ଭୁବନେଶ୍ୱର,୬।୮(ସ୍ପୋଟର୍ସ ବ୍ୟୁରୋ): ବ୍ରାଜିଲର ରୋଜେରିଓ ରାମୋସ୍ଙ୍କୁ ଓଡ଼ିଶା ଏଫ୍ସି ତା’ର ନୂଆ ଗୋଲକିପିଂ କୋଚ୍ ହିସାବରେ ନିଯୁକ୍ତ କରିଛି। ହିରୋ ଇଣ୍ଡିଆ ସୁପର ଲିଗ୍ (ଆଇଏସ୍ଏଲ୍)ର ସପ୍ତମ ସଂସ୍କରର ପୂର୍ବରୁ ଓଡ଼ିଶା ଏଫ୍ସି ଏହି ନିଷ୍ପତ୍ତି ନେଇଛି। ରାମୋସ ପୂର୍ବରୁ ଭାରତୀୟ ଜାତୀୟ ଦଳର ଗୋଲ୍କିପିଂ କୋଚ୍ ହିସାବରେ କାର୍ଯ୍ୟ କରିଛନ୍ତି। ଦୁଇବର୍ଷ ପାଇଁ ସେ ଭୁବନେଶ୍ୱର ପର୍ଯ୍ୟବେଷିତ ଓଡ଼ିଶା ଏଫ୍ସି ସହିତ ଚୁକ୍ତିରେ ସ୍ବାକ୍ଷର କରିଛନ୍ତି।
ଭାରତୀୟ ସିନିୟର ଦଳ ବ୍ୟତୀତ ସେ ବିଭିନ୍ନ ବୟସବର୍ଗର ଦଳ ସହ ମଧ୍ୟ କାର୍ଯ୍ୟ କରିଛନ୍ତି। ରାମୋସ୍ ମଧ୍ୟ ଆଫ୍ରିକୀୟ ଦେଶ ସୁଦାନ ଜାତୀୟ ଦଳର ଗୋଲକିପିଂ କୋଚ୍ ଭାବେ ସଫଳତାର ସହ କାର୍ଯ୍ୟ କରିଛନ୍ତି। ୪୬ ବର୍ଷୀୟ ଏହି ପୂର୍ବତନ ପେସାଦାର ଗୋଲକିପର ଗୋଲକିପିଂ କୋଚ୍ ଭାବେ ବିଭିନ୍ନ କ୍ଲବ୍ ପାଇଁ ଦାୟିତ୍ୱ ନେଇଛନ୍ତି। ସେ ବ୍ରାଜିଲରେ ଇସି ସାଣ୍ଟୋ ଆନ୍ଦ୍ରେ ଏସ୍ପି ଓ ଇସି ନୋଭୋ ହାମ୍ବୁର୍ଗୋ ଆରଏସ୍ ପାଇଁ କାର୍ଯ୍ୟ କରିଛନ୍ତି। ସେହିପରି ଭାରତର ଭାସ୍କୋ ସ୍ପୋଟର୍ସ କ୍ଲବ, ଦକ୍ଷିଣ କାରିଆର ୟଙ୍ଗ ଇନ୍ ଏକାଡେମୀ ଓ ସାଇପ୍ରସ୍ର ଏନ୍ଇଏ ସାଲାମିନା କ୍ଲବ୍ ତରଫରୁ ମଧ୍ୟ ସେ ଗୋଲ୍କିପିଂ କୋଚ୍ ଭାବେ ସଫଳତାର କାର୍ଯ୍ୟ କରିଛନ୍ତି।
ରୋମୋସ୍ଙ୍କ ନିଯୁକ୍ତିରେ ଓଡ଼ିଶା ଏଫ୍ସି ମୁଖ୍ୟ କୋଚ୍ ଷ୍ଟୁଆର୍ଟ ବେକ୍ସଟର ଖୁସି ଜାହିର କରିଛନ୍ତି। ଆମ କୋଚିଂ ଟିମ୍ରେ ରାମୋସ ସାମିଲ ହେବା ନିଶ୍ଚିତ ଭାବେ ଏକ ଭଲ ପଦକ୍ଷେପ। ଏହାଦ୍ୱାରା ଓଡ଼ିଶା ଏଫ୍ସିର ପ୍ରଦର୍ଶନରେ ଉନ୍ନତି ହେବ ବୋଲି ଷ୍ଟୁଆର୍ଟ ଆଶା ପ୍ରକାଶ କରିଛନ୍ତି। ଭାରତରେ କାର୍ଯ୍ୟ କରିବାର ଅଭିଜ୍ଞତା ତାଙ୍କ ପାଖରେ ରହିଛି। ସେ ମଧ୍ୟ ସହକାରୀ କୋଚ୍ ଗେରୀ ପେଟନଙ୍କ ସହିତ କଥା ହୋଇଛନ୍ତି। ଦଳର ଗୋଲକିପରମାନଙ୍କ ପ୍ରଦର୍ଶନରେ ଉନ୍ନତି ପାଇଁ ଆମେ ସମସ୍ତେ କାର୍ଯ୍ୟ କରିବୁ। ରାମୋସ୍ଙ୍କ ନିଯୁକ୍ତି ପରେ ଦଳ ନିଶ୍ଚିତ ଭାବେ ଫାଇଦାରେ ରହିବ ବୋଲି ଷ୍ଟୁଆର୍ଟ କହିଛନ୍ତି।