ଖୋର୍ଦ୍ଧା ଅଫିସ,୯।୪: କଠିନ ପରିଶ୍ରମ, ଲକ୍ଷ୍ୟସ୍ଥଳରେ ପହଞ୍ଚିବାର ସ୍ବପ୍ନ ଏବଂ ଦୃଢ଼ ମନୋବଳ ସଫଳତା ଆଣିଦିଏ। ଏହାର ଉଦାହରଣ ପାଲଟିଛନ୍ତି ଖୋର୍ଦ୍ଧା ଜିଲା ଜଟଣୀର ରୋଷନ ଜେନା। ସର୍ବଭାରତୀୟ ସ୍ତରରେ ଓଡ଼ିଶା ପାଇଁ ଗୌରବ ଆଣିଛନ୍ତି ରୋଷନ। ଏସ୍ଏସ୍ସି ଆସିଷ୍ଟାଣ୍ଟ ଅଡିଟ୍ ଅଫିସର(ଏଏଓ) ପରୀକ୍ଷାରେ ୧୩ଲକ୍ଷ ପରୀକ୍ଷାର୍ଥୀଙ୍କୁ ପଛରେ ପକାଇ ଜାତୀୟ ସ୍ତରରେ ରୋଷନ ପ୍ରଥମ ସ୍ଥାନ ଅଧିକାର କରିଛନ୍ତି। ଜଟଣୀ ରେଲଓ୍ବେ କଲୋନୀରେ ରହୁଥିବା ଭୀମସେନ ଓ ସବିତାଙ୍କ ବଡ଼ପୁଅ ରୋଷନ ପିଲାବେଳୁ ଜଣେ ମେଧାବୀ ଛାତ୍ର। ସେ ଖୋର୍ଦ୍ଧାରୋଡ୍ସ୍ଥିତ କେନ୍ଦ୍ରୀୟ ବିଦ୍ୟାଳୟରୁ ମାଟ୍ରିକ ଏବଂ ଏନ୍ଆଇଟି ରାଉରକେଲାରୁ ବି-ଟେକରେ ସ୍ନାତକ ଡିଗ୍ରୀ ହାସଲ କରିଛନ୍ତି। ଆଇଏଏସ୍ ହେବା ଲକ୍ଷ୍ୟରେ ପାଠପଢ଼ା ଜାରି ରଖିଥିବା ରୋଷନ ଏସଏସସି ଆସିଷ୍ଟାଣ୍ଟ ଅଡିଟ ପରୀକ୍ଷା ଦେଇଥିଲେ। କୋଭିଡ୍ ଯୋଗୁ ପରୀକ୍ଷା ଫଳ ପ୍ରକାଶନରେ ବିଳମ୍ବ ଘଟିଥିଲା। ସଦ୍ୟ ପ୍ରକାଶିତ ପରୀକ୍ଷାରେ ରୋଷନ ସର୍ବଭାରତୀୟ ସ୍ତରରେ ଟପ୍ପର ହୋଇଛନ୍ତି। ଏନେଇ ପରିବାର ଏବଂ ଜଟଣୀ ଅଞ୍ଚଳରେ ଖୁସିର ଲହରି ଖେଳିଯାଇଛି।
ରୋଷନ କହିଛନ୍ତି, ଲକ୍ଷ୍ୟସ୍ଥଳରେ ପହଞ୍ଚିିବା ଲାଗି କଠିନ ସାଧନା ଆବଶ୍ୟକ। ବିନା ପରିଶ୍ରମରେ କୌଣସି ସଫଳତା ମିଳି ନ ଥାଏ। ପରୀକ୍ଷା ପାଇଁ ଦୈନିକ ୧୦ରୁ ୧୨ଘଣ୍ଟା ପରିଶ୍ରମ କରୁଥିଲି। ବାପା ମା’ଙ୍କ ଆଶୀର୍ବାଦ ଏବଂ ମହାପ୍ରଭୁ ଶ୍ରୀଜଗନ୍ନାଥଙ୍କ କୃପାରୁ ଏହି ସଫଳତା ପାଇଛି। ଜୀବନରେ ସଫଳତା ନ ପାଇବା ପର୍ଯ୍ୟନ୍ତ ନିରନ୍ତର ଅଭ୍ୟାସ ଏବଂ ପରିଶ୍ରମ ଜାରି ରଖିବାକୁ ସେ ଯୁବପିଢିଙ୍କୁ ପରାମର୍ଶ ଦେଇଛନ୍ତି। ନିଜ ଭାଗ୍ୟକୁ ଦୋଷ ଦେବା ପରିବର୍ତ୍ତେ, କର୍ମକ୍ଷେତ୍ରରେ ନିଷ୍ଠାପର ଭାବେ ଆଗେଇ ଚାଲିଲେ, ଦିନେ ନା ଦିନେ ସଫଳତା ମିଳିବ। ଆଇଏଏସ୍ ପରୀକ୍ଷାରେ କୃତକାର୍ଯ୍ୟ ହେବା ତାଙ୍କ ଲକ୍ଷ୍ୟ ବୋଲି ସେ କହିଛନ୍ତି। ଏହି ସଫଳତା ପରେ ତାଙ୍କ ନିକଟକୁ ଶୁଭେଚ୍ଛାର ସୁଅ ଛୁଟିଛି।
