କଟକ,୮।୭,(ସୁପ୍ରିୟା ପ୍ରିୟଦର୍ଶିନୀ): ବାରବାଟୀ ଷ୍ଟାଡିୟମରେ ଚାଲିଥିବା ଫାଓ ଲିଗ୍ର ଶୁକ୍ରବାର ଅନୁଷ୍ଠିତ ଏକ ମ୍ୟାଚରେ ରୋଭର୍ସ ଆଥଲେଟିକ କ୍ଲବ ବିଜୟୀ ହୋଇଛି। ରୋଭର୍ସ ୩-୧ ଗୋଲରେ ଗତ ସଂସ୍କରଣର ରନରଅପ ବିଡାନାସୀ କ୍ଲବକୁ ପରାସ୍ତ କରିଛି। ବିଡାନାସୀ ପକ୍ଷରୁ ୩୬ତମ ମିନିଟରେ ରାଜେଶ ନାୟକ ପ୍ରଥମ ଗୋଲ ସ୍କୋର କରିଥିଲେ। ୩୮ତମ ମିନିଟରେ ରୋଭର୍ସର କାର୍ତ୍ତିକ ହାନ୍ତାଳ ଗୋଲ ଦେଇ ମ୍ୟାଚ୍କୁ ବରାବର ସ୍ଥିତିରେ ପହଞ୍ଚାଇଥିଲେ। ୪୩ତମ ମିନିଟରେ ରାହୁଲ ମୁଖୀ ରୋଭର୍ସ ନିମନ୍ତେ ଦ୍ୱିତୀୟ ଗୋଲ ସ୍କୋର କରିଥିଲେ। ଉକ୍ତ ଗୋଲ ବଳରେ ପ୍ରଥମାର୍ଦ୍ଧରେ ୨-୧ରେ ଅଗ୍ରଣୀ ରହିଥିଲା ରୋଭର୍ସ। ଦ୍ୱିତୀୟାର୍ଦ୍ଧରେ ବିଡାନାସୀ ମ୍ୟାଚକୁ ପ୍ରତ୍ୟାବର୍ତ୍ତନ କରିବାକୁ ଚେଷ୍ଟା କରି ସଫଳ ହୋଇ ନ ଥିଲା। ୭୦ତମ ମିନିଟରେ ରୋଭର୍ସ ପକ୍ଷରୁ ଚନ୍ଦ୍ର ମୁଦୁଲି ଆଉ ଏକ ଗୋଲ ଦେଇଥିଲେ। ରାଧାଗୋବିନ୍ଦ ଏବଂ ଚାନ୍ଦ କ୍ଲବ ମଧ୍ୟରେ ଅନୁଷ୍ଠିତ ଅନ୍ୟ ମ୍ୟାଚଟି ଗୋଲ ଶୂନ୍ୟ ଭାବେ ଶେଷ ହୋଇଥିଲା।