ଆବୁଧାବି, ୬।୧୦: ଚଳିତ ଆଇପିଏଲ୍ର ବିଂଶତମ ମ୍ୟାଚରେ ମଙ୍ଗଳବାର ମୁମ୍ବାଇ ଇଣ୍ଡିଆନ୍ସର ମୁକାବିଲା ରାଜସ୍ଥାନ ରୟାଲ୍ସ ସହ ହେବ। ଏହି ଅବସରରେ ମୁମ୍ବାଇ ଅଧିନାୟକ ରୋହିତ୍ ଶର୍ମାଙ୍କ ନିକଟରେ ସୁରେଶ ରାଇନାଙ୍କ ଏକ ଆଇପିଏଲ୍ ରେକର୍ଡକୁ ପଛରେ ପକାଇବାର ସୁଯୋଗ ରହିଛି। ଆଇପିଏଲ୍ ଇତିହାସରେ ଭାରତୀୟ ବ୍ୟାଟ୍ସମ୍ୟାନ ଭାବେ ସର୍ବାଧିକ ଅର୍ଦ୍ଧଶତକ ଉଭୟ ରୋହିତ୍ ଓ ରାଇନାଙ୍କ ନାମରେ ରହିଛି। ଉଭୟ ବର୍ତ୍ତମାନ ସୁଦ୍ଧା ୩୮ଟି ଲେଖାଏ ଅର୍ଦ୍ଧଶତକ ହାସଲ କରିସାରିଛନ୍ତି। ଯଦି ମଙ୍ଗଳବାର ମ୍ୟାଚ୍ରେ ରୋହିତ୍ ୫୦ କିମ୍ବା ଏହାଠାରୁ ଅଧିକ ରନ୍ ସଂଗ୍ରହ କରନ୍ତି ତେବେ ଆଇପିଏଲ୍ରେ ଭାରତୀୟ ବ୍ୟାଟ୍ସମ୍ୟାନ ଭାବେ ସର୍ବାଧିକ ଅର୍ଦ୍ଧଶତକ ହାସଲ କରିବାର କୀର୍ତ୍ତିମାନ କରିବେ। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଅଧିନାୟକ ବିରାଟ କୋହଲି (୩୭ ଅର୍ଦ୍ଧଶତକ) ଏହି ତାଲିକାର ୩ୟ ସ୍ଥାନରେ ରହିଛନ୍ତି। କିନ୍ତୁ ଆଇପିଏଲ୍ରେ ସର୍ବାଧିକ ଅର୍ଦ୍ଧଶତକ ରେକର୍ଡ ସନ୍ରାଇଜର୍ସ ହାଇଦ୍ରାବାଦର ଓପନର୍ ଡେଭିଡ୍ ଓ୍ବାର୍ନର (୪୫)ଙ୍କ ନାମରେ ରହିଛି।