ନୂଆଦିଲ୍ଲୀ,୫।୧: ଭାରତୀୟ କ୍ରିକେଟ ଟିମର ମେରୁଦଣ୍ଡ ଅଧିନାୟକ ରୋହିତ ଶର୍ମା ଏବଂ ବିରାଟ କୋହଲି ଟି୨୦ ସିରିଜ ଖେଳିବାକୁ ଇଛୁକ ଥିବା ବିସିସିଆଇକୁ ଜଣାଇଛନ୍ତି। ୨୦୨୨ ଟି୨୦ ବିଶ୍ୱକପ ପରେ ଦୁହେଁ କୌଣସି ଟି୨୦ ମ୍ୟାଚ୍ ଖେଳି ନାହାନ୍ତି।
ଆଫଗାନିସ୍ତାନ ବିପକ୍ଷ ତିନି ଟି -୨୦ ମ୍ୟାଚ୍ ଏବଂ ଇଂଲଣ୍ଡ ବିପକ୍ଷ ପ୍ରଥମ ଦୁଇଟି ଟେଷ୍ଟ ପାଇଁ ଦଳ ଚୟନ କରିବାକୁ ଚୟନ କମିଟି ଶୁକ୍ରବାର ଦିନ ବୈଠକ କରିବ। ଆଫଗାନିସ୍ତାନ ବିପକ୍ଷ ସିରିଜ୍ ଜାନୁୟାରୀ ୧୧ ରୁ ଆରମ୍ଭ ହେବାକୁଥିବା ବେଳେ ଇଂଲଣ୍ଡ ବିପକ୍ଷରେ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଜାନୁୟାରୀ ୨୫ ରୁ ଆରମ୍ଭ ହେବ। ଚଳିତ ବର୍ଷ ଜୁନ ମାସରେ ହେବାକୁ ଥିବା ବିଶ୍ୱକପ ପୂର୍ବରୁ ଭାରତ ଆଫଗାନିସ୍ତା ବିପକ୍ଷ କେବଳ ତିନି ଟି -୨୦ ମ୍ୟାଚ୍ ଖେଳିବ।
ଅନ୍ୟପଟେ ହାର୍ଦ୍ଦିକ ପାଣ୍ଡ୍ୟା ଏବଂ ସୂର୍ଯ୍ୟକୁମାର ଯାଦବ ଆହତ ସମସ୍ୟା ପାଇଁ ଆଫଗାନିସ୍ଥାନ ବିପକ୍ଷ ଟି୨୦ ସିରିଜ ପାଇଁ ଉପଲବ୍ଧ ହୋଇ ନପାରନ୍ତି। ସେହିପରି ଆଫଗାନିସ୍ଥାନ ସିରିଜରୁ ବରିଷ୍ଠ ବୋଲର ଯଶପ୍ରୀତ ବୁମରା ଏବଂ ମହମ୍ମଦ ସିରାଜଙ୍କୁ ବିଶ୍ରାମ ଦେଇପାରେ ବିସିସିଆଇ। ଉଭୟ ଦକ୍ଷିଣ ଆଫ୍ରିକା ସିରିଜରେ ଭାରତୀୟ ଦଳ ପାଇଁ ସୁନ୍ଦର ପ୍ରଦର୍ଶନ କରିଥିଲେ। ତେବେ ଆଗକୁ ହେବାକୁ ଥିବା ଇଂଲଣ୍ଡ ବିପକ୍ଷ ଟେଷ୍ଟ ସିରଜ ପାଇଁ ଉପଲବ୍ଧ ରହିବେ।