ଗଡ଼ିଲା ରାଉରକେଲା-ବାଦାମପାହାଡ଼ ଏକ୍ସପ୍ରେସ

ରାଉରକେଲା,୨୬ା୧୧(ବିପ୍ଳବରଞ୍ଜନ ଦାଶ): ରାଉରକେଲା ରେଳଷ୍ଟେଶନ ୫ନମ୍ବର ପ୍ଲାଟଫର୍ମରୁ ରବିବାର ରାଉରକେଲା-ବାଦାମପାହାଡ଼ ସାପ୍ତାହିକ ଏକ୍ସପ୍ରେସର ବିଧିବଦ୍ଧ ଚଳାଚଳ ଆରମ୍ଭ ହୋଇଛି। ଗତ ମଙ୍ଗଳବାର ରାଷ୍ଟ୍ରପତି ଦ୍ରୌପଦୀ ମୁର୍ମୁ ମୟୂରଭଞ୍ଜ ଜିଲା ଗସ୍ତ କରି ବାଦାମପାହାଡ ରେଳଷ୍ଟେସନଠାରୁ ୩ଟି ନୂତନ ଟ୍ରେନ ଚଳାଚଳ ଶୁଭାରମ୍ଭ କରିଥିଲେ। ଏହି ୩ଟି ଟ୍ରେନ୍‌ ହେଉଛି ବାଦାମପାହାଡ଼-ଶାଲିମାର-ବାଦାମପାହାଡ଼ ଏକ୍ସପ୍ରେସ, ବାଦାମପାହାଡ଼ ଟାଟାନଗର ମେମୁ, ବାଦାମପାହାଡ଼-ରାଉରକେଲା-ବାଦାମପାହାଡ଼ ଏକ୍ସପ୍ରେସ।

ସେଥିମଧ୍ୟରୁ ବାଦାମପାହାଡ଼-ରାଉରକେଲା-ବାଦାମପାହାଡ଼ ଏକ୍ସପ୍ରେସ ରବିବାରଠାରୁ ଚଳାଚଳ ଆରମ୍ଭ କରିଛି। ଏହି ଟ୍ରେନ୍‌ ସକାଳ ୬ଟା ୩୦ରେ ବାଦାମପାହାଡ଼ ଛାଡ଼ି ରାଉରକେଲା ଅଭିମୁଖେ ଆସିଥିଲା। ସେହିପରି ଅପରାହ୍ନ ୨ଟା ୨୦ରେ ରାଉରକେଲା ଛାଡ଼ି ବାଦାମପାହାଡ଼ ଅଭିମୁଖେ ଯାଇଥିଲା। ସାପ୍ତାହିକ ବାଦାମପାହାଡ଼-ରାଉରକେଲା-ବାଦାମପାହାଡ ଏକ୍ସପ୍ରେସ ଟ୍ରେନ କେବଳ ରବିବାର ଦିନ ଚାଲିବ। ରାଉରକେଲା -ବାଦାମପାହାଡ଼ ମଧ୍ୟରେ ମନୋହରପୁର, ଗୋଏଲକେରା, ଚକ୍ରଧରପୁର, ରାଜଖରସୁଆଁ, ସିନି, ଟାଟାନଗର, ବହଲଦା ରୋଡ, ଅଁଳାଜୁରୀ, ରାଇରଙ୍ଗପୁର ଷ୍ଟେଶନରେ ଅଟକିବ।

ପ୍ରଥମ ଦିନରେ ରାଉରକେଲା ରେଳ ଷ୍ଟେସନଠାରୁ ରାଉରକେଲା ସମେତ ଜିଲାର ବିଭିନ୍ନ ଅଞ୍ଚଳ ଓ ଜିଲା ବାହାରୁ ବହୁଯାତ୍ରୀ ଏହି ଟ୍ରେନ୍‌ରେ ଯାତ୍ରା କରିଛନ୍ତି। ନୂତନ କରି ଏହି ଟ୍ରେନ ମୟୁରଭଞ୍ଜ ଜିଲା ସହ ସୁନ୍ଦରଗଡ଼ ଜିଲାକୁ ଯୋଡ଼ୁଛି। ସୁନ୍ଦରଗଡ଼ ସହ ମୟୁରଭଞ୍ଜ ଜିଲାର ରେଳଯାତ୍ରୀ ମହଲରେ ଖୁସି ପ୍ରକାଶ ପାଇଛି।