ଦୁବାଇ, ୨୬।୮- ସେପ୍ଟେମ୍ବର ୧୯ରୁ ଆରମ୍ଭ ହେବାକୁ ଯାଉଥିବା ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ-୨୦୨୦) ପାଇଁ ପ୍ରସ୍ତୁତି ଜୋର୍ ଧରିଛି। ୮ଟି ଯାକ ଫ୍ରାଞ୍ଚାଇଜ୍ ଟିମ୍ ୟୁନାଇଟେଡ ଆରବ ଏମିରେଟ୍ସ(ୟୁଏଇ)ରେ ପହଞ୍ଚତ୍ ସାରିଥିବାବେଳେ ମଙ୍ଗଳବାର ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆର୍ସିବି) ଦଳର ଜର୍ସି ଉନ୍ମୋଚନ ହୋଇ ଯାଇଛି। ଆରସିବି ଅଫିସିଆଲମାନେ ଟୁଇଟରଯୋଗେ ଏହାର ଫଟୋ ଶେୟାର କରିଛନ୍ତି। ଆର୍ସିବିର କିଟ୍କୁ ଡିଜାଇନ୍ କରିଛନ୍ତି ଜେଭେନ। ୨୦୧୬ରୁ ଜେଭେନ ଆରସିବିର କିଟ୍ ପ୍ରସ୍ତୁତକର୍ତ୍ତା ରହି ଆସିଛି। ଏହା ପୂର୍ବରୁ ଆଡିଡାସ କମ୍ପାନୀ ରୟାଲ ଚ୍ୟାଲେଞ୍ଜର୍ସର କିଟ୍ ଡିଜାଇନ୍ କରି ଆସୁଥିଲା। ଲାଲ ଏବଂ କଳା ଦୁଇ ପ୍ରକାର ରଙ୍ଗରେ କିଟ୍ ପ୍ରସ୍ତୁତ କରାଯାଇଛି। ଜର୍ସିରେ ସୁନା ରଙ୍ଗରେ ଲୋଗୋକୁ ସ୍ଥାନିତ କରାଯାଇଥିବାବେଳେ ପ୍ରାୟୋଜକଙ୍କ ନାମ ଧଳା ରଙ୍ଗରେ ଲେଖା ଯାଇଛି। ଚଳିତ ବର୍ଷ ପାଇଁ ମୁଥୋତ ଫିନକର୍ପ ଆର୍ସିବି ଦଳର ଟାଇଟଲ ପ୍ରାୟୋଜକ ରହିଛି। ମୁଥୋତ ପାପ୍ପାଚାନ ଗ୍ରୁପର ମୁଖ୍ୟ କାର୍ଯ୍ୟାଳୟ ଥିରୁଭାନନ୍ତପୁରମରେ ରହିଛି। ଏହା ଆର୍ଥିକ ସେବା, ମୋଟରଯାନ ଡିଲରଶିପ୍, ଆତିଥ୍ୟ, ରିୟଲ ଇଷ୍ଟେଟ, ସ୍ବାସ୍ଥ୍ୟର ଯନତ୍, ସୂଚନା ପ୍ରଯୁକ୍ତି, ବହୁମୂଲ୍ୟ ଧାତୁ ଆଦି ଏକାଧିକ ବ୍ୟବସାୟରେ ସମ୍ପୃକ୍ତ। ଏହି କମ୍ପାନୀ ଚେନ୍ନାଇ ସୁପରକିଙ୍ଗ୍ସର ଟାଇଟଲ ପ୍ରାୟୋଜକ କୋଚି ଭିତ୍ତିକ ମୁଥୋତ ଗ୍ରୁପଠାରୁ ଭିନ୍ନ। ତେବେ ଉଭୟ କମ୍ପାନୀ ୧୯୮୭ରେ ମୁଥୋତ ନିନାନ ମାଥାଇ ଆରମ୍ଭ କରିଥିବା ବ୍ୟବସାୟର ଅଂଶବିଶେଷ। ଆରସିବିର ନୂଆ ଜର୍ସିରେ ଦଳର ୩ ତାରକା ଖେଳାଳି ଏବି ଡିଭିଲର୍ସ, ଅଧିନାୟକ ବିରାଟ କୋହଲି ଓ ୟୁଜବେନ୍ଦ୍ର ଚହଲ ନଜରକୁ ଆସିଛନ୍ତି।
କୋହଲିଙ୍କ ଚେତାବନୀ
ଜୈବ ସୁରକ୍ଷିତ ପରିବେଶ ପ୍ରୋଟୋକଲ ନ ଭାଙ୍ଗିବା ନେଇ ସାଥୀ ଖେଳାଳିଙ୍କୁ ଚେତାବନୀ ଦେଇଛନ୍ତି ଆରସିବି ଅଧିନାୟକ ବିରାଟ କୋହଲି। ସମସ୍ତ ଖେଳାଳି ଓ ଷ୍ଟାଫ୍ଙ୍କୁ ନେଇ ଆୟୋଜିତ ଭର୍ଚୁଆଲ କନ୍ଫରେନ୍ସରେ କୋହଲି ସମସ୍ତଙ୍କୁ ସତର୍କ କରାଇ ଦେଇଛନ୍ତି। ”ଆମକୁ ଯାହା କୁହାଯାଇଛି ତାହାକୁ ସମସ୍ତେ କଡ଼ାକଡ଼ିଭାବେ ମାନିବା ଉଚିତ। ଏହା ସହିତ କୌଣସି ପରିସ୍ଥିତିରେ ସାଲିସ କରାଯାଇପାରିବ ନାହିଁ। କାରଣ ଆମମାନଙ୍କ ମଧ୍ୟରୁ ଜଣେ କେହି ଭୁଲ୍ କଲେ ଏହାର ପ୍ରଭାବ ସମ୍ପୂର୍ଣ୍ଣ ଟୁର୍ନାମେଣ୍ଟ ଉପରେ ପଡ଼ିପାରେ“ ବୋଲି କୋହଲି କହିଛନ୍ତି। ସିନିୟର ମାନଙ୍କୁ ଏହା ଉପରେ ଅଧିକ ଧ୍ୟାନ ଦେବାକୁ ପଡ଼ିବ। ପ୍ରୋଟୋକଲ ଭାଙ୍ଗିବା ଖେଳାଳିଙ୍କୁ ଜୈବ ସୁରକ୍ଷିତ ପରିବେଶରୁ ବାହାର କରାଯାଇ ୭ ଦିନପାଇଁ ଆଇସୋଲେଶନରେ ରଖାଯିବ। ଟେଷ୍ଟ ନେଗେଟିଭ୍ ହେଲେ ଯାଇ ତାଙ୍କୁ ପୁଣି ଏହି ପରିବେଶକୁ ଅନୁମତି ଦିଆଯିବ। କୌଣସି ଖେଳାଳି ପ୍ରୋଟୋକଲ ଭଙ୍ଗକଲେ ତାହା ସମ୍ପୂର୍ଣ୍ଣ ଦଳକୁ କ୍ଷତି ପହଞ୍ଚାଇବ। ଦଳ ପାଇଁ ପ୍ରତି ଖେଳାଳି ଗୁରୁତ୍ୱପୂର୍ଣ୍ଣ। ଏହାକୁ ସମସ୍ତେ ଧ୍ୟାନରେ ରଖିବା ଉଚିତ ବୋଲି କୋହଲି କହିଛନ୍ତି।
