ମୁମ୍ବାଇ,୨୮।୭: ଏଚ୍ସିଏଲ୍ ଟେକ୍ନୋଲୋଜିର ଅଧ୍ୟକ୍ଷା ରୋଶନୀ ନାଦାର ମାଲହୋତ୍ରା ଭାରତର ସର୍ବଶ୍ରେଷ୍ଠ ଧନୀ ମହିଳା ସ୍ଥାନ ବଜାୟ ରଖିଛନ୍ତି। ୨୦୨୧ରେ ତାଙ୍କ ମୋଟ ସମ୍ପତ୍ତି ପରିମାଣ ୫୪ ପ୍ରତିଶତ ବୃଦ୍ଧି ପାଇ ୮୪,୩୩୦ କୋଟି ଟଙ୍କାରେ ପହଞ୍ଚତ୍ଛି। ଏଚ୍ସିଏଲ୍ ପ୍ରତିଷ୍ଠାତା ଶିବ ନାଦାରଙ୍କ କନ୍ୟା ରୋଶନୀ ଆମେରିକାର ଇଲିନୋଇସ୍ସ୍ଥିତ ନର୍ଥଓ୍ବେଷ୍ଟର୍ନ ୟୁନିଭର୍ସିଟିରୁ ସ୍ନାତକ ପରେ ବିଜିନେସ୍ ଆଡମିନିଷ୍ଟ୍ରେଶନରେ ମାଷ୍ଟର ଡିଗ୍ରୀ ହାସଲ କରିଥିଲେ। ସେ ଏଚ୍ସିଏଲ୍ କର୍ପୋରେଶନର କାର୍ଯ୍ୟନିର୍ବାହୀ ନିର୍ଦ୍ଦେଶକ ତଥା ସିଇଓ, ଏଚ୍ସିଏଲ୍ ଟେକ୍ନୋଲୋଜି ବୋର୍ଡର ଉପାଧ୍ୟକ୍ଷ ତଥା ଶିବ ନାଦାର ଫାଉଣ୍ଡେଶନର ଟ୍ରଷ୍ଟି ଅଛନ୍ତି। ଫୋର୍ବସ୍ର ୨୦୧୯ ଓ ୨୦୨୦ରେ ପ୍ରକାଶିତ ବିଶ୍ୱର ସବୁଠୁ ପ୍ରଭାବଶାଳୀ ୧୦୦ ମହିଳାଙ୍କ ମଧ୍ୟରେ ରୋଶନୀ ସ୍ଥାନ ପାଇଥିଲେ।
ଇନ୍ଭେଷ୍ଟମେଣ୍ଟ ବ୍ୟାଙ୍କିଙ୍ଗ୍ କ୍ୟାରିୟର ଛାଡ଼ି ୧୦ ବର୍ଷ ପୂର୍ବେ ନାଇକା ନାମରେ ବିଉଟି ବ୍ରାଣ୍ଡ୍ ଆରମ୍ଭ କରିଥିବା ଫାଲ୍ଗୁନି ନାୟାର ନିଜସ୍ବ ଉଦ୍ୟମରେ ସବୁଠୁ ଧନୀ ମହିଳା ହୋଇପାରିଛନ୍ତି। ତାଙ୍କ ସମ୍ପତ୍ତି ପରିମାଣ ୫୭,୫୨୦ କୋଟି ଟଙ୍କାରେ ପହଞ୍ଚତ୍ଥିତ୍ବା କୋଟାକ ପ୍ରାଇଭେଟ୍ ବ୍ୟାଙ୍କିଙ୍ଗ୍-ହୁରୁନ ତାଲିକାରେ ପ୍ରକାଶ ପାଇଛି। ୫୯ ବର୍ଷୀୟ ନାୟାରଙ୍କ ସମ୍ପତ୍ତି ବର୍ଷକ ମଧ୍ୟରେ ୯୬୩ ପ୍ରତିଶତ ବୃଦ୍ଧି ପାଇଛି। ମୋଟ ଉପରେ ଦେଖିଲେ ମାଲହୋତ୍ରାଙ୍କ ପରେ ସେ ଦେଶର ଦ୍ୱିତୀୟ ଧନୀ ମହିଳା। ଅନ୍ୟ ପକ୍ଷରେ ବାଇକନ୍ର କିରନ ମଜୁମଦାର ଶ’ଙ୍କ ସମ୍ପତ୍ତି ୨୧ ପ୍ରତିଶତ ହ୍ରାସ ଘଟିବା ଫଳରେ ତାଙ୍କ ର଼୍ୟାଙ୍କ ଗୋଟିଏ ସ୍ଥାନ ତଳକୁ ଖସି ତୃତୀୟ ସ୍ଥାନରେ ରହିଛି। କିରନଙ୍କ ସମ୍ପତ୍ତି ପରିମାଣ ୨୯,୦୩୦ କୋଟି ଟଙ୍କା।
ନିଜ ବ୍ୟବସାୟକୁ ସଫଳତାର ସହ ପରିଚାଳନା କରୁଥିବା ଅଥବା ନିଜ ଗୋଡ଼ରେ ଛିଡ଼ାହୋଇ ଧନୀ ହୋଇଥିବା ୧୦୦ ଭାରତୀୟ ମହିଳାଙ୍କ ତାଲିକା ପ୍ରକାଶ ପାଇଛି। ଏହି ମହିଳାମାନଙ୍କ ମୋଟ ସମ୍ପତ୍ତି ପରିମାଣ ୨୦୨୦ରେ ୨.୭୨ ଲକ୍ଷ କୋଟି ଥିତ୍ବା ବେଳେ ୨୦୨୧ରେ ତାହା ୪.୧୬ ଲକ୍ଷ କୋଟି ଟଙ୍କାକୁ ବୃଦ୍ଧି ପାଇଛି। ଭାରତର ମୋଟ ଜିଡିପିକୁ ସେମାଙ୍କର ଅବଦାନ ୨ ପ୍ରତିଶତ। ଦିଲ୍ଲୀ-ଜାତୀୟ ରାଜଧାନୀ ଅଞ୍ଚଳରୁ ତାଲିକାରେ ସର୍ବାଧିକ ୨୫ ଜଣ ଥିବାବେଳେ ଏହା ପଛକୁ ମୁମ୍ବାଇର ୨୧ ଏବଂ ହାଇଦ୍ରାବାଦର ୧୨ ମହିଳା ଅଛନ୍ତି। ତାଲିକାରେ ୪୨୦ କୋଟି ଟଙ୍କାର ସମ୍ପତ୍ତି ସହ ଭୋପାଳର ଜେଟ୍ସେଟ୍ଗୋ କମ୍ପାନୀର କନିକା ଟେକ୍ରିଓ୍ବାଲ (୩୩) ସର୍ବକନିଷ୍ଠା। ଅନ୍ୟମାନଙ୍କ ମଧ୍ୟରେ ପେପ୍ସି କମ୍ପାନୀ ମୁଖ୍ୟ ଇନ୍ଦ୍ରା ନୂଇ, ଏଚ୍ଡିଏଫ୍ସିର ରେଣୁ ସୁଦ୍ କର୍ନାଡ ଏବଂ କୋଟାକ ମହିନ୍ଦ୍ରା ବ୍ୟାଙ୍କର ଶାନ୍ତି ଏକାମ୍ବରମ ଧନୀ ଭାରତୀୟ ମହିଳା ତାଲିକାରେ ସ୍ଥାନ ପାଇଛନ୍ତି।