କେନ୍ଦୁଝର,୨୪ା୧୨(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ୨୦ ନମ୍ବର ଜାତୀୟ ରାଜପଥରେ ଦୈନିକ ଛୋଟବଡ଼ ଦୁର୍ଘଟଣା ଘଟି ଧନଜୀବନ ହାନି ହେଉଛି। ରବିବାର ଦ୍ରୁପଦା ବାଇପାସ ନିକଟରେ ଜଣେ ସାଇକେଲ ଆରୋହୀଙ୍କୁ ଟ୍ରକ ଚାପି ଦେଇ ଫେରାର୍ ହୋଇଯାଇଛି। ମୃତକ ଜଣଙ୍କ ହେଲେ ସଦର ଥାନା ଅନ୍ତର୍ଗତ ମହଦେଇଯୋଡ଼ା ପଞ୍ଚାୟତ ଉପରଧାତିକା ଗ୍ରାମର ବାଜନ ମାଝି(୬୩)। ଦୁର୍ଘଟଣା ପରେ ସ୍ଥାନୀୟ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇବା ସହିତ ରାସ୍ତାରୋକୋ କରାଯାଇଛି।
ଘଟଣାରୁ ପ୍ରକାଶଯେ, ଆଜି ବାଜନ ଗୃହପାଳିତ କୁକୁଡାଗୁଡ଼ିକୁ ବ୍ୟାଗରେ ଧରି ବେଲଦା ହାଟକୁ ବିକ୍ରି କରିବାକୁ ଯାଉଥିଲେ। ଦ୍ରୁପଦା ବୁଲାଣି ନିକଟରେ ଟ୍ରକ୍ଟି ସାଇକେଲ ସହିତ ବାଜନଙ୍କୁ ଚାପି ଦେଇଥିଲା। ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି। ଏହାପରେ ମୃତଦେହ ପଡ଼ିଥବା ଅବସ୍ଥାରେ ଲୋକେ ରାସ୍ତାରୋକୋ କରିବାରୁ ଟ୍ରାଫିକ ସମସ୍ୟା ଦେଖାଦେଇଥିଲା। ଖବର ପାଇ ଟାଉନ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହ ଲୋକଙ୍କୁ ବୁଝାଶୁଝା କରିବା ପରେ ରାସ୍ତାରୋକୋ ହଟିଥିଲା। ଏହାପରେ ମୃତଦେହ ଜବତ କରି ଏନ୍ଏଚ୍ଆଇ ଆମ୍ବୁଲାନ୍ସ ଯୋଗେ ବ୍ୟବଚ୍ଛେଦ ପାଇଁ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟକୁ ପଠାଇଛି।
