ପ୍ରେମର ଦିବସରେ ମନର ମଣିଷକୁ ଉପହାର ଦେବାକୁ ସମସ୍ତେ ଚାହାନ୍ତି । ଆଉ ସେହି ଉପହାର ଖାସ୍ ହେଉ ତାହା ବି ସମସ୍ତେ ଚାହାନ୍ତି । ସେଥିପାଇଁ ତ ଅନେକ ଟଙ୍କା ଖର୍ଚ୍ଚ କରି କିଣାଯାଏ ଦାମୀଦାମୀ ଉପହାର। ହେଲେ ବେଳେବେଳେ ସେହି ଉପହାର ଜିଣି ପାରି ନ ଥାଏ ମନ। କିନ୍ତୁ ଏଥର ଦାମୀ ନିର୍ଜୀବ ଉପହାର ବଦଳରେ ଦିଅନ୍ତୁ ଏହିସବୁ ସଜୀବ ପ୍ରେମଭରା ରୋମାଣ୍ଟିକ୍ ପ୍ଲାଣ୍ଟ। ଦେଖିବେ ପ୍ଲାଣ୍ଟ ବଢ଼ିବା ସହ ଆପଣଙ୍କ ପ୍ରେମ ବି ବଢ଼ି ଚାଲିବ..
ବ୍ଲିଡିଂ ହାର୍ଟ- ଏହାର ଫୁଲ ଗୋଲାପୀ ରଙ୍ଗର, ସେ ପୁଣି ହାର୍ଟ ଶେପ୍ର। ଖାଲି ସେତିକି ନୁହେଁ ଏହି ଫୁଲ ଦେଖିବାକୁ ବ୍ଲିଡିଂ ହାର୍ଟ ବା ହୃଦୟରୁ ରକ୍ତ ବୋହିଲା ପରି। ତେଣୁ ଏହାକୁ ସବୁଠାରୁ ରୋମାଣ୍ଟିକ ପ୍ଲାଣ୍ଟ ଭାବେ ଗଣନା କରାଯାଏ। ବସନ୍ତ ଋତୁରେ ଫୁଟୁଥିବା ଏହି ଫୁଲ, ଗଛର ଶାଖାରେ ଲମ୍ବା ଲାଇନ୍ ହୋଇ ଫୁଟିଥାଏ। ଆଉ ବେଶ୍ ସୁନ୍ଦର ଦେଖାଯାଏ। ଏହା ଗୋଲାପୀ ଓ ଧଳା ମିଶ୍ରିତ ରଙ୍ଗରେ ଫୁଟିଥାଏ। କେତେକ ଗଛରେ କେବଳ ଧଳା ରଙ୍ଗର ଫୁଲ ବି ଫୁଟିଥାଏ। ଏହି ଗଛର ବେଶ୍ ଯତ୍ନ ନେବାକୁ ହୁଏ। ନିୟମିତ ପାଣି ଦେବା ସହ ଛାଇ ସ୍ଥାନରେ ରଖିବାକୁ ପଡେ।
ହଟ୍ ଲିପ୍ସ- ଓଠରେ ଲାଲ୍ ଲିପ୍୍ଷ୍ଟିକ କେତେ ରୋମାଣ୍ଟିକ୍ ଲାଗେ ଭାବିଲେ! ପ୍ରେମିକକୁ ତ ସବୁବେଳେ ପ୍ରେମିକାର ଲାଲ୍ ଓଠ ଆକର୍ଷିତ କରିଥାଏ। ତେଣୁ ‘ଭାଲେଣ୍ଟାଇନ୍ସ ଡେ’ରେ ଲାଲ୍ ଓଠ ପରି ଦେଖାଯାଉଥିବା ଏହି ପ୍ଲାଣ୍ଟ ଉପହାରସ୍ବରୂପ ଦେଲେ ବେଶ୍ ରୋମାଣ୍ଟିକ ଲାଗିବ। ଏହାର ବଟାନିକାଲ୍ ନେମ୍ ହେଉଛି ପାଲିକୌରିଆ ଇଲାଟା, କିନ୍ତୁ ଏହାର ପତ୍ର ଲାଲ୍ ଲିପଷ୍ଟିକ୍ ଲଗା ଓଠ ପରି ଦେଖାଯାଉଥିବାରୁ ଏହାକୁ ‘ହଟ୍ ଲିପ୍ସ ପ୍ଲାଣ୍ଟ’ ବି କୁହାଯାଏ। ଲାଲ୍ ରଙ୍ଗର ଦୁଇ ପତ୍ର ମଝି ଭାଗରେ ଫୁଟିଥାଏ ଏହାର ଫୁଲ।
ହୋୟା କେରୀ- ଏହି ପ୍ଲାଣ୍ଟର ପତ୍ର ପୂରାପୂରି ହାର୍ଟ ଶେପ୍୍ର ଅଟେ, ସେଥିପାଇଁ ଏହାକୁ ‘ସୁଇଟ୍ ହାର୍ଟ’ ପ୍ଲାଣ୍ଟ ବି କୁହାଯାଏ। ବଜାରରେ ଏହାର ମାତ୍ର ଗୋଟିଏ ମୋଟା ପତ୍ରକୁ ମାଟିରେ ପୋତି ବିକ୍ରି କରାଯାଇଥାଏ। ଏହାର ଯତ୍ନ ନେବା ବି ସହଜ। ପାଣି କମ୍ ଦେବାକୁ ପଡ଼େ। ଏହାକୁ ଅନେକେ ‘ଲକି ହାର୍ଟ’ ପ୍ଲାଣ୍ଟ ମଧ୍ୟ କହନ୍ତି। ୟୁରୋପରେ ତ ‘ଭାଲେଣ୍ଟାଇନ୍ସ ଡେ’ରେ ଏହି ପ୍ଲାଣ୍ଟର ବହୁଳ ଚାହିଦା ଥାଏ। ତେଣୁ ଆପଣ ଚାହିଁଲେ ଏହାକୁ ମନର ମଣିଷକୁ ଉପହାରସ୍ବରୂପ ଦେଇପାରିବେ। ଦେଖିବେ ସେ ନିଶ୍ଚୟ ଖୁସି ହୋଇଯିବେ।
ହାର୍ଟସ୍ ଅନ୍ ଏ ଷ୍ଟ୍ରିଙ୍ଗ- ଏହି ପ୍ଲାଣ୍ଟର ପତ୍ରଗୁଡ଼ିକ ମଧ୍ୟ ହାର୍ଟ ଆକୃତିର। ଲତା ଭଳି ମାଡୁଥିବା ଏହି ପ୍ଳାଣ୍ଟର ପତ୍ରଗୁଡ଼ିକୁ ଦେଖିଲେ ଲାଗେ ସତେଯେମିତି ହାର୍ଟର ଅନେକ ମାଳା ଝୁଲି ରହିଛି। ଘରଭିତରେ ଏହାକୁ ଲଗାଇବାକୁ ଚାହୁଁଥିଲେ ଏହାକୁ ପ୍ରଚୁର ଖରା ଆସୁଥିବା ଝରକା ପାଖରେ ରଖନ୍ତୁ।
ଅନ୍ଥୁରିୟମ୍- ଏହି ଗଛର ପତ୍ର ହାର୍ଟ ଶେପ୍ର ହେବା ସହ ଫୁଲ ବି ହାର୍ଟଶେପ୍ର। ଲାଲ, ବାଇଗଣୀ, ଧଳା, ଗୋଲାପୀ ରଙ୍ଗର ଫୁଲ ଫୁଟୁଥିବା ଅନ୍ଥୁରିୟମ୍ ପ୍ଲାଣ୍ଟ ବଜାରରେ ଉପଲବ୍ଧ ହୁଏ। ତେବେ ଭାଲେଣ୍ଟାଇନ୍ସ ଡେ’ ଅବସରରେ ଆପଣ ଲାଲ୍ ଫୁଲ ଫୁଟୁଥିବା ଅନ୍ଥୁରିୟମ୍ ବାଛିପାରିବେ।
ଗୋଲାପ- ରୋମାଣ୍ଟିକ୍ ପ୍ଲାଣ୍ଟ ଭିତରେ ଗୋଲାପର ସ୍ଥାନ ଅନ୍ୟତମ। ଏହା ଯେତିକି ସୁନ୍ଦର ସେତିକି ସୁଗନ୍ଧ ଭରା। ଲାଲ ରଙ୍ଗର ଗୋଲାପକୁ ତ ପ୍ରେମର ପ୍ରତୀକ ବୋଲି କୁହାଯାଏ। ତେଣୁ ଭାଲେଣ୍ଟାଇନ୍ସ ଡେ’ରେ ଗୋଲାପ ଗଛଟିଏ ବି ଉପହାରସ୍ବରୂପ ଦେଇପାରିବେ।
ଡୋଭ୍ ଅର୍କିଡ- ଧଳା ରଙ୍ଗର କପୋତ ବା ଡୋଭ୍ ପକ୍ଷୀକୁ ପ୍ରେମର ପ୍ରତୀକ ଭାବେ ଗଣନା କରାଯାଏ। ତେଣୁ ‘ଡୋଭ୍ ଅର୍କିଡ୍’ ପ୍ଲାଣ୍ଟକୁ ବି ଆପଣ ଭାଲେଣ୍ଟାନ୍ସ ଡେ’ ପାଇଁ ବାଛିପାରିବେ। ଏହି ପ୍ଲାଣ୍ଟରେ ଫୁଟୁଥିବା ଫୁଲଟି ସତସତିକା କପୋତ ପରି ଦେଖାଯାଏ। ଲାଗେ ସତେ ଯେମିତି କୁନି ହଳଦିଆ ରଙ୍ଗର ଥଣ୍ଟ ଥିବା କପୋତଟିଏ ତା’ର ଧଳା ଡେଣାକୁ ମେଲାଇ ଉଡ଼ିବାକୁ ଉଦ୍ୟତ ହେଉଛି । ଏହି ଫୁଲ ଅର୍କିଡ ପ୍ରଜାତିର ଅଟେ। ମଧ୍ୟ ଆମେରିକାରୁ ଆରମ୍ଭ କରି ଭେନେଜୁଏଲା ଏବଂ ଇକ୍ୱେଡର ପର୍ଯ୍ୟନ୍ତ ଏହା ଦେଖିବାକୁ ମିଳେ।
ହାର୍ଟ ଫର୍ନସ୍- ଏହି ପ୍ଲାଣ୍ଟର ପତ୍ର ହାର୍ଟ ଶେପ୍ର ଅଟେ। ଏହା ଦୀର୍ଘ ଦିନ ପର୍ଯ୍ୟନ୍ତ ସବୁଜ ଓ ସତେଜ ରହେ। ହାର୍ଟ ଫର୍ନସ୍ ଏକ ଭଲ ଇନ୍ଡୋର୍ ପ୍ଲାଣ୍ଟ । ତେଣୁ ଏହାକୁ ମଧ୍ୟ ଭାଲେଣ୍ଟାଇନ୍ସ ଡେ’ରେ ଉପହାର ଭାବେ ଦେଇପାରିବେ।