ପୁଣେ,୬।୬: କରୋନା ମହାମାରୀ ଯୋଗୁ ପୃଥିବୀରେ ଆତଙ୍କ ଦେଖାଦେଇଛି। କରୋନା ଭୁତାଣୁର ଉତ୍ପତ୍ତି ଚାଇନାର ଉହାନ୍ ଲ୍ୟାବ୍ ଅବା ସମୁଦ୍ରଜାତ ଖାଦ୍ୟପଦାର୍ଥ ବଜାର ସେ ନେଇ ନାନା ତର୍କ ଜାରି ରହିଛି। ଏପରିସ୍ଥଳେ ଭାରତୀୟ ବୈଜ୍ଞାନିକ ଦମ୍ପତି କରୋନା ଭୂତାଣୁ ଉହାନ୍ ଲ୍ୟାବ୍ରୁ ଲିକ୍ ହୋଇଥିବା ନେଇ ଦାବି କରିଛନ୍ତି। ପୁଣେରେ ବାସ କରୁଥିବା ବୈଜ୍ଞାନିକ ଦମ୍ପତି ଡ. ରାହୁଲ ବାହୁଲିକର ଏବଂ ଡ. ମୋନାଲୀ ରାହାଲକର ଏନେଇ ତଥ୍ୟ ଭିତ୍ତିକ ରିପୋର୍ଟ ପ୍ରସ୍ତୁତ କରିଛନ୍ତି। ପୂର୍ବରୁ ବୈଜ୍ଞାନିକ ଦମ୍ପତିଙ୍କ ପ୍ରକ୍ଷରୁ ପ୍ରସ୍ତୁତ ହୋଇଥିବା ଡିସେଣ୍ଟ୍ରାଲାଇଜ୍ ରେଡିକାଲ ଅଟୋମୋନସ୍ ସର୍ଚ୍ଚ ଟିମ୍ ଇନଭେଷ୍ଟିଗେଟିଙ୍ଗ୍ କୋଭିଡ୍-୧୯ରେ କରୋନା ଭୂତାଣୁ ଉହାଲ୍ୟାବ୍ରୁ ଲିକ୍ ହୋଇଥିବା ଦର୍ଶାଯାଇଥିଲା। ତେବେ ପ୍ରଥମେ ଏହାକୁ ଏକ ଷଡ଼ଯନ୍ତ୍ର ବୋଲି କୁହାଯାଇଥିଲା। ମାତ୍ର ଏବେ ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କର ଚାଇନାର ଉହାନ୍ ଲ୍ୟାବ୍ ପ୍ରତି ଥିବା କଡ଼ା ଆଭିମୁଖ୍ୟ ପ୍ରକାଶ ପାଇବା ପରେ ଭାରତୀୟ ବୈଜ୍ଞାନିକ ଦମ୍ପତିଙ୍କ ରିପୋର୍ଟ ପୁଣି ଚର୍ଚ୍ଚାର ପରିସରକୁ ଆସିଛି। ଉହାନ୍ ଲ୍ୟାବ୍ରୁ ଜାଣିଶୁଣି କରୋନା ଭତାଣୁର ଲିକ୍ କରାଯାଇଛି କି ନାହିଁ ତାହା ଉପରେ କୌଣସି ସଠିକ୍ ଭାବେ କୁହାଯାଇ ନ ପାରିଲେ ବି ଗବେଷଣାରୁ ମିଳିଥିବା ତଥ୍ୟ ଅନୁସାରେ ଏଭଳି କରାଯାଇଥିବା ଅନୁମାନ କରାଯାଉଛି ବୋଲି ସେମାନେ କହିଛନ୍ତି। ଭାରତୀୟ ବୈଜ୍ଞାନିକ ଦମ୍ପତିଙ୍କ କହିବାନୁସାରେ, ଏପ୍ରିଲ ୨୦୨୦ରେ, ସେମାନେ ଗବେଷଣା ଆରମ୍ଭ କରିଥିଲେ। ଝଣାପଡ଼ିଥିଲା ଯେ, ଦକ୍ଷିଣ ଚାଇନାର ୟୁନାନ ପ୍ରଦେଶର ମୋଜିୟାଙ୍ଗ ମାଇନିଂରୁ ଉହାନ ଲ୍ୟାବ ଦ୍ୱାରା ସାର୍ସ-କୋଭ୍-୨- ଆର୍ଏଟିଜି-୧୩ ଅର୍ଥାତ, କରୋନା ଭାଇରସ ସଂଗ୍ରହ କରାଯାଇଥିଲା। ଖଣି ଖନନ ସମୟରେ ବାଦୁଡ଼ି ବସା ସଫା କରିବା ପାଇଁ ୬ ଜଣ ଶ୍ରମିକଙ୍କୁ ନିୟୋଜିତ ହୋଇଥିଲେ। ପରବର୍ତ୍ତୀ ସମୟରେ ସେମାନେ ନିମୋନିଆ ଭଳି ରୋଗର ଶିକାର ହୋଇଥିଲେ। ବୈଜ୍ଞାନିକ ଦମ୍ପତି କହିଛନ୍ତି ଯେ, ଚାଇନାର ଡକ୍ୟୁମେଣ୍ଟକୁ ଅନୁବାଦ କରି ଏହା ଉପରେ ଅନୁସନ୍ଧାନ ଜାରି ରଖିଛନ୍ତି।