲି କ୍ଲାର୍କ କହିଛନ୍ତି। ବିଗତ କିଛି ମ୍ୟାଚରେ ହାର୍ଦ୍ଦିକ ନିଜ ବୋଲିଂରେ କିଛି ପରିବର୍ତ୍ତନ କରିଛନ୍ତି, ଯାହାର ଫାଇଦା ତାଙ୍କୁ ମିଳିଛି। ହାର୍ଦ୍ଦିକ ବାଉନ୍ସରର ଠିକ୍ ଉପଯୋଗ କରୁଥିବା ଦେଖିବାକୁ ମିଳିଛି। ଯାହା କେବଳ ମୁମ୍ବାଇ ପାଇଁ ନୁହେଁ ବରଂ ଭାରତୀୟ ଦଳ ପାଇଁ ଶୁଭ ସଙ୍କେତ ବୋଲି କହିଛନ୍ତି କ୍ଲାର୍କ।
