ନାଗପୁର,୮।୨: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଚାରି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଗୁରୁବାରଠାରୁ ଆରମ୍ଭ ହେବ। ପ୍ରଥମ ମ୍ୟାଚ ନାଗପୁରର ବିଦର୍ଭ କ୍ରିକେଟ ଆସୋସିଏସନ ଷ୍ଟାଡିୟମରେ ଖେଳାଯିବ। କଙ୍ଗାରୁ ଦଳ ମଧ୍ୟରେ ସିରିଜ ଆରମ୍ଭ ହେବା ପୂର୍ବରୁ ଭାରତୀୟ ସ୍ପିନରଙ୍କୁ ନେଇ ଭୟ ରହିଛି। ଏହି କାରଣରୁ ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ୍ମାନେ ବେଙ୍ଗାଲୁରୁରେ ଅଭ୍ୟାସ ଅଧିବେଶନରେ ସ୍ପିନ ବୋଲରଙ୍କ ବିପକ୍ଷରେ ଅଧିକ ଅଭ୍ୟାସ କରିଥିଲେ। କେବଳ ଏତିକି ନୁହେଁ, ଅଷ୍ଟ୍ରେଲୀୟ ଗଣମାଧ୍ୟମ ଆଉ ଏକ ପାଦ ଆଗକୁ ଯାଇ ନାଗପୁର ପିଚ୍କୁ ଟାମ୍ପରିଂ କରାଯାଇଛି ବୋଲି ଅଭିଯୋଗ କରିଛନ୍ତି। କିଛି ଅଷ୍ଟ୍ରେଲୀୟ ସାମ୍ବାଦିକ ତଥା ପୂର୍ବତନ କ୍ରିକେଟର ଅନୁଭବ କରୁଛନ୍ତି ଯେ ଭାରତ ଭିନ୍ନ ଭିନ୍ନ ପିଚ ପ୍ରସ୍ତୁତ କରୁଛି।
ବୁଧବାର ସାମ୍ବାଦିକ ସମ୍ମିଳନୀରେ ଏନେଇ ଭାରତ ଅଧିନାୟକ ରୋହିତ ଶର୍ମାଙ୍କୁ ପଚରାଯିବାରୁ ସେ ଅଷ୍ଟ୍ରେଲିଆକୁ ଦୃଢ ଜବାବ ଦେଇଛନ୍ତି। ରୋହିତ କହିଛନ୍ତି ଯେ ପିଚ ନୁହେଁ, ମ୍ୟାଚ ଉପରେ ଧ୍ୟାନ ଦିଆଯିବା ଉଚିତ୍। ପଡ଼ିଆରେ ଖେଳୁଥିବା ସମସ୍ତ ୨୨ ଖେଳାଳି ସବୁପ୍ରକାର ପଅରିସ୍ଥିତିରେ ଖେଳିବାକୁ ସକ୍ଷମ। ନାଗପୁର ପିଚ୍ ସ୍ପିନରମାନଙ୍କୁ ସାହାଯ୍ୟ କରିବ। ଯୋଜନା ଏବଂ ପଦ୍ଧତି ରହିବା ଗୁରୁତ୍ୱପୂର୍ଣ୍ଣ। ସମସ୍ତଙ୍କର ପଦ୍ଧତି ଅଲଗା। ତେଣୁ ସମସ୍ତେ ପରିସ୍ଥିତି ଅନୁଯାୟୀ ଖେଳିବେ। ଭାରତୀୟ ଦଳ ୨୦୦୮ ପରେ ନାଗପୁରରେ ଅଷ୍ଟ୍ରେଲିଆ ବିପକ୍ଷରେ ଖେଳିବ। ଶେଷ ଥର ପାଇଁ ଟିମ ଇଣ୍ଡିଆ ଏହି ଗ୍ରାଉଣ୍ଡରେ କଙ୍ଗାରୁ ଦଳକୁ ପରାସ୍ତ କରିଥିଲା।