କୋଲକାତା,୨୧।୧୧: ଐତିହାସିକ ଇଡେନ ଗାର୍ଡେନ୍ସରେ ଚାଲିଥିବା ନ୍ୟୁଜିଲାଣ୍ଡ ବିପକ୍ଷ ତୃତୀୟ ତଥା ଅନ୍ତିମ ଟି୨୦ ମ୍ୟାଚ୍ରେ ରୋହିତ ଶର୍ମାଙ୍କୁ ଛାଡ଼ି ଦେଲେ ଫେଲ୍ ମାରିଛନ୍ତି ପ୍ରତ୍ୟେକ ଭାରତୀୟ ବ୍ୟାଟର। ରୋହିତ ୩୧ ବଲରେ ୫୬ ରନ୍ର ଇନିଂସ ଖେଳିଥିଲେ। ତାଙ୍କ ପାଳିରେ ଥିଲା ୫ ଚୌକା ଓ ୩ ଛକା। ଉପଅଧିନାୟକ ଲୋକେଶ ରାହୁଲଙ୍କ ବଦଳରେ ଖେଳିଥିବା ଇଶାନ କିଷନ ୨୯ (୬ ଚୌକା) ରନ୍ କରିଥିଲେ। ଦୁହେଁ ପାଓ୍ବରପ୍ଲେରେ ୬୯ ରନ୍ ଯୋଡ଼ିଥିଲେ। କିନ୍ତୁ ମଧ୍ୟକ୍ରମର ପ୍ରତ୍ୟେକ ବ୍ୟାଟର ବିଫଳ ହୋଇଥିଲେ। ସୂର୍ଯ୍ୟକୁମାର ଯାଦବ ଖାତା ଖୋଲି ପାରି ନ ଥିବାବେଳେ ରିଷଭ ପନ୍ତ ୪, ଶେୟାସ ଆୟାର ୨୫, ଭେଙ୍କଟଶ ଆୟାର ୨୦ ରନ୍ କରି ପ୍ୟାଭେଲିଅନ ଫେରିଥିଲେ। ୧୬.୧ ଓଭର ସୁଦ୍ଧା ଭାରତ ୧୪୦ ରନ୍ରେ ୬ ଉଇକେଟ ହରାଇ ସାରିଥିଲା। ଲାଗୁଥିଲା ଟିମ୍ ଇଣ୍ଡିଆ ୧୭୦ ପାର କରିପାରିବ ନାହିଁ।
ମାତ୍ର ଶେଷ ଆଡ଼କୁ ହର୍ଶଲ ପଟେଲ (୧୮ ରନ୍, ୨ ଚୌକା ଓ ୧ ଛକା) ଓ ଦୀପକ ଚହର (୨୧ ରନ୍, ୨ ଚୌକା ଓ ୧ ଛକା)ଙ୍କ ପାଇଁ ଭାରତ ୨୦ ଓଭରରେ ୭ ଉଇକେଟ ହରାଇ ୧୮୪ ରନ୍ କରିବାକୁ ସକ୍ଷମ ହୋଇଛି। ନ୍ୟୁଜିଲାଣ୍ଡ ପାଇଁ ଅଧିନାୟକ ମିଚେଲ ସାଣ୍ଟନର ୩ ଉଇକେଟ ନେଇଥିଲେ।
