ଭୁବନେଶ୍ୱର,୨୬।୯(ବ୍ୟୁରୋ): ପୁରୀ ଓ କୋଣାର୍କକୁ ମୋ ବସ୍ ସେବା ଆରମ୍ଭ ହେବ। ଆସନ୍ତା ୨୭ ତାରିଖରେ ବିଶ୍ୱ ପର୍ଯ୍ୟଟନ ଦିବସରୁ ମୋ ବସ୍ ସେବା ଆରମ୍ଭ ହେବ ବୋଲି ମୋ ବସ୍ ପରିଚାଳନା ସଂସ୍ଥା କ୍ୟାପିଟାଲ ରିଜିଅନ୍ ଅର୍ବାନ ଟ୍ରାନ୍ସପୋର୍ଟ (କ୍ରୁଟ୍) ପକ୍ଷରୁ କୁହାଯାଇଛି। ରୁଟ୍ ନଂ-୫୦ରେ ଭୁବନେଶ୍ୱରର ମାଷ୍ଟରକ୍ୟାଣ୍ଟିନ୍ ବସଷ୍ଟାଣ୍ଡ୍ରୁ ବାହାରି ପୁରୀ ପର୍ଯ୍ୟନ୍ତ ମୋ ବସ ଯିବ। ସେହିପରି କୋଣାର୍କକୁ ରୁଟ୍ ନଂ-୭୦ରେ ସଂଯୋଗ କରିବ। ଏ ନେଇ କ୍ରୁଟ୍ର ପରିଚାଳନା ନିର୍ଦ୍ଦେଶକ ଅରୁଣ ବୋଥ୍ରା କହିଛନ୍ତି, ପୁରୀ ଓ କୋଣାର୍କ ଓଡ଼ିଶାର ଏକ ପ୍ରମୁଖ ସାଂସ୍କୃତିକ କ୍ଷେତ୍ର ଭାବେ ବିଶ୍ୱବିଦିତ। ଓଡ଼ିଶାରୁ ଓ ରାଜ୍ୟ ବାହାର ବିଭିନ୍ନ ସହରରୁ ଆସୁଥିବା ଅସଂଖ୍ୟ ପର୍ଯ୍ୟଟକ ତଥା ରାଜଧାନୀରୁ ପ୍ରତିଦିନ ଯାତାୟାତ କରୁଥିବା ଅନେକ ଲୋକ ଏହାଦ୍ୱରା ଲାଭବାନ ହେବେ। ପ୍ରଥମେ ୨ଟି ବିନା ବାର୍ତ୍ତାନୁକୁଳିତ ମୋ ବସ ସେବା ଆରମ୍ଭ ହେବାକୁ ସ୍ଥିର କରାଯାଇଥିବାବେଳେ ରବିବାର ଗୋଟିଏ ଲେଖାଏ ବସ୍ ଉଭୟ ରୁଟ୍ରେ ଯିବ। ସାଧାରଣ ବସ ସେବା ସୋମବାରଠାରୁ ଆରମ୍ଭ ହେବ ଓ ୨ଟି ଲେଖାଏ ବସ୍ ପ୍ରତ୍ୟେକ ରୁଟ୍ରେ ଚାଲିବ ବୋଲି ବୋଥ୍ରା କହିଛନ୍ତି। ରୁଟ୍ ନଂ-୫୦ ପାଇଁ ସର୍ବାଧିକ ୭୦ଟଙ୍କା ଏବଂ ରୁଟ୍ ନଂ-୭୦ ପାଇଁ ୬୦ ଟଙ୍କା ଯାତ୍ରୀଭଡ଼ା ଧାର୍ଯ୍ୟ କରାଯାଇଛି। ବୋଥ୍ରା ନିର୍ଦ୍ଧାରିତ ବସ୍ ଭଡ଼ାର ଠିକ୍ ମୁଲ୍ୟ ମୁତାବକ ଖୁଚୁରା ଦେବାପାଇଁ ଅନୁରୋଧ କରିଛନ୍ତି ଏବଂ କ୍ୟୁଆର୍ କୋଡ୍ ସେବାର ବ୍ୟବହାର କରିବାକୁ ଅପିଲ କରିଛନ୍ତି। ଏହାଦ୍ୱାରା ନୋଟ୍ ଏବଂ ଖୁଚୁରାର ଆଦାନପ୍ରଦାନ ଜନିତ ଭୂତାଣୁ ସମ୍ପ୍ରସାରଣକୁ ରୋକି ହେବା ସହ ଯାତ୍ରୀ ଓ ଗାଇଡ୍ମାନେ ନିଜକୁ ସୁରକ୍ଷିତ ରଖିପାରିବେ। ରୁଟ୍ ନଂ-୫୦ ମାଷ୍ଟରକ୍ୟାଣ୍ଟିନ୍, ରାଜ୍ୟ ସଂଗ୍ରହାଳୟ, ରବି ଟକିଜ୍, ଧଉଳି ଛକ, ଉତ୍ତରା ଛକ, ପିପିଲି ବାଇପାସ୍, ମାଳତୀପାଟପୁର ଓ ପୁରୀ ବସଷ୍ଟାଣ୍ଡରେ ରହିବ। ସେହିପରି ରୁଟ୍-୭୦ ସମସ୍ତ ମୁଖ୍ୟ ମୁଖ୍ୟ ବସ୍ଷ୍ଟପରେ ଦେଇ ଯାତ୍ରା କରିବ। ମାସ୍କ ପିନ୍ଧିଥିବା ଯାତ୍ରୀ ବସରେ ଯାତ୍ରା କରିପାରିବେ ବୋଲି ଜଣାପଡ଼ିଛି ।
