ଘଟଗାଁ,୧୪ା୪(ଡି.ଏନ୍.ଏ): କେନ୍ଦୁଝର ଜିଲା ଘଟଗାଁ ମା’ତାରିଣୀଙ୍କ ପୀଠରେ ଚଇତି ପର୍ବର ଷଷ୍ଠ ଦିବସ ଅବସରରେ ବିଶେଷକରି ଓଡ଼ିଆ ନବବର୍ଷ ଓ ମହାବିଷୁବ ପଣାସଂକ୍ରାନ୍ତିରେ ପୀଠ ଭକ୍ତମୟ ହୋଇଉଠିଥିଲା। ସକାଳ ୫ଟାରୁ ରାତ୍ର ୮ଘଟିକା ପର୍ଯ୍ୟନ୍ତ ଲକ୍ଷାଧିକ ଶ୍ରଦ୍ଧାଳୁ ଲମ୍ବାଧାଡ଼ିରେ ମା’ଙ୍କ ଦର୍ଶନ କରିଥିଲେ। ଭକ୍ତଙ୍କ ଭିଡ଼ ଦେଖି ମା’ଙ୍କ ଦିବା ପହଡ଼ ପଡ଼ି ନ ଥିଲା।
ଶୁକ୍ରବାର ଭୋର ୪ଟାରୁ ମା’ଙ୍କ ସମସ୍ତ ନୀତିକାନ୍ତି ପରେ ସୁନାବେଶ କରାଯାଇଥିଲା। ୫ ଟାରୁ ମା’ଙ୍କ ଦର୍ଶନ ଆରମ୍ଭ ହୋଇଥିଲା। ଗୁରୁବାର ରାତିରୁ ଓଡ଼ିଶାର ବିଭିନ୍ନ ସ୍ଥାନରୁ ପ୍ରାୟ ୧ ଲକ୍ଷରୁ ଊର୍ଦ୍ଧ୍ୱ ଶ୍ରଦ୍ଧାଳୁ ମା’ଙ୍କ ସୁନାବେଶ ଦେଖିବା ପାଇଁ ଧାଡ଼ିରେ ଛିଡ଼ା ହୋଇଥିଲେ। ଶୃଙ୍ଖଳା ଦର୍ଶନ ପାଇଁ ମନ୍ଦିର ପ୍ରଶାସନ ତରଫରୁ ଭୋଗଡାଲା ଧାଡ଼ି ୮ଟି ଓ ସାଧାରଣ ଦର୍ଶନ ପାଇଁ ୨ ଟି ଧାଡ଼ିର ବ୍ୟବସ୍ଥା କରାଯାଇଥିଲା। ମା’ଙ୍କ ନିକଟରେ ପଣାଭୋଗ ଲାଗିବା ପରେ ପଣା ବଣ୍ଟନ କରାଯାଇଥିଲା। ଭକ୍ତମାନଙ୍କ ଟ୍ରଷ୍ଟ ବୋର୍ଡ, କେନ୍ଦୁଝର ଯାଦବ ମହାସଭା, ଜଗତଜନନୀ, କେନ୍ଦୁଝର ସେବା ସମିତି ଓ ଝାରସୁଗୁଡ଼ା ସନ୍ଧ୍ୟାରାଣୀ ପୃଷ୍ଟିଙ୍କ ସୌଜନ୍ୟରୁ ଭକ୍ତମାନଙ୍କୁ ପଣାପାଣି ଓ ମାଗଣା ଅନ୍ନପ୍ରସାଦ ବିତରଣ କରାଯାଇଥିଲା। ସାଂସ୍କୃତିକ ମଣ୍ଡପରେ ଅଖଣ୍ଡ ଭଜନ ସମାରୋହରେ ଓଡ଼ିଶାର ସୁନାମଧନ୍ୟ କଣ୍ଠଶିଳ୍ପୀ ଯୋଗଦେଇ ଭଜନ ପରିବେଷଣ କରିଥିଲେ। ୮୭ତମ ଚଇତିପର୍ବ ୬ଷ୍ଠ ଦିନ ସଭାରେ ପ୍ରବଚକ ପ୍ରମୋଦ କୁମାର ପୃଷ୍ଟି ପାଲାମଣ୍ଡପଠାରେ ପ୍ରବଚନ ପ୍ରଦାନ କରିଥିଲେ। ପରେ ବାଦୀପାଲା ଗାୟକ ନୃସିଂହ ଚରଣ ହୋତା ଓ ଭାସ୍କର ଚନ୍ଦ୍ର ସାହୁ ପାଲା ପରିବେଷଣ କରିଥିଲେ। ଶାନ୍ତିଶୃଙ୍ଖଳା ରକ୍ଷାପାଇଁ ଜିଲା ପ୍ରଶାସନ ୧୦୦ରୁ ଊର୍ଦ୍ଧ୍ୱ କନଷ୍ଟେବଲ, ୫୦ ହୋମ୍ଗାର୍ଡ, ୧୦ ଇନ୍ସପେକ୍ଟର, ୨୦ ସବ୍ଇନ୍ସପେକ୍ଟର ସହିତ ପାଟ୍ରୋଲିଂ ବ୍ୟବସ୍ଥା ଗ୍ରହଣ କରାଯାଇଥିଲା। ଘଟଗଁା ଏସ୍ଡିପିଓ ସୁଶୀଲ ମିଶ୍ର, ଥାନା ଅଧିକାରିଣୀ ପ୍ରତିଭା ମଞ୍ଜରୀ ସାହୁ, ତହସିଲଦାର ଜନକ ନାୟକ ଉପସ୍ଥିତ ଥିଲେ। ଦେବୋତ୍ତର ବିଭାଗର ଡେପୁଟି କମିଶନର ପ୍ରଶାନ୍ତ ବେହେରା ଉପସ୍ଥିତ ରହି ସମସ୍ତ କାର୍ଯ୍ୟ ତଦାରଖ କରିଥିଲେ। ସନ୍ଧ୍ୟାରେ ମା’ଙ୍କ ପ୍ରିୟଭୋଗ ଚକୁଳିପିଠା ଭକ୍ତମାନଙ୍କୁ ଟ୍ରଷ୍ଟ ବୋର୍ଡ ପକ୍ଷରୁ ବଣ୍ଟନ କରାଯାଇଥିଲା।