ଅହମ୍ମଦାବାଦ୍,୧୯।୧୧: ଦିନିକିଆ ବିଶ୍ୱକପ ୨୦୨୩ର ଫାଇନାଲରେ ଭାରତ ପରାଜୟର ସମ୍ମୁଖୀନ ହୋଇଛି। ଅଷ୍ଟ୍ରେଲିଆ ଟିମ ଇଣ୍ଡିଆକୁ ୬ ଉଇକେଟରେ ପରାସ୍ତ କରି ଷଷ୍ଠ ଥର ପାଇଁ ଦିନିକିଆ ବିଶ୍ୱକପ ଜିତିଥିଛି। ଏଥି ସହିତ ଟିମ ଇଣ୍ଡିଆ ଆଇସିସି ଟ୍ରଫି ଜିତିବାର ଆଉ ଏକ ସୁବର୍ଣ୍ଣ ସୁଯୋଗ ହାତଛଡା କରିଛି। ଭାରତ ଟୁର୍ନାମେଣ୍ଟରେ ଚମତ୍କାର ଖେଳିଥିଲା ଏବଂ ଅପରାଜିତ ରହି ଫାଇନାଲରେ ପ୍ରବେଶ କରିଥିଲା, କିନ୍ତୁ ଟାଇଟଲ ମ୍ୟାଚରେ ପରାଜୟ ସମସ୍ତ ପ୍ରଶଂସକଙ୍କ ତଥା ଖେଳାଳିଙ୍କ ହୃଦୟ ଭାଙ୍ଗି ଦେଇଥିଲା।
ଭାରତର ପରାଜୟ ପରେ ସମସ୍ତ ଖେଳାଳି ନିରାଶ ହୋଇଥିଲେ। କ୍ୟାପଟେନ ରୋହିତ ଶର୍ମା ଏବଂ ମହମ୍ମଦ ସିରାଜ ଭାବପ୍ରବଣ ହୋଇପଡିଥିଲେ। ସେମାନେ ପଡିଆରେ କାନ୍ଦିଥିଲେ। ରୋହିତ ଶର୍ମା କାନ୍ଦି କାନ୍ଦି ଡ୍ରେସିଂ ରୁମକୁ ଯାଇଥିବାବେଳେ ଜସପ୍ରୀତ ବୁମରା ସିରାଜଙ୍କୁ ଶାନ୍ତ କରୁଥିବା ଦେଖିବାକୁ ମିଳିଥିଲା। ଏହି ପରାଜୟ ପରେ ବିରାଟ କୋହଲି ମଧ୍ୟ ବହୁତ ନିରାଶ ହୋଇଥିଲେ। ଖେଳାଳିଙ୍କ ସ୍ତ୍ରୀ ଏବଂ ପ୍ରଶଂସକମାନେ ମଧ୍ୟ ସେମାନଙ୍କ ଲୁହକୁ ନିୟନ୍ତ୍ରଣ କରିପାରି ନ ଥିଲେ।