ଭୁବନେଶ୍ୱର, (ବ୍ୟୁରୋ)/ପଦ୍ମପୁର(ଡିଏନ୍ଏ)୧୧।୩:ନ୍ୟାଶନାଲ୍ ଡିଫେନ୍ସ ଏକାଡେମୀ (ଏନ୍ଡିଏ) ପ୍ରବେଶିକା ପରୀକ୍ଷାରେ ଓଡ଼ିଆ ପୁଅ ରୋନିତ୍ ରଞ୍ଜନ ନାୟକ ଟପ୍ପର ହୋଇଛନ୍ତି। ଭଦ୍ରକ ଜିଲା ବାସୁଦେବପୁର ବ୍ଲକ ଜଗନ୍ନାଥପୁର ପଞ୍ଚାୟତ ବଛଡ଼ା ପାଢ଼ୀସାହିର ରୋନିତ୍ ସମଗ୍ର ଦେଶରେ ପ୍ରଥମ ହୋଇଛନ୍ତି। ନିଜ ସଫଳତା ପରେ ରୋନିତ୍ କହିଛନ୍ତି, ପରୀକ୍ଷା ଭଲ ହୋଇଥିଲା। କିନ୍ତୁ ର଼୍ୟାଙ୍କ୍ ୧ ପାଇବି ବୋଲି ଆଶା ନ ଥିଲା। ସର୍ବଭାରତୀୟ ସ୍ତରରେ ପ୍ରଥମ ହୋଇଥିବାରୁ ଖୁସି ଲାଗୁଛି। ବହୁ ପରିଶ୍ରମ ପରେ ଏହି ସଫଳତା ପାଇଛି। ଟାଇମ୍ ଟେବୁଲ ଫଲୋ କରିବାରୁ ସଫଳତା ପାଇପାରିଲି। ଆଗକୁ ଏଭିଏଶନ୍ ୱିଙ୍ଗ୍ରେ ଯୋଗଦେଇ ଫାଇଟର ପାଇଲଟ୍ ହେବାକୁ ଲକ୍ଷ୍ୟ ରଖିଛନ୍ତି ବୋଲି ରୋନିତ୍ କହିଛନ୍ତି। ନିଜର ସଫଳତା ପାଇଁ ସେ ମହାପ୍ରଭୁ ଶ୍ରୀଜଗନ୍ନାଥ, ମା’, ବାପା ଓ ପ୍ରଶିକ୍ଷଣଗଣଙ୍କୁ ଶ୍ରେୟ ଦେଇଛନ୍ତି।
ସୂଚନାଯୋଗ୍ୟ, ଗୋଆସ୍ଥିତ ନାଭାଲ ପବ୍ଲିକ୍ ସ୍କୁଲର ପ୍ରାଥମିକ ଶିକ୍ଷା ଓ କେନ୍ଦ୍ରୀୟ ବିଦ୍ୟାଳୟରୁ ରୋନିତ ମାଟ୍ରିକ ପାସ୍ କରିଥିଲେ। ଏହାପରେ ସେନାବାହିନୀରେ କ୍ୟାରିୟର କରିବାକୁ ସେ କୋହ୍ଲାପୁରସ୍ଥିତ ଆର୍ମଡ୍ ଫୋର୍ସେସ୍ ପ୍ରିପାରେଟୋରୀ ଇନ୍ଷ୍ଟିଚ୍ୟୁଟ୍ରେ ପ୍ରଶିକ୍ଷଣ ନେଉଥିଲେ। ରୋନିତଙ୍କ ମା’ ଅନ୍ନପୂର୍ଣ୍ଣା ନାୟକ ଗୃହିଣୀ ଓ ବାପା ରଶ୍ମିରଞ୍ଜନ ନାୟକ ଗୋଆସ୍ଥିତ ନୌସେନା ବିମାନବନ୍ଦର ଆଇଏନ୍ଏସ୍ ହଂସରେ ମାଷ୍ଟର ଚିଫ୍ ପେଟି ଅଫିସର ଭାବେ କାର୍ଯ୍ୟରତ। ଉକ୍ତ ସଂସ୍ଥାନରୁ ଚଳିତବର୍ଷ ୪ ଜଣ ଛାତ୍ର ଏନ୍ଡିଏରେ ସଫଳ ହୋଇଛନ୍ତି। ଏନ୍ଡିଏ ପରୀକ୍ଷାରେ ରୋନିତ୍ଙ୍କ ସହିତ କେନ୍ଦ୍ରପଡ଼ା ପଟ୍ଟାମୁଣ୍ଡାଇ ବ୍ଲକ୍ ଆଇନିପଡ଼ାର ଗୌରବ ନାଥ ମଧ୍ୟ ସଫଳ ହୋଇଛନ୍ତି।
