ନୂଆଦିଲ୍ଲୀ,୧୩।୧୨: ଆଧୁନିକ ଯୁଗର ସର୍ବଶ୍ରେଷ୍ଠ ବ୍ୟାଟ୍ସମ୍ୟାନଙ୍କ ମଧ୍ୟରୁ ରୋହିତ ଶର୍ମା ଜଣେ। ଏକଦା ମଧ୍ୟ ବର୍ଗରେ ବ୍ୟାଟିଂ କରିବାକୁ ଆସୁଥିବା ଏହି କ୍ରିକେଟର ଏବେ ଓପନର ଭାବେ ନିଜକୁ ପ୍ରମାଣିତ କରିଛନ୍ତି। ରୋହିତଙ୍କ ଉପଲବ୍ଧି ମଧ୍ୟରୁ ଦିନିକିଆ କ୍ରିକେଟରେ ଦ୍ୱିଶତକ ମାରିବା ଗୋଟିଏ। ୨୦୧୦ରେ ସଚିନ ତେନ୍ଦୁଲକର ଏହି କାରନାମା କରିଦେଖାଇଥିଲେ। ସେତେବେଳେ ଅନ୍ୟ କେହି ଏହା କରିଦେଖାଇପାରିବ ଆଶା କରି ନ ଥିଲେ। ହେଲେ ରୋହିତ ୩ଟି ଦ୍ୱିଶତକ ନିଜ ନାମରେ କରିଛନ୍ତି। ସେଥିରୁ ଶ୍ରୀଲଙ୍କା ବିପକ୍ଷରେ ୨ଟି ଥିବା ବେଳେ ଅଷ୍ଟ୍ରେଲିଆ ବିପକ୍ଷରେ ଗୋଟିଏ ରହିଛି।
୨୦୧୭ ଡିସେମ୍ବର ୧୩ ତାରିଖରେ ମୋହାଲିରେ ଶ୍ରୀଲଙ୍କା ବିପକ୍ଷରେ ତିନି ମ୍ୟାଚ୍ ବିଶିଷ୍ଟ ସିରିଜର ଦ୍ୱିତୀୟ ମ୍ୟାଚ୍ ଖେଳାଯାଉଥିଲା। ଅତିଥି ଟିମ୍ ଧର୍ମଶାଳାରେ ଖେଳାଯାଇଥିବା ପ୍ରଥମ ମ୍ୟାଚ୍ରେ ଭାରତକୁ ୧୧୩ ରନ୍ରେ ଅଲଆଉଟ୍ କରି ମୁକାବିଲା ଜିତି ନେଇଥିଲା। ଦ୍ୱିତୀୟ ମ୍ୟାଚ୍ରେ ରୋହିତ ନିଜର ତୃତୀୟ ଦ୍ୱିଶତକ ମାରିଥିଲେ।
ଉକ୍ତ ମ୍ୟାଚ୍ଟିରେ ରୋହିତ ଅଧିନାୟକ ଥିଲେ। କାରଣ ବିରାଟ ଛୁଟିରେ ଥିଲେ। ଭାରତୀୟ ଟିମ୍ ଶ୍ରୀଲଙ୍କା ଗସ୍ତରେ ଖରାପ ପ୍ରଦର୍ଶନ କରୁଥିବାରୁ ସେତେବେଳେ ରୋହିତଙ୍କୁ ସମାଲୋଚନା କରାଯାଉଥିଲା। ଏପରିକି ଶୀଘ୍ର ବିରାଟଙ୍କୁ ଅଣାଯାଉ ବୋଲି କୁହାଯାଉଥିଲା। ମାତ୍ର ରୋହିତ ଦ୍ୱିଶତକ ମାରି ସମସ୍ତଙ୍କୁ ଚୁପ୍ କରାଇଦେଇଥିଲେ। ମ୍ୟାଚ୍ରେ ରୋହିତ ୨୦୮ ରନ୍ କରିଥିବା ବେଳେ ଭାରତ ୫୦ ଓଭରରେ ୩୯୨ ରନ୍ କରିଥିଲା। ରୋହିତଙ୍କୁ ତୃତୀୟ ଦ୍ୱିଶତକ ପୁରଣ କରୁଥିବା ଦେଖି ସ୍ତ୍ରୀ ରିତିକା ସଜଦେହ କାନ୍ଦି ପକାଇଥିଲେ। ରୋହିତ ନିଜ ଆଙ୍ଗୁଠିକୁ ଗେଲ କରି ସ୍ତ୍ରୀଙ୍କୁ ବିବାହବାର୍ଷିକୀର ଉପହାର ଦେଇଥିଲେ।