ମୁମ୍ବାଇ,୧୯।୫: ଦୀର୍ଘ ଦିନ ହେଲା ଚୁପ୍ ଥିବା ବିରାଟ କୋହଲିଙ୍କ ବ୍ୟାଟ ଗର୍ଜନ କରିଛି। ତାଙ୍କର ୭୩ ରନ୍ର ଇନିଂସ ଯୋଗୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ୮ ଉଇକେଟରେ ଗୁଜରାଟ ଟାଇଟନ୍ସକୁ ପରାସ୍ତ କରିଛି। ଏହି ବିଜୟ ଯୋଗୁ ବାଙ୍ଗାଲୋର ପଏଣ୍ଟ ଟେବୁଲର ଚତୁର୍ଥ ସ୍ଥାନକୁ ଉଠିଛି ହେଲେ ପ୍ଲେଅଫ୍ରେ ସ୍ଥାନ ପକ୍କା କରିନାହିଁ। ଆର୍ସିବିକୁ ଏବେ ମୁମ୍ବାଇ ଇଣ୍ଡିଆନ୍ସ ଉପରେ ଭରସା କରିବାକୁ ପଡ଼ିବ। କାରଣ ଦିଲ୍ଲୀ କ୍ୟାପିଟାଲ୍ସ ତା’ର ଅନ୍ତିମ ମ୍ୟାଚ୍ରେ ମୁମ୍ବାଇ ଇଆନ୍ସକୁ ଭେଟିବ। ଏଥିରେ ମୁମ୍ବାଇ ବିଜୟୀ ହେଲେ ହିଁ ଆର୍ସିବି ପ୍ଲେଅଫ୍ରେ ସ୍ଥାନ ପାଇବ।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଗୁଜରାଟ ଟାଇଟନ୍ସ ୨୦ ଓଭରରେ ୫ ଉଇକେଟ ହରାଇ ୧୬୮ ରନ୍ କରିଥିଲା। ଅଧିନାୟକ ହାର୍ଦ୍ଦିକ ୬୨ (୪ ଚୌକା ଓ ୩ ଛକା) ରନ୍ କରି ଅପରାଜିତ ରହିଥିଲେ। ଅନ୍ୟମାନଙ୍କ ମଧ୍ୟରେ ଡେଭିଡ୍ ମିଲର (୩୪ ରନ୍, ୩ ଛକା), ରିଦ୍ଧିମାନ ଶାହା ୩୧ (୪ ଚୌକା ଓ ୧ ଛକା) ରନ୍ କରିଥିଲେ। ଆର୍ସିବି ପକ୍ଷରୁ ଜୋଶ ହାଜେଲଉଡ୍ ୨ ଉଇକେଟ ନେଇଥିଲେ। ଜବାବରେ ଆରମ୍ଭରୁ ଆଟାକିଂ ବ୍ୟାଟିଂ କରିଥିଲେ ବିରାଟ କୋହଲି ଓ ଅଧିନାୟକ ଫାଫ ଡୁ’ପ୍ଲେସି। ଦୁହେଁ ୧୧୫ ରନ୍ ଯୋଡ଼ିଥିଲେ। ୧୫ତମ ଓଭରରେ ଏହି ଯୋଡ଼ିକୁ ଭାଙ୍ଗିଥିଲେ ରଶିଦ ଖାନ। ଡୁ’ପ୍ଲେସି ୪୪ (୫ ଚୌକା)ରନ୍ କରି ଆଉଟ୍ ହୋଇଥିଲେ। ତାଙ୍କ ପରେ ପ୍ୟାଭିଲିଅନ ଫେରିଥିଲେ କୋହଲି। ସେ ୫୪ ବଲରେ ୭୩ (୮ ଚୌକା ଓ ୨ ଛକା) ରନ୍ କରିଥିବା ବେଳେ ରଶିଦଙ୍କ ବଲରେ ଷ୍ଟମ୍ପିଂ ଆଉଟ୍ ହୋଇଥିଲେ। ଚଳିତ ଆଇପିଏଲରେ ଏହା କୋହଲିଙ୍କ ସର୍ବାଧିକ ବ୍ୟକ୍ତିଗତ ସ୍କୋର। ତା’ ପରେ ମ୍ୟାକ୍ସଓ୍ବେଲ ୧୮ ବଲରେ ବିସ୍ଫୋରକ ୪୦(୫ ଚୌକା ଓ ୨ ଛକା) ରନ୍ ଖେଳିଥିଲେ। ଫଳରେ ୧୮.୪ ଓଭରରେ ୨ ଉଇକେଟରେ ୧୭୦ ରନ୍ କରି ମ୍ୟାଚ୍ ଜିତି ନେଇଥିଲା।