କଟକ,୩୦।୧: ଭାରତୀୟ କଷ୍ଟ୍ ଆକାଉଣ୍ଟାଣ୍ଟ୍ସ ପ୍ରତିଷ୍ଠାନର ପୂର୍ବ ଭାରତ ଆଞ୍ଚଳିକ ପରିଷଦ ଏବଂ କଟକ-ଜଗତ୍ସିଂହପୁର-କେନ୍ଦ୍ରାପଡ଼ା ଚାପ୍ଟର ଆନୁକୂଲ୍ୟରେ ୪୨ତମ ରିଜିଓନାଲ କଷ୍ଟ୍ କନ୍ଫରେନ୍ସ-୨୦୨୩ର ଆୟୋଜନ କରାଯାଇଥିଲା। ଏପରିକି ଏକ ୨ଦିନିଆ ଜାତୀୟ କର୍ମଶାଳା ସ୍ଥାନୀୟ ରେଭେନ୍ଶା ବିଶ୍ୱବିଦ୍ୟାଳୟର ସମ୍ମିଳନୀ କକ୍ଷରେ ଉଦ୍ଘାଟିତ ହୋଇଯାଇଛି। ଉକ୍ତ ସମ୍ମିଳନୀରେ ପୂଜ୍ୟ ସ୍ବାମୀ ପରମହଂସ ପ୍ରଜ୍ଞାନାନନ୍ଦ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ସମ୍ମାନିତ ଅତିଥି ଭାବେ ଏମ୍ପି ସୁଜିତ୍ କୁମାର, ଇରେଡା ଅଧ୍ୟକ୍ଷ ପ୍ରଦୀପ କୁମାର ଦାସ, ପ୍ରତିଷ୍ଠାନର ଜାତୀୟ କାର୍ଯ୍ୟକାରିଣୀ ଅଧ୍ୟକ୍ଷ ନିରଞ୍ଜନ ମିଶ୍ର ଏବଂ ପୂର୍ବାଞ୍ଚଳ ପରିଷଦର ଅଧ୍ୟକ୍ଷ ବିଭୂତି ଭୂଷଣ ନାୟକ ପ୍ରମୁଖ ଯୋଗଦାନ କରିଥିଲେ।
ଏହି ପରିପ୍ରେକ୍ଷୀରେ ପୂଜ୍ୟ ସ୍ବାମୀ ପ୍ରଜ୍ଞାନାନନ୍ଦ ମାନବ ଜୀବନରେ ନୈତିକତା ମୂଲ୍ୟବୋଧ ଉପରେ ବିସ୍ତୃତ ଆଲୋକପାତ କରିଥିଲେ। ବିଶ୍ୱର ପ୍ରଗତିରେ ଭାରତ ବର୍ଷର କଷ୍ଟ୍ ଆକାଉଣ୍ଟାଣ୍ଟମାନଙ୍କର ଅବଦାନକୁ ସେ ଭୂୟସୀ ପ୍ରଶଂସା କରିଥିଲେ। ଭାରତ ବର୍ଷର ମୂଳଭିତ୍ତି ଏବଂ ବୈଶିଷ୍ଟ୍ୟକୁ ପ୍ରତିପାଦିତ କରି ଏକ ବୈପ୍ଳବିକ ପରିବର୍ତ୍ତନ ଉପରେ ସ୍ବାମୀ ବିସ୍ତୃତ ଆଲୋକପାତ କରିଥିଲେ। ସେହିଭଳି ଏମପି ସୁଜିତ୍ କୁମାର ଭାରତୀୟ ଅର୍ଥନୀତିର ରୂପରେଖ ଉପରେ ବିସ୍ତୃତ ବର୍ଣ୍ଣନା କରିଥିଲେ। ଚଳିତ ଦଶନ୍ଧିରେ ବିଶ୍ୱରେ ଘଟିଥିବା ଅର୍ଥନୀତିର ପରିବର୍ତ୍ତନ ଉପରେ ସେ ବିସ୍ତୃତ ଆଲୋକପାତ କରିଥିଲେ।
ସେହିପରି ଇରେଡା ଅଧ୍ୟକ୍ଷ ପ୍ରଦୀପ କୁମାର ଦାସ ଅକ୍ଷୟ ଶକ୍ତି କ୍ଷେତ୍ରରେ ଘଟିଥିବା ବୈପ୍ଳବିକ ପଦକ୍ଷେପ ଏବଂ ସର୍ବୋପରି ବିଜୁଳି କ୍ଷେତ୍ରରେ କିପରି ଅକ୍ଷୟ ଶକ୍ତି କ୍ଷେତ୍ର ଆସନ୍ତା ଦିନରେ ଜୈବିକ ଶକ୍ତିକୁ କ୍ରମାନୁବର୍ଦ୍ଧିତ ଭାବେ କମାଯାଇପାରିବ ସେ ବିଷୟରେ ବିସ୍ତୃତ ଆଲୋଚନା କରିଥିଲେ। ଅପରପକ୍ଷରେ ପୂର୍ବାଞ୍ଚଳ ପରିଷଦର ଅଧ୍ୟକ୍ଷ ସିଏମ୍ଏ ବିଭୂତି ଭୂଷଣ ନାୟକ ସ୍ବାଗତ ଅଭିଭାଷଣ ପ୍ରଦାନ କରିଥିଲାବେଳେ କଟକ-ଜଗତ୍ସିଂହପୁର-କେନ୍ଦ୍ରାପଡ଼ା ଚାପ୍ଟରର ଅଧ୍ୟକ୍ଷ ଲଳିତ କୁମାର ମିଶ୍ର, ପ୍ରତିଷ୍ଠାନ ଦ୍ୱାରା ନିଆଯାଇଥିବା ବିଭିନ୍ନ କାର୍ଯ୍ୟକ୍ରମ ଉପରେ ବିସ୍ତୃତ ଆଲୋକପାତ କରିଥିଲେ।