ନୂଆଦିଲ୍ଲୀ,୩୦।୧୨: ମେଲବର୍ନ ଟେଷ୍ଟରେ ଭାରତୀୟ ଦଳକୁ ପରାଜୟର ସମ୍ମୁଖୀନ ହେବାକୁ ପଡିଛି। ଅଷ୍ଟ୍ରେଲିଆ ପଞ୍ଚମ ଦିନରେ ୧୮୪ ରନ ବ୍ୟବଧାନରେ ଭାରତକୁ ପରାସ୍ତ କରିଛି। ଏହି ପରାଜୟ ପରେ ଭାରତୀୟ ଅଧିନାୟକ ରୋହିତ ଶର୍ମାଙ୍କ ଅବସର ଖବର କ୍ରମାଗତ ଭାବେ ଚର୍ଚ୍ଚାରେ ଅଛି। କିନ୍ତୁ ବର୍ତ୍ତମାନ ସେ ସମସ୍ତ କଳ୍ପନାଜଳ୍ପନାକୁ ପ୍ରତ୍ୟାଖ୍ୟାନ କରିଛନ୍ତି। ରୋହିତ ଶର୍ମା କହିଛନ୍ତି ଯେ ମୁଁ ପୂର୍ବରୁ ଜାଣି ନାହିଁ କ’ଣ ହୋଇଛି? କିନ୍ତୁ ଏହା ସତ୍ୟ ଯେ ଅଧିନାୟକ ତଥା ବ୍ୟାଟ୍ସମ୍ୟାନ ଭାବରେ କିଛି ଫଳାଫଳ ନିରାଶାଜନକ ଅଟେ। ଏହାକୁ ନେଇ ମୁଁ ଚିନ୍ତାରେ ଅଛି।
ରୋହିତ ଶର୍ମା କହିଛନ୍ତି ଯେ ଏହି ପରାଜୟ ମାନସିକ ସ୍ତରରେ ବିଚଳିତ କରିବ, ଏଥିରେ କୌଣସି ସନ୍ଦେହ ନାହିଁ। ଯଦି ରଣନୀତି ସଠିକ ଭାବରେ କାର୍ଯ୍ୟକାରୀ କରିବାରେ ବିଫଳ ହୁଏ, ତେବେ ନିରାଶା ସ୍ବାଭାବିକ, ଏହା ଏକ ନିରାଶାଜନକ ମୁହୂର୍ତ୍ତ । ଏଥି ସହିତ ରୋହିତ ଶର୍ମା ତାଙ୍କ ଅବସର ନେଇଥିବା କଳ୍ପନାକୁ ସମ୍ପୂର୍ଣ୍ଣ ରୂପେ ପ୍ରତ୍ୟାଖ୍ୟାନ କରିଛନ୍ତି। ଅବସର ନେଇଥିବା ପ୍ରଶ୍ନ ଉପରେ ସେ କହିଛନ୍ତି ଯେ ଆଜି ମୁଁ ଯେଉଁଠାରେ ଅଛି ସେଠାରେ ରହିଛି, ମୋତେ ବ୍ୟକ୍ତିଗତ ତଥା ଦଳ ସ୍ତରରେ ଉନ୍ନତ କାର୍ଯ୍ୟ କରିବା ଆବଶ୍ୟକ।
ଟି-୨୦ ବିଶ୍ୱକପ ଜିତିବା ପରେ ରୋହିତ ଏହି ଫର୍ମାଟକୁ ଅଲବିଦା କହିଥିଲେ। ସେ କେବଳ ଦିନିକିଆ ଓ ଟେଷ୍ଟ ଖେଳୁଛନ୍ତି। କିନ୍ତୁ ଟେଷ୍ଟରେ ରୋହିତଙ୍କ ସେହି ଜଲୱା ନାହିଁ। ପିଙ୍କ ବଲ ଟେଷ୍ଟରେ ଭାରତ ହାରିଥିବା ବେଳେ ଗାବାରେ କଷ୍ଟମଷ୍ଟେ ମ୍ୟାଚ ଡ୍ର ହୋଇଥିଲା। ଆଜି ମେଲବର୍ନ ଟେଷ୍ଟରେ ଭାରତ ୧୮୪ ରନରେ ଅଷ୍ଟ୍ରେଲିଆ ଠାରୁ ହାରିଛି। ଏହି ପରାଜୟ ଭାରତୀୟଙ୍କୁ ବେଶ ବାଧିଛି। କାରଣ ଆଜିର ପରାଜୟ ପରେ ଭାରତର ବିଶ୍ୱ ଟେଷ୍ଟ ଚାମ୍ପିୟନଶିପ ଫାଇନାଲ ଖେଳିବାର ସ୍ବପ୍ନ ମଧ୍ୟ ଏକପ୍ରକାରର ଧୂଳିସାତ ହୋଇଯାଇଛି।
