ଓଭାଲ,୪।୯: ଶନିବାର ଖେଳ ଆରମ୍ଭରୁ ଜୀବନଦାନ ପାଇଥିଲେ ରୋହିତ। ଖୋଲା ହାତରେ ସେ ଏହାର ଫାଇଦା ଉଠାଇ ଥିଲେ। ୨୫୬ ବଲରେ ଖେଳିଥିଲେ ୧୨୭ ରନ୍ର ଲଢ଼ୁଆ ଇନିଂସ। ରୋହିତଙ୍କ କ୍ୟାରିୟରର ୮ମ ଟେଷ୍ଟ ଶତକରେ ସାମିଲ ଥିଲା ୧୪ ଚୌକା ଓ ଏକ ଛକା। ତାଙ୍କ ଶତକ ଯୋଗୁ ପ୍ରଥମ ଦୁଇ ଦିନର ସଂଘର୍ଷ ପରେ ଓଭାଲ ଟେଷ୍ଟରେ ଟିମ୍ ଇଣ୍ଡିଆର ସ୍ଥିତି ସୁଦୃଢ଼ ହୋଇପାରିଛି। ତୃତୀୟ ଦିନ ଶେଷ ସୁଦ୍ଧା ଭାରତ ୩ ଉଇକେଟ ହରାଇ ୨୭୦ ରନ୍ କରିଛି। ଏବେ ୧୭୧ ରନ୍ରେ ଆଗୁଆ ଥିବା ବିରାଟ କୋହଲିଙ୍କ ନେତୃତ୍ୱାଧୀନ ଦଳ ହାତରେ ଆହରି ୭ ଉଇକେଟ ରହିଛି। ପୂର୍ବରୁ ପ୍ରଥମ ଇନିଂସରେ ଭାରତ ୧୯୧ ରନ୍ କରିଥିବା ବେଳେ ଇଂଲଣ୍ଡ ୨୯୦ ରନ୍ କରିଥିଲା।
ପ୍ରଥମେ ଲୋକେଶ ରାହୁଲ (୪୬)ଙ୍କ ସହ ରୋହିତ ମିଶି ପ୍ରଥମ ଉଇକେଟ ପାଇଁ ଯୋଡ଼ିଥିଲେ ୮୩ ରନ୍। ତା’ ପରେ ଦ୍ୱିତୀୟ ଉଇକେଟ ଲାଗି ଚେତେଶ୍ୱର ପୂଜାରା (୬୧) ଓ ରୋହିତ ଦଳୀୟ ସ୍କୋରରେ ଯୋଡ଼ିଥିଲେ ୧୫୩ ରନ୍। ଦୁହିଁଙ୍କୁ ଗୋଟିଏ ଓଭରରେ ପ୍ୟାଭିଲିଅନ ଫେରାଇଥିଲେ ଓଲି ରବିନସନ। ଏହାପର ଠାରୁ ଅଧିନାୟକ କୋହଲି ଓ ରବୀନ୍ଦ୍ର ଜାଡେଜା ଘରୋଇ ବୋଲରଙ୍କୁ ଆଉ ଉଇକେଟ ନେବାକୁ ଦେଇ ନ ଥିଲେ। ଆଲୋକ ଅଭାବ କାରଣରୁ ଅଧ ଘଣ୍ଟା ପୂର୍ବରୁ ଖେଳ ଶେଷ ହୋଇଥିଲା। ଷ୍ଟମ୍ପ ଅପସାରଣ ବେଳକୁ ଭାରତ ୩ ଉଇକେଟ ହରାଇ ୨୭୦ ରନ୍ କରିଛି। କୋହଲି ୨୨ ଓ ଜାଡେଜା ୯ ରନ୍ କରି ଅପରାଜିତ ଅଛନ୍ତି।