ରାଉରକେଲା ଅଫିସ,୨୭।୬: ରାଉରକେଲା ଚାନ୍ଦିପୋଷ ଥାନା ଅନ୍ତର୍ଗତ ମୁଣ୍ଡାସାହି ଛକରେ ଏନ୍କାଉଣ୍ଟର ଘଟଣାରେ ଅଟକ ଥିବା ଦୁର୍ବୃତ୍ତ ଟୁଚୁ ଇନ୍ଧୁଆର(୨୮)ଙ୍କୁ ପୋଲିସ ରବିବାର ଗିରଫ କରି କୋର୍ଟଚାଲାଣ କରିଛି। ଅଧିକ ତଦନ୍ତ ପାଇଁ ପୋଲିସ ତାଙ୍କୁ ରିମାଣ୍ଡରେ ଆଣିବାକୁ କୋର୍ଟରେ ଆବେଦନ କରିଛି। ତେବେ ଏନ୍କାଉଣ୍ଟର ହୋଇଥିବା ଅନ୍ୟତମ ଅଭିଯୁକ୍ତ ବିଶ୍ୱଜିତ ସାହୁ(୨୪) ଆରଜିଏଚ୍ରେ ଚିକିତ୍ସିତ ହେଉଛନ୍ତି। ତାଙ୍କୁ ୧ ପ୍ଲାଟୁନ ଫୋର୍ସ ଜଗି ରହିଛନ୍ତି।
ସୂଚନାଯୋଗ୍ୟ, ଶନିବାର ସକାଳ ସାଢ଼େ ୧୦ଟାରେ ଝାଡ଼ଖଣ୍ଡ ଗୁମଲା ଜିଲାର ବସିଆ ଗ୍ରାମର ବିଶ୍ୱଜିତ ଓ ଟୁଚୁ ଏକ କାରରେ ମାରଣାସ୍ତ୍ର ଧରି ରାଉରକେଲା ଆସୁଥିବା ବିଶେଷ ସୂତ୍ରରୁ ଜାଣିପାରି ପୋଲିସ ଉକ୍ତ ଗାଡ଼ିକୁ ପିଛା କରିଥିଲା। ଏହି ସମୟରେ କାର୍ରେ ଥିବା ଟୁଚୁ ଓ ବିଶ୍ୱଜିତ ଝାଡ଼ଖଣ୍ଡ ସୀମାନ୍ତ ରେଲାହାଟୁ ଜଙ୍ଗଲକୁ ଫେରାର ହେବା ପାଇଁ ଚେଷ୍ଟା କରିଥିଲେ। ପୋଲିସ ସେମାନଙ୍କୁ ଅଟକାଇବା ପାଇଁ ଉଦ୍ୟମ କରୁଥିବା ବେଳେ ବିଶ୍ୱଜିତ ପୋଲିସ ଉପରକୁ ଗୁଳି ଚଳାଇଥିଲା। ପୋଲିସ ପାଲଟା ଗୁଳି ଚଳାଇବାରୁ ବିଶ୍ୱଜିତଙ୍କ ବାମ ଗୋଡ଼ରେ ଗୁଳି ବାଜିଥିଲା। ପରେ ପୋଲିସ ଉଭୟ ଅଭିଯୁକ୍ତଙ୍କୁ କାବୁ କରିବା ସହ ଏକେ-୪୭ ରାଇଫଲ ଓ ଗୁଳି ଜବତ କରିଥିଲା। ତେବେ ଗିରଫ ଅଭିଯୁକ୍ତଙ୍କ ହାତରେ କିଭଳି ଏକେ-୪୭ ରାଇଫଲ ଭଳି ମାରଣାସ୍ତ୍ର ଆସିଲା ସେ ନେଇ ପୋଲିସ ତଦନ୍ତ ଆରମ୍ଭ କରିଛି। ଏହି ଘଟଣାରେ ପାଖାପାଖି ୩୦ଜଣ ସମ୍ପୃକ୍ତ ଥିବାରୁ ପୋଲିସ ସେମାନଙ୍କ ତଥ୍ୟ ସଂଗ୍ରହ କରିଛି ଏବଂ ଖୁବ୍ଶୀଘ୍ର ସେମାନଙ୍କୁ ଗିରଫ କରିବା ପାଇଁ ଉଦ୍ୟମ ଚଳାଇଛି। ଅନ୍ୟପକ୍ଷେ ଝାଡ଼ଖଣ୍ଡ ସୀମାନ୍ତରେ ପ୍ରାୟ ୮ଟି ଗୋଷ୍ଠୀ ରହିଛି। ଏହି ଗୋଷ୍ଠୀର ସଦସ୍ୟମାନେ ରାଇଫଲ ଚାଲାଣ ସହ ବଡ ବଡ ବ୍ୟବସାୟୀଙ୍କୁ ଟାର୍ଗେଟ କରୁଥିବା ଆଲୋଚନା ହେଉଛି। ତେଣୁ ଗିରଫ ଅଭିଯୁକ୍ତ ସେଭଳି କିଛି ଯୋଜନା କରି ରାଉରକେଲା ଆସିଥିବା ମଧ୍ୟ କୁହାଯାଉଛି।
