ନୂଆଦିଲ୍ଲୀ, ୯।୯: ପର୍ତ୍ତୁଗାଲ ଷ୍ଟାର୍ କ୍ରିଷ୍ଟିଆନୋ ରୋନାଲ୍ଡୋ ବିଶ୍ୱର ୨ୟ ପୁରୁଷ ଫୁଟ୍ବଲ୍ ଖେଳାଳି ଭାବେ ୧୦୦ ଅନ୍ତର୍ଜାତୀୟ ଗୋଲ୍ ସ୍କୋର କରିବାର ସୌଭାଗ୍ୟ ଲାଭ କରିଛନ୍ତି। ନେସନ୍ସ କପ୍ରେ ପର୍ତ୍ତୁଗାଲ ଓ ସ୍ବିଡେନ ମଧ୍ୟରେ ଖେଳାଯାଇଥିବା ମ୍ୟାଚ୍ ଅବସରରେ ରୋନାଲ୍ଡୋ ଏହି ସଫଳତା ପାଇଛନ୍ତି। ଏହି ମ୍ୟାଚ୍ରେ ପର୍ତ୍ତୁଗାଲ ୨-୦ ଗୋଲରେ ବିଜୟୀ ଲାଭ କରିଥିଲା। ପର୍ତ୍ତୁଗାଲ ପକ୍ଷରୁ ରୋନାଲ୍ଡୋ ହିଁ ଏହି ୨ଟି ଯାକ ଗୋଲ୍ ଦେଇଥିଲେ। ଏଥିସହ ବିଶ୍ୱର ୨ୟ ଖେଳାଳି ଭାବେ ୩୫ ବର୍ଷୀୟ ଏହି ଜୁଭେଣ୍ଟସ୍ ଷ୍ଟାର୍ ୧୦୦ ଅନ୍ତର୍ଜାତୀୟ ଗୋଲ୍ ସ୍କୋର କରିବାର କୀର୍ତ୍ତିମାନ କରିଛନ୍ତି। ତାଙ୍କ ପୂର୍ବରୁ ଇରାନ୍ର ଅଲି ଡାଏଇ ପ୍ରଥମ ଫୁଟ୍ବଲର୍ ଭାବେ ଏହି ମାଇଲଷ୍ଟୋନ ଛୁଇଁଥିଲେ। ୧୯୯୩ରୁ ୨୦୦୬ ପର୍ଯ୍ୟନ୍ତ ଇରାନ୍ ପକ୍ଷରୁ ପ୍ରତିନିଧିତ୍ୱ କରିଥିବା ଅଲି ମୋଟ୍ ଉପରେ ୧୦୯ ଗୋଲସ୍କୋର କରି ଏହି ତାଲିକାର ସର୍ବାଗ୍ରେ ରହିଛନ୍ତି। ସେହିଭଳି ପ୍ରଥମ ୟୁରୋପିଆନ୍ ଖେଳାଳି ଭାବେ ରୋନାଲ୍ଡୋ ୧୦୦ ଗୋଲ୍ ଦେଇଛନ୍ତି। ସର୍ବାଧିକ ଅନ୍ତର୍ଜାତୀୟ ଗୋଲ ସ୍କୋର କରିଥିବା ଫୁଟ୍ବଲ ଖେଳାଳି ତାଲିକାର ୩ୟ ସ୍ଥାନରେ ଭାରତର ଅଧିନାୟକ ସୁନୀଲ ଛେତ୍ରୀ (୭୨) ରହିଛନ୍ତି। ଛେତ୍ରୀଙ୍କ ପଛକୁ ଆର୍ଜେଣ୍ଟିନା ସୁପର୍ ଷ୍ଟାର୍ ଲିଓନେଲ ମେସି (୭୦) ୪ର୍ଥ ସ୍ଥାନରେ ରହିଛନ୍ତି।