ମୁମ୍ବାଇ,୨୧।୫: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍)ରେ ଶନିବାର ମୁମ୍ବାଇ ଇଣ୍ଡିଆନ୍ସ ଏବଂ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ମୁକାବିଲା ହେବ। ହେଲେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆର୍ସିବି) ପାଇଁ ଏହି ମ୍ୟାଚ୍ର ଗୁରୁତ୍ୱ ଅଧିକ। କାରଣ ଏଥିରୁ ପ୍ଲେ ଅଫ୍ର ଚତୁର୍ଥ ଟିମ୍ ନିର୍ଦ୍ଧାରିତ ହେବ। ଯଦି ମୁମ୍ବାଇ ମ୍ୟାଚ୍କୁ ଜିତେ ତେବେ ଆର୍ସିବି ସ୍ବତଃପ୍ରବୃତ୍ତ ଭାବେ ପ୍ଲେ-ଅଫ୍ରେ ପହଞ୍ଚିବ। ଏଥିନେଇ ଆର୍ସିବି ପ୍ରଶଂସକ ମୁମ୍ବାଇକୁ ସମର୍ଥନ କରୁଛନ୍ତି। ଏପରିକି ଫ୍ରାଞ୍ଚାଇଜ୍ ମଧ୍ୟ ମୁମ୍ବାଇକୁ ସମର୍ଥନ କରି ଟୁଇଟର୍ରେ ନିଜ ପ୍ରୋଫାଇଲରେ ପରିବର୍ତ୍ତନ କରିଛନ୍ତି। ଲାଲ ରଙ୍ଗ ପରିବର୍ତ୍ତେ ନୀଳ ରଙ୍ଗରେ ପ୍ରୋଫାଇଲ ଫଟୋ ଦେଖିବାକୁ ମିଳୁଛି। ଏହା ଦେଖି କିଛି କ୍ରିକେଟ ପ୍ରଶଂସକ ମଜା ଉଡାଉଥିବା ବେଳେ କିଛି ଓଭରଆକ୍ଟିଂ ପାଇଁ ପଇସା କାଟିବାକୁ କହିଛନ୍ତି। ପୂର୍ବରୁ ଆର୍ସିବି ଅଧିନାୟକ ଫାଫ ଡୁ ପ୍ଲେସିସ୍ ମଧ୍ୟ ରୋହିତ ଶର୍ମାଙ୍କଠାରୁ ବଡ ସ୍କୋର ଆଶା କରୁଥିବା କହିଥିଲେ।
କହିରଖୁଛୁ, ଏଯାବତ ଟୁର୍ନାମେଣ୍ଟରେ ସର୍ବଶ୍ରେଷ୍ଠ ପ୍ରଦର୍ଶନ କରି ଗୁଜରାଟ ଟାଇଟନ୍ସ, ଲକ୍ଷ୍ନୌ ସୁପର ଜିଆଣ୍ଟ୍ସ ଏବଂ ରାଜସ୍ଥାନ ରୟାଲ୍ସ ଦଳ ପ୍ଲେ-ଅଫ୍ରେ ସ୍ଥାନ ପକ୍କା କରିଛନ୍ତି। ଚତୁର୍ଥ ତଥା ଶେଷ ସ୍ଥାନ ପାଇଁ ଦିଲ୍ଲୀ-ବାଙ୍ଗାଲୋର ମଧ୍ୟ କଡ଼ା ଟକ୍କର ଦେଖିବାକୁ ମିଳୁଛି। ବାଙ୍ଗାଲୋର ଅଙ୍କ ତାଲିକାରେ ୧୬ ପଏଣ୍ଟ କରିଥିବା ବେଳେ ଦିଲ୍ଲୀ ୧୪ ପଏଣ୍ଟରେ ରହିଛି। ଦିଲ୍ଲୀ ଯଦି ମୁମ୍ବାଇକୁ ଆଜିର ମ୍ୟାଚ୍ରେ ହରାଇଦିଏ ତେବେ ସିଧା ସିଧା ପ୍ଲେଅଫ୍ର ପହଞ୍ଚିଯିବ। କାରଣ ଆର୍ସିବିଠାରୁ ଦଳର ନେଟ୍-ରନ୍ରେଟ୍ ଭଲ ରହିଛି।