ଅହମ୍ମଦାବାଦ,୨୫।୨: ଭାରତ-ଇଂଲଣ୍ଡ ମଧ୍ୟରେ ଚାଲିଥିବା ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ତୃତୀୟ ଟେଷ୍ଟ ଅହମ୍ମଦାବାଦର ନବନିର୍ମିତ ନରେନ୍ଦ୍ର ମୋଦି ଷ୍ଟାଡିୟମରେ ଖେଳାଯାଉଛି। ପ୍ରଥମ ଦିନରେ ଟସ ଜିତିବା ପରେ ଇଂଲଣ୍ଡ ବ୍ୟାଟିଂ କରିଥିଲା। କିନ୍ତୁ ପୂରା ଦଳ ମାତ୍ର ୧୧୨ ରନ୍ରେ ଆଉଟ୍ ହୋଇଯାଇଥିଲା। ଭାରତ ପକ୍ଷରୁ ଅକ୍ଷର ପଟେଲ ୬ ଓ ରବିଚନ୍ଦ୍ରନ ଅଶ୍ୱିନ ୩ ଉଇକେଟ ନେଇଥିଲେ। ପିଙ୍କ୍ ବଲ ଟେଷ୍ଟରେ ୫ ଉଇକେଟ ନେବାରେ ଅକ୍ଷର ପ୍ରଥମ ଭାରତୀୟ ସ୍ପିନର ହୋଇଥିଲେ। ବୋଲିଂ ପରେ ରୋହିତ ଶର୍ମା ମଧ୍ୟ ବ୍ୟାଟିଂରେ ରେକର୍ଡ ସୃଷ୍ଟି କରିଥିଲେ। ସେ ନିଜ ମାଟିରେ ଅନ୍ତର୍ଜାତୀୟ କ୍ରିକେଟରେ ୬ ହଜାର ରନ ପୂରଣ କରିଥିଲେ। ଏପରି କରିବାରେ ସେ ହେଉଛନ୍ତି ନବମ ଭାରତୀୟ ବ୍ୟାଟ୍ସମ୍ୟାନ। ତାଙ୍କ ପୂର୍ବରୁ ସଚିନ ତେନ୍ଦୁଲକର (୧୪୧୯୨ ରନ), ବିରାଟ କୋହଲି (୯୬୮୮ରନ), ରାହୁଲ ଦ୍ରାବିଡ (୯୦୦୪ ରନ), ବୀରେନ୍ଦ୍ର ସେହ୍ବାଗ (୭୭୯୬ ରନ), ମହେନ୍ଦ୍ର ସିଂ ଧୋନୀ (୭୫୭୫ରନ), ମହମ୍ମଦ ଅଜହରୁଦ୍ଦିନ (୬୫୭୫ ରନ), ସୌରଭ ଗାଙ୍ଗୁଲି (୬୪୧୦ ରନ), ସୁନୀଲ ଗାଭାସ୍କର (୬୨୫୯ ରନ) ଏପରି କରିଛନ୍ତି।
ଏହା ବ୍ୟତୀତ ରୋହିତ ମଧ୍ୟ ତାଙ୍କ ନାମରେ ଆଉ ଏକ ରେକର୍ଡ ସୃଷ୍ଟି କରିଛନ୍ତି। ସେ ଟେଷ୍ଟ, ଏକଦିବସୀୟ ଏବଂ ଟି -୨୦ ଫର୍ମାଟରେ ଅଢେଇ ହଜାରରୁ ଅଧିକ ରନ ସ୍କୋର କରିବାରେ ତୃତୀୟ ବ୍ୟାଟ୍ସମ୍ୟାନ ହୋଇଥିଲେ। ବିରାଟ କୋହଲି ଏବଂ ମାର୍ଟିନ ଗୁପ୍ତିଲ ମଧ୍ୟ ଆଗରୁ ଏହା କରିସାରିଛନ୍ତି। ବିଶ୍ୱ ଟେଷ୍ଟ ଚାମ୍ପିୟନଶିପ୍ରେ ରୋହିତ ମଧ୍ୟ ଏକ ହଜାର ରନ ସ୍କୋର କରିବାର ନିକଟତର ହୋଇଛନ୍ତି। ସେ ଏପର୍ଯ୍ୟନ୍ତ ୧୦ଟି ମ୍ୟାଚରେ ୯୦୦ରୁ ଅଧିକ ରନ ସଂଗ୍ରହ କରିଛନ୍ତି। ଅଜିଙ୍କେ ରାହାଣେ ହେଉଛନ୍ତି ଏକମାତ୍ର ବ୍ୟାଟ୍ସମ୍ୟାନ ଯିଏକି ଭାରତ ପାଇଁ ଡବ୍ଲୁଟିଏସିରେ ଏକ ହଜାରରୁ ଅଧିକ ରନ ସ୍କୋର କରିଛନ୍ତି। ସେ ଏପର୍ଯ୍ୟନ୍ତ ୧୦୬୧ ରନ ସଂଗ୍ରହ କରିଛନ୍ତି। ରୋହିତ ଡବ୍ଲୁଟିସି ଅଧୀନରେ ଦଶମ ମ୍ୟାଚ ଖେଳୁଛନ୍ତି। ଏଥିରେ ସେ ଚାରି ଶତକ ଏବଂ ଅର୍ଦ୍ଧଶତକ ହାସଲ କରିଛନ୍ତି।
